කොළඹ ප්‍රධාන මහේස්ත්‍රාත් අධිකරණයේ නඩු භාණ්ඩ කාමරයේ තිබූ විස්කි බෝතල් තොගයක් අතුරුදන්වීමේ සිද්ධියක් සම්බන්ධයෙන් ලද පැමිණිල්ලකට අදාළව විමර්ශනයක් ආරම්භ කළ බව කොළඹ අපරාධ කොට්ඨාසය කොළඹ ප්‍රධාන මහේස්ත්‍රාත් ප්‍රසන්න අල්විස් මහතා ඉදිරියේ ඊයේ (22) කරුණු වාර්තා කළේය.
මෙම සිද්ධිය සම්බන්ධයෙන් කොළඹ අපරාධ කොට්ඨාසයට පැමිණිල්ලක් ඉදිරිපත් කරනු ලැබ තිබුණේ කොළඹ මහේස්ත්‍රාත් අධිකරණයේ නඩු භාණ්ඩ කාමරයේ භාරකරු සංජීවනී ඉනෝකා පණ්ඩිතරත්න මහත්මිය විසින් ඉකුත් වසරේ ඔක්තෝබර් මස 10 වැනිදාය. සුරාබදු දෙපාර්තමේන්තුව මඟින් ඉකුත් 2015 වර්ෂයේ රේගුවෙන් අත්අඩංගුවට ගත් මෙම විස්කි බෝතල් තොගය නඩු භාණ්ඩ වශයෙන් කොළඹ මහේස්ත්‍රාත් අධිකරණයේ අංක 05 අධිකරණයේ නඩු අංක බී 33409/05/15 යටතේ ඉදිරිපත් කර ඇති අතර, එම විස්කි බෝතල් තොගයෙන් කොටසක් අතුරුදන්ව ඇතැයි සඳහන් කරමින් මෙම පැමිණිල්ල ඉදිරිපත් කර ඇතැයි කොළඹ අපරාධ කොට්ඨාසය අධිකරණයට කරුණු ඉදිරිපත් කර තිබේ. ඒ අනුව, නඩු භාණ්ඩ වශයෙන් තිබී අතුරුදන් වූ එම බෝතල් තොගය සම්බන්ධයෙන් මෙම විමර්ශනය ආරම්භ කළ බවත් සිද්ධිය පිළිබඳව කොළඹ මහේස්ත්‍රාත් අධිකරණයේ නඩු භාණ්ඩ භාරකරු ඇතුළු නිලධාරීන්ගෙන් ප්‍රකාශ සටහන් කර ගත යුතුව ඇති බවත් කොළඹ අපරාධ කොට්ඨාසය අධිකරණයට කරුණු වාර්තා කර ඇත. අදාළ ප්‍රකාශ ලබා ගැනීමෙන් පසු විමර්ශන පවත්වා අධිකරණයට කරුණු වාර්තා කරන තෙක් නඩුව බහා තබන ලෙසට මෙහිදී කොළඹ අපරාධ කොට්ඨාසය අධිකරණයෙන් ඉල්ලීය.
ඉදිරිපත් වූ කරුණු සැලකිල්ලට ගත් අධිකරණය සිද්ධිය සම්බන්ධයෙන් විමර්ශන පවත්වා සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසට කොළඹ අපරාධ කොට්ඨාසයට නියෝග කරමින් නඩුව බහා තැබීය. මෙම සිද්ධියට අදාළව අධිකරණයට කරුණු ඉදිරිපත් කරනු ලැබ තිබුණේ කොළඹ අපරාධ කොට්ඨාසයේ විශේෂ විමර්ශන ඒකක 01 ස්ථානාධිපති පොලිස් පරීක්ෂක නිශාන්ත සිල්වා මහතා විසිනි.
නිමන්ති රණසිංහ
0 Comments