මෙසේ මරණයට පත්ව ඇත්තේ එම ප්‍රදේශයේ පදිංචි ස්ටෑන්ලි ස්ටෙපික් නමැති නාවලපිටිය කදිරේෂන් විදුහලේ සිසුවකි.
පසුගිය 23 දින මොන්ටක්‍රිස්ටෝ ප්‍රදේශයේ ක්‍රීඩා පිටියකදී මෙම සිසුන් ක්‍රිකට් ගසා තිබුණි.
සවස හතරයි දහයට පමණ සුළු වර්ෂාවක් පැවතීම නිසා මොවුන් ක්‍රිකට් ගැසීම නවතා නිවෙස් වලට යමින් සිට තිබේ.
ඒ අතරතුරේ එක් පාසල් සිසුවකු මෙම ස්ටැන්ලි සිසුවාගේ ක්‍රිකට් පිත්ත වතුර පිරුණු ස්ථානයක ඔබා තිබේ.
ඒ සමග මෙම ස්ටැන්ලි සිසුවා එම සිසුවාට බැන වැදී ඇති බව පොලිසිය පවසයි.
මින් කිපුණු අනෙක් සිසුවා ඔහුගේ ක්‍රිකට් පිත්තෙන් ස්ටැන්ලි සිසුවාගේ හිසට පහර දී තිබේ.
මෙයින් බරපතල තුවාල වූ සිසුවා නාවලපිටිය රෝහලටත් ඉන් අනතුරුව මහනුවර මහ රෝහලටත් ඇතුළත් කර ඇති අතර එහිදී ප්‍රතිකාර ලබමින් සිටි සිසුවා ඊයේ දින මිය ගොස් තිබේ.
පශ්චාත් මරණ පරීක්ෂණය පැවැත් වූ මහනුවර අධිකරණ වෛද්‍ය නිලධාරී සී. එස්. චන්ද්‍රදාස මහතා හිසට සිදුවූ බරපතල හානි නිසා මෙම මරණය සිදුව ඇති බව සඳහන් කර තිබුණි.
(ගම්පොළ - සුරංග දිල්හාන්)
0 Comments