ගාල්ල, දොඩන්දූව, මොරකොල ගංගාරාම විහාරස්ථානයේ පෙරේදා (28) සවස පැවති සංඝමිත්තා පෙරහරේ ගමන් කළ අලියකු කුලප්පුවී ඇත්ගොව්වා බිම දමා පාගා ඇති බවත් බරපතළ තුවාල ලැබූ ඇත්ගොව්වා කරාපිටිය රෝහලට ඇතුළත් කෙරුණු බවත් හික්කඩුව පොලීසිය පවසයි.
පෙරහර ගමන් කරමින් සිටියදී දොඩන්දූව පාලම අසලදී කුලප්පු වූ අලියා, ඇත් ගොව්වා බිම දමා පෑගීමත් සමඟ පෙරහර නැරැඹීමට පැමිණ සිටි පිරිස් හිස් ලූ ලූ අත දිව යන්නට වූහ. මෙහිදී අලියා පිටේ ගමන් කරමින් සිටි අයෙකු ද අලියා පිටෙන් වැටී තුවාල සිදුව ඇත.
මෙම පෙරහර සඳහා ගෙන්වා තිබූ බිබිල නම් හස්තියා මෙලෙස කුලප්පු වීමෙන් ඇත්ගොව්වා උස්සා බිම දමා පාගා ඇතැයි වාර්තා වෙයි.
පෙරහර නැරඹීමට පැමිණි පිරිස් සී සී කඩ දිව යද්දී ගාල්ල - කොළඹ ප්රධාන මාර්ගයේ දිවගිය අලියා මෙල්ල කර ගැනීමට තවත් ඇත්ගොව්වකු කටයුතු කර තිබූ බවද සඳහන් වෙයි.
බිම දමා අලියා විසින් පාගා දැමූ ඇත් ගොව්වා පසුව කරාපිටිය රෝහලට ඇතුළත් කරන ලදි.
ඇත් ගොව්වා දැඩි සත්කාර ඒකකයට ඇතුළත් කෙරුණු බව කරාපිටිය රෝහල් ප්රකාශකයෙක් පැවැසුවේය. ඔහුගේ ඉළ ඇට දෙකකට දැඩිව හානි සිදුව ඇතැයි ද එම ප්රකාශකයා වැඩිදුරටත් සඳහන් කළේය.
අලියා කුලප්පු වීමට හේතු වූයේ කුමන කාරණයක් ද යන්න සම්බන්ධයෙන් මෙතෙක් තොරතුරු අනාවරණය වී නැති බවත් ඒ සම්බන්ධයෙන් විමර්ශන සිදු කරන බවත් පැවසීය. ඇත්ගොව්වාගෙන් ප්රකාශයක් ලබාගැනීමෙන් අනතුරුව අලියා කුලප්පු වීමට හේතුව අනාවරණය කර ගැනීමට හැකිවනු ඇති බව පොලීසිය සඳහන් කළේය.
(එස්. දීයගහගේ,එස්. ලොකුකරවිට සහ ආර්. ඤාණදාස)
Comments
Post a Comment
Your comment will be visible after approval