මොරගහහේන කුඹුකවත්ත සුප්රිම් පාර්ක්හි කුලියට ගත් සුඛෝපභෝගි තෙමහල් නි‍වසක මහා පරිමාණයෙන් පවත්වාගෙන ගිය නීති විරෝධී මත්පැන් ස්කාගාරයක් වටලා රුපියල් ලක්ෂ 20කට ආසන්න වටිනා නීති විරෝධී මත්පැන් ගෝඩා ඇතුළු උපකරණ රැසක් සමඟ පුද්ගලයකු අත්අඩංගුවට ගත් බව බණ්ඩාරගම පොලිසිය පවසයි.
එම සැකකරු සමඟ නීති විරෝධී මත්පැන් ප්‍රවාහනයට යොදා ගත් සුඛෝපභෝගී මෝටර් රථය, නීති විරෝධී මත්පැන් බෝතල් 180ක්, ගෑස් සිලින්ඩර් 3ක්, ගෑස් ළිප් තුනක්, බැරල් 6ක්, ලීටර් 1000 විශාල ප්‍රමාණයේ ටැංකි 4ක්, ගෝඩා ලීටර් ලක්ෂ 30ක් හා වතුර මෝටරයක් ඇතුළු උපකරණ රැසක් පොලිස් භාරයට ගෙන ඇත.
බණ්ඩාරගම වල්ගම ප්‍රදේශයේ පදිංචි පුද්ගලයකු කුලියට ගත් සුඛෝපභෝගී මෝටර් රථයකින් නීති විරෝධී මත්පැන් ප්‍රවාහනය කරන බවට බස්නාහිර බුද්ධි කොට්ඨාසයේ පොලිස් කොස්තාපල් (88924) කරුණාජීව නිලධාරියාට ලද තොරතුරකට අනුව පෙරේදා (08) රාත්‍රි ගෝනපොළ හන්දියේදී අත්අඩංගුවට ගෙන සිදු කළ ප්‍රශ්න කිරීමේදී සුපිරි නි‍ෙවසේ මත්පැන් ජාවාරමේ තොරතුරු අනාවරණය වූ බව පොලිසිය පවසයි.
ඒ අනුව එම නි‍ෙවස වටලා සිදු කළ සෝදිසියේදී නි‍ෙවසේ දෙවන මහලේ කාමරයක මත්පැන් පෙරීම සඳහා බැරල් සකස් කර බට මාර්ගයෙන් පහතට රැගෙන ගොස් නි‍ෙවස පිටුපස ලෑලිවලින් තනන ලද කුඩා කාමරයක ගෝඩා බැරල් තබා මෝටරයක් ආධාරයෙන් ඉහළ මහලට යන ආකාරයෙන් සකස් කර තිබූ බව පොලිසිය පවසයි.
ඒ අනුව ලෑලිවලින් තන ලද කුඩා කාමරය කඩා ඒ තුළ තිබූ ලීටර් 1000ක් විශාල ටැංකි හතර පිටතට ගෙන ගෝඩා එම ස්ථානයේම විනාශ කර දැමීමට පොලිසිය මඟින් පියවර ගත් අතර එම කාමරය තුළ පාවිච්චි කර ඉවත් කරන ලද ‘ඊස්ට් පැකට්’ දහසකට අධික ප්‍රමාණයක් තිබූ බව පොලිසිය පවසයි.
මෙම ස්ථානයෙන් පෙරන ලද මත්පැන් සැකකරු විසින් බණ්ඩාරගම, පාණදුර, මොරගහහේන, පිළියන්දල ඉංගිරිය හා හොරණ ආදී ප්‍රදේශවලට මෝටර් රථයෙන් බෙදා හැර ඇති බව පොලිස් විමර්ශනවලදී අනාවරණය වී ඇත.
සැකකරුගෙන් සිදු කළ ප්‍රශ්න කිරීමේදී මත්පැන් ජාවාරමෙන් දිනකට රුපියල් ලක්ෂයක ගනුදෙනුවක් සිදු කරන බවට අනාවරණය වී ඇත.
සැකකරු නි‍ෙවසට මාසිකව රුපියල් 50,000ක් සහ මෝටර් රථයට මාසිකව රුපියල් 60,000ක් ගෙවන බවට ද වැඩිදුරටත් අනාවරණය වී යැයි පොලිසිය පවසයි.
අත්අඩංගුවට ගත් සැකකරු බණ්ඩාරගම වල්ගම පදිංචි 42 හැවිරිදි පුද්ගලයෙකි.
සැකකරු පාණදුර මහේස්ත්‍රාත් අධිකරණය වෙත ඉදිරිපත් කිරීමට නියමිතය.
බණ්ඩාරගම - බිමල් ජයසිංහ
0 Comments