වයස අවුරුදු 14ක් හා මාස 06ක් වියැති බාලවයස්කාර දැරියක් දූෂණය කිරීම සම්බන්ධයෙන් දැරියගේ ඥාති මාමා කෙනකු පෙරේදා (27) අත්අඩංගුවට ගත් බව හබරාදුව පොලිසිය පවසයි.
අත්අඩංගුවට ගෙන ඇත්තේ වංචාවල, දිවුලාන ප්‍රදේශයේ පදිංචි 27 හැවිරිදි හෝටල් සේවකයෙකි. දැරිය දිය නා තුවායක් ඇඳ නිවස තුළට පැමිණ ඇඳුම් ඇඳීමට සූදානම් වෙමින් සිටියදී, සැකකරු නිවස තුළදී දැරිය දූෂණය කොට ඇති බව පොලිසිය පවසයි. සැකකරු විසින් මේ පිළිබඳ කිසිවකුටත් නොකියන ලෙස දැරියට තර්ජනය කොට ඇති බවද පොලිසිය විසින් කරනු ලැබූ විමර්ශනවලදී අනාවරණය වී තිබේ.
මෙම සිද්ධිය වන අවස්ථාවේ නිවෙසේ කිසිවකු සිට නොමැති අතර, දැරිය උපකාරක පංතියකට යාම සඳහා දිය නා නිවෙස තුළට පැමිණ ඇඳුම් මාරු කරමින් සිටියදී මෙලෙස අතවරයට ලක්ව ඇත.
මෙම සිද්ධිය සිදු වී දින 04කට පමණ පසුව දැරිය මව සමඟ පැමිණ හබරාදුව පොලිසියට පැමිණිලි කොට ඇත. සැකකරු ඊයේ (28) අධිකරණය වෙත ඉදිරිපත් කිරීමට නියමිතව තිබුණි. හබරාදුව පොලිස් ස්ථානාධිපති, ප්‍රධාන පොලිස් පරීක්ෂක දුණුවිල බණ්ඩාර මහතාගේ අධීක්ෂණය යටතේ හබරාදූව පොලිසියේ ළමා හා කාන්තා කාර්යාංශයේ කාන්තා උප පොලිස් පරීක්ෂක අබේසුන්දර මහත්මිය විසින් මෙම සිද්ධිය පිළිබඳ පරීක්ෂණ පවත්වයි.
දික්වැල්ලේ තිලකරත්න
0 Comments