අගමැතිකමින් නෙරපුණ පසු ඉම්රාන්ගේ පරණ ගැහිලි ටික ටික එළියට

සාදික් සහ අමීන් යන උර්දු යෙදුමකින් (සත්‍යවාදී සහ අවංක) ලෙස තමන්ව හඳුන්වාගත් පකිස්ථානයේ හිටපු අගමැති ඉම්රාන් ඛාන්ගේ දූෂණ රහස්  ගණනාවක් එරට මාධ්‍ය ඔස්සේ දැන් එළියට එමින් පවතී. 

කෝටි 40ක පමණ තෑගි රජයේ භාණ්ඩාගාරයට විකුණූ ඉම්රාන් ඇතුළු සමීපතමයන් අත් දෙකෙන්ම ජනතාවගේ බදු මුදල් කොල්ල කෑ බව එක් වාර්තාවක දැක්වේ. වාර්තාවකට අනුව, පාර්ලිමේන්තු කථානායක අසාද් කයිසර්, ඉම්රාන්ගේ අනුමැතිය ඇතිව, විශ්‍රාම යායුතු වයසේ 72 හැවිරිදි පුද්ගලයෙකුට පකිස්ථාන රුපියල් ලක්ෂ 19ක  විශාල වේතනයකට රජයේ රැකියාවක් ලබා දුන් හැටි හෙළි කර තිබේ.

වාර්තා අනුව අසාද් කයිසර් කථානායකවරයාව සිටියදී පාර්ලිමේන්තු මහලේකම් කාර්යාලයේ එවැනි රැකියා 200 කට වැඩි පිරිසකට ලබා දුන්නේය. මේවා නිසා රටේ මහා භාණ්ඩාගාරයට මාසිකව රුපියල් කෝටි ගණනක පාඩුවක් සිදුව ඇත‍.
තවත් වාර්තාවකට අනුව, ඉම්රාන්ගේ සමීප ඇමති ජර්ටාජ් ගුල් ඔහුගේ මුළු පවුලම සහ බොහෝ සමීප ඥාතීන් පන්ජාබ් සහ මධ්‍යම රජයේ වැදගත් තනතුරුවලට පත් කළේය. ජර්ටාජ්ගේ සහෝදරියත් කාන්තා සම්බන්ධ දෙපාර්තමේන්තුවේ අධ්‍යක්ෂක කර ඇත. මේ සියලු දෙනා තවමත් මේ දෙපාර්තමේන්තුවල සේවය කරන අතර විශාල වැටුපටද හිමිකම් ලබති. දැන් මේ හැමෝගෙම නම් එළියට ඇවිත් පරීක්‍ෂණ සිදුවේ.
මීට අමතරව, ඉම්රාන් 2019 දී රුපියල් කෝටි 56 (පකිස්ථාන මුදල්) වියදමින් විශ්ව විද්‍යාලයක් ඉදි කළේය. සිත්ගන්නා කරුණ නම් එහි භාරකරු ඔහුගේ බිරිඳ බුෂ්රා බීබී වන අතර මෙම විශ්ව විද්‍යාලයේ සිටින්නේ සිසුන් 37 දෙනෙකු පමණි.

අල් කදීර් විශ්වවිද්‍යාලය පිහිටුවන ලද්දේ ඉම්රාන්ගේ මූලිකත්වයෙනි. ‘ද නිවුස්’ පුවත්පතේ වාර්තාවකට අනුව මෙම විශ්වවිද්‍යාලය සඳහා ඉඩම පරිත්‍යාග ලෙස ලැබුණකි. ඉදිකිරීම් සඳහා මුදල් ලැබුණේ ද පරිත්‍යාග වලින් ය. එසේ තිබියදීත්, රුපියල් කෝටි 56 ක් මහා භාණ්ඩාගාරයෙන් ඉවත් කර ගන්නා ලදී.

අල්-කදර් විශ්වවිද්‍යාලය ඉම්රාන් ඛාන්ගේ සිහින ව්‍යාපෘතිය විය.  නමුත් මෙම විශ්වවිද්‍යාලය සම්බන්ධයෙන් ඉම්රාන් සහ ඔහුගේ සමීප මිතුරන්ගේ විමර්ශනය ආරම්භ වී තිබෙයි.

විශේෂත්වය වන්නේ ඉම්රාන්ගේ තෙවැනි බිරිඳ වන බුෂ්රා බිබී මනේකාගේ නමද භාරකරුවන්ට ඇතුළත්ව තිබීමයි. මීට අමතරව ඉම්රාන්ගේ මිතුරන් දෙදෙනෙකු සහ ඔහුගේ රජයේ අමාත්‍යවරුන් වන සුල්ෆි බුහාරි සහ බාබර් අවාන් ද පුවරුවේ සිටියහ. බුෂ්රාගේ සමීප මිතුරිය වන ෆාරා ඛාන් නොහොත් ෆර්හාත් ෂෙසාඩි ද අධ්‍යක්ෂ මණ්ඩල සාමාජිකයින් අතර සිටී. 2019 වසරේ මෙතරම් වියදමක් දරා ආරම්භ වූ මෙම විශ්වවිද්‍යාලයේ සිටින්නේ සිසුන් 37ක් පමණි. දැන් එහි විමර්ශනය ද ආරම්භ වී තිබේ.
පකිස්ථාන හිටපු අගමැති ඉම්රාන් ඛාන්ගේ රජයේ ප්‍රමුඛ සාමාජිකයින්, ඔහුගේ පක්ෂයට පරිත්‍යාග කරන්නන් සහ රටේ බලවත් හමුදා ජෙනරාල්වරුන්ගේ පවුලේ සාමාජිකයින් අක්වෙරළ සමාගම් හරහා ඩොලර් මිලියන ගණනක ධනය ගෙන ගොස් ඇති බව ජාත්‍යන්තර ගවේෂණාත්මක මාධ්‍යවේදීන්ගේ සංගමය (ICIJ) විසින් පසුගිය ඔක්තෝබර් මාසයේ ‘පැන්ඩෝරා පේපර්ස් ‘ ඔස්සේද හෙළිදරව් කර තිබුණි.

ඛාන්ගේ කැබිනට් මණ්ඩලයේ සාමාජිකයින් දෙදෙනෙකු - ජල සම්පත් අමාත්‍ය මූනිස් එලාහි සහ මුදල් අමාත්‍ය ෂෞකට් ටරින් - කාන්දුවීම්වල ප්‍රමුඛ වූ අතර, ඛාන්ගේ පකිස්තාන් ටෙහ්රීක්-ඊ-ට පරිත්‍යාග කළ ඉහළ පෙළේ හමුදා නිලධාරීන් කිහිප දෙනෙකුගේ පවුල්වල සාමාජිකයින් ඇතුළු අය ඉම්රාන්ගේ රහසිගත දැනුවත්කම අනුව මේවා සිදු කර ඇති බවට අනාවරණය විය.