මාලිගාවත්ත ලක්සිත සෙවන මහල් නිවාස සංකීර්ණයේ 11 වැනි මහලේ විදුලි සෝපානයේ කුහරය තුළ සිට බිම් මහලේ විදුලි සෝපානය මතට ඇද වැටීමෙන් පුද්ගලයකු මියගොස් ඇතැයි මාලිගාවත්ත පොලිසිය කියයි.සිද්ධියෙන් මියගොස් ඇත්තේ කොළඹ 10 මාලිගාවත්ත, ලක්සිත සෙවණ මහල් නිවාස සංකීර්ණයේ තාවකාලිකව පදිංචිව සිට කුලී වැඩවල නිරත මොහොමඩ් නජිම් මොහොමඩ් ඉර්ෂාඩ් (36) නමැත්තෙකි.
මියගිය තැනැත්තා ඔහු තාවකාලිකව පදිංචිව සිටින ඥාතියාගේ නිවසට පැමිණෙමින් සිටියදී නිවාස සංකීර්ණයේ බිම් මහලේ පවිත්‍රතා කටයුතු සිදුකරන මියගිය අයගේ හිතවතෙකු මුණගැසී ඇති අතර මහල් නිවාස සංකීර්ණයේ නිවෙස්වල අපද්‍රව්‍ය රැගෙන ඒමට භාවිත කරනු ලබන විදුලි සෝපානය අක්‍රිය වී ඇති බව මියගිය තැනැත්තාට පවසා තිබූ බව පොලිසිය කීය.මියගිය තැනැත්තා එම කාර්මික දෝෂය පරීක්ෂා කිරීමට නිවාස සංකීර්ණයේ 11වැනි මහලට ගොස් එම විදුලි සෝපානය පරික්ෂා කිරිම සඳහා අක්‍රිය තත්වයක් ඇති වූ විට විදුලි සෝපානයේ දොර විවෘත කිරීම සඳහා භාවිත කරනු ලබන යතුර උපයෝගී කර ගනිමින් විදුලි සෝපාන දොර විවෘත කිරීමෙන් අනතුරුව විදුලි සෝපානය එකොළොස්වන මහලේ නැවතී ඇතැයි සිතා එයට ඇතුළු වීමට තැත් කිරීමේදී සෝපාන කුහරයෙන් බිම් මහලේ නැවතී තිබූ විදුලි සෝපානය මතට වැටී බරපතළ තුවාල ලබා ඇති බව පොලිස් විමර්ශනවලදී අනාවරණය වී තිබිණි.
වහා ක්‍රියාත්මක වූ මියගිය තැනැත්තාගේ මිතුරා ඇතුළු නිවාස සංකීර්ණයේ පදිංචිකරුවන් තුවාල ලබා සිටි පුද්ගලයා කොළඹ ජාතික රෝහලට රැගෙන ගොස් තිබූ අතර මූලික ප්‍රතිකාර ඒකකයේදී වෛද්‍යවරුන් පරීක්ෂා කර බලා ඔහු මිය ගොස් ඇති බවට දැනුම් දී තිබූ බව පොලිසිය කීය.මියගිය පුද්ගලයා සමග එම අවස්ථාවේ රැඳී සිටි ඔහුගේ මිතුරා සහ සෝපානයේ යතුර භාරව සිටි පුද්ගලයාගෙන් ප්‍රකාශ සටහන් කරගෙන ඉදිරි විමර්ශන කටයුතු සිදුකරන බව පොලිස් නිලධාරියෙක් පැවසීය. මියගිය පුද්ගලයාගේ පශ්චාත් මරණ පරීක්ෂණය පෙරේදා (26) සිදු කිරීමට නියමිතව තිබිණි.
බිමල් ශ්‍යාමන් ජයසිංහ
0 Comments