ආච්චි අම්මා බාරයේ සිටි අවුරුදු 15යි මාස 9ක් වයසැති දැරියකට අතවර කළ ආච්චි අම්මාගේ 60 හැවිරිදි අනියම් සැමියා ලබන 2 වැනිදා දක්වා රිමාන්ඩ් බාරයේ තබන ලෙසට ගම්පහ අතිරේ මහේස්ත්‍රාත් ආර්.එස්.එම්. මහේන්ද්‍ර රාජා මහතා පෙරේදා (25 වැනිදා) නියම කළේය. වැලිවේරිය පදිංචි හත්මුනිගේ ආනන්ද සිල්වා නමැති සැකකරු මෙසේ රිමාන්ඩ් බාරයට පත් කරනු ලැබීය. දැරියගේ මව පවුල හැර ගොස් ඇති බවත්, පියා බන්ධනාගාරගතව සිටින බවත් වැලිවේරිය පොලිසිය පවසයි. 

අච්චාරු වෙළෙඳාමේ නිරත ආච්චි නිවෙසින් බැහැරව සිටින අවස්ථාවේ අරක්කු රැගෙන නිවෙසට පැමිණ ඇති සැකකරු දැරියට බලෙන් අරක්කු පොවා අතවර කර ඇති බවත්, ඉකුත් පෙබරවාරි මාසයේ පටන් සැකකරු දැරිය බිය ගන්වා මෙසේ අතවර සිදුකර ඇති බවත් පරීක්ෂණවලදී අනාවරණය වී ඇතැයි  වැලිවේරිය පොලිසියේ උපපොලිස් පරික්ෂක ජයලත් මහතා පැමිණිල්ල මෙහෙයවමින් අධිකරණය හමුවේ පැවැසීය.  වින්දිත දැරිය, විවාහ වී සිටින තම සොහොයුරියට පැවැසීමෙන් පසු සිද්ධිය අනාවරණය වී ඇති බව අධිකරණයේදී සඳහන් විය.


 -ටෝනි කරුණානායක--