වැල්ලම්පිටිය හල්මුල්ල ප්‍රදේශයේ නිවෙසක සිටි අවුරුදු 15ක දැරියක් නිවෙසට අවශ්‍ය බඩු ගෙන ඒම සඳහා රාත්‍රි 8 ට පමණ අසල පිහිටි කඩයක් වෙත යමින් සිටියදී ඇයගේ පෙම්වතා යැයි කියන තරුණයකු තවත් යහළුවකු සමඟ ත්‍රීවිල් රථයකින් පැමිණ ඇයව පැහැර ගෙන ගොස් තිබේ.
මෙලෙස දැරිය පැහැරගෙන යන අවස්ථාවේදී කෑ ගැසීම වැළැක්වීම සඳහා ඇයගේ කට ලේන්සුවකින් බැඳ තිබේ. වැල්ලම්පිටිය ජය මාවතේ නිවෙසක් වෙත ඇයව රැගෙන ගොස් රාත්‍රියේදී දූෂණයට ලක් කර තිබේ.
පසුදා උදයේ දැරිය ඇය රඳවා සිටි කාමරයෙන් පැන මහ මඟ දිගේ දුවමින් තම නිවෙස වෙත පැමිණ ඇත. ඒ අවස්ථාවේ ද ඇයගෙ කට සහ අතපය ද ගැට ගසා තිබී ඇති අතර,
ඒවා ගලවා දමමින් ඇය මහ මඟ දිගේ දුව ගොස් ඇති බව පොලිසිය පැවැසීය.
නිවෙස වෙත පැමිණි දැරිය ඇයගේ අක්කාට සිද්ධිය පවසා අක්කා ද සමඟ වැල්ලම්පිටිය පොලිසිය වෙත පැමිණ සිද්ධිය සම්බන්ධයෙන් පැමිණිලි කර තිබේ. පොලිසිය වැඩිදුරටත් දැරියගෙන් කරන ලද ප්‍රශ්න කිරීම්වලදී හෙළි වී ඇත්තේ ඇයගේ මව රැකියාවක් සඳහා විදේශගතව ඇති අතර පියා මව සහ දරුවන් අතහැර දමා ගොස් තිබෙන බවය.
දැරිය ළමා නිවාසයක නතර කොට සිට ඇති අතර එම නිවාසයෙන් පැන යළි නිවෙසට පැමිණ සිට අතරතුරේ මෙම සිද්ධියට මුහුණ පා තිබේ.
ඇය මෙම තරුණයා සමඟ ප්‍රේම සම්බන්ධතාවයක් පවත්වාගෙන ගොස් ඇති අතර තරුණයා මීට ටික කලකට පෙර මත්ද්‍රව්‍ය වැරදි සම්බන්ධයෙන් වැල්ලම්පිටිය පොලිසිය මඟින් අත්අඩංගුවට ගෙන නඩු පැවරීමෙන් පසු බන්ධනාගාරගතව නිදහස්ව පැමිණ තිබේ. එම හේතුව නිසා ඇය ඔහු සමඟ තිබූ සබඳතාවය නතර කර තිබුණි.
ඊට පළිගැනීමක් ලෙස පෙම්වතා මෙම අපරාධය සිදු කරන්නට ඇති බව පොලිසිය පවසයි.
වැල්ලම්පිටිය පොලිසියේ ස්ථානාධිපති ප්‍රධාන පොලිස් පරීක්ෂක ඉන්දික නිලන්ත මහතාගේ උපදෙස් අනුව අපරාධ විමර්ශන අංශයේ ස්ථානාධිපති පොලිස් පරීක්ෂක ඉසුරු ශාමික මහතා ඇතුළු නිලධාරීන් සැකකරු අත්අඩංගුවට ගැනීම සඳහා අදාළ නිවෙස වෙත යද්දී සැකකාර පෙම්වතා සහ මිතුරා පැන ගොස් ඇති අතර එම නිවෙස ලබාදුන් පුද්ගලයා අත්අඩංගුවට ගෙන තිබේ. එම පුද්ගලයා ඊයේ (14) අධිකරණය වෙත ඉදිරිපත් කිරීමෙන් අනතුරුව රක්ෂිත බන්ධනාගාරගත කරනු ලැබීය.
(මුල්ලේරියාව - සිරිසේන ගමගේ)
0 Comments