සිර දඬුවම් විඳින රන්ජන් රාමනායක මන්ත්‍රීවරයාට උසාවියෙන් නියෝගයක් හෝ නීතිපතිවරයාගෙන් අවසරයක් ලැබෙන්නේ නම් පාර්ලිමේන්තු රැස්වීම්වලට සහභාගි වීමට හැකියාව ඇතැයි කතානායක මහින්ද යාපා  අබේවර්ධන මහතා මාකඳුරේදී ඉකුත්දා (15) පැවැසීය.    මාකඳුර ශ්‍රී සිවිසුද්ධාරාම විහාරස්ථානයේ පැරැණි බුදු මැදුරෙහි ඉදිකිරීම් කටයුතු නිරීක්ෂණය කිරීමෙන් අනතුරුව මාධ්‍යවේදීන් නැගු ප්‍රශ්නයකට පිළිතුරු දෙමින් කතානායකවරයා එසේ කීය.  මහින්ද යාපා අබේවර්ධන මහතා මෙසේ ද කීවේය.


මහජන ඡන්දයෙන් පත් වූ මන්ත්‍රීවරයකුට පාර්ලිමේන්තුව නියෝජනය කිරීමේ අයිතිවාසිකම තිබෙනවා.
නමුත් අධිකරණයෙන් වරදකරු වී දඬුවම් විඳිනවා නම් පාර්ලිමේන්තු රැස්වීම්වලට සහභාගි වීම  සඳහා උසාවියෙන් හෝ ඇටෝරිනි ජනරාල්වරයාගේ අවසරය ලැබිය යුතුයි.  ප්‍රේමලාල් ජයසේකර මන්ත්‍රීවරයාත් පාර්ලිමේන්තුවට ආවේ උසාවි ගිහින් බලපත්‍රයක් අරගෙනයි. ඒ නිසා රන්ජන් රාමනායක මන්ත්‍රීවරයාටත් කැමැති නම් එසේ අවසරයක් ලබාගන්න පුළුවන්. ඒකට අපේ බලපෑමක් නැහැ. පසුගියදා පාර්ලිමේන්තු මන්ත්‍රීවරුන් එකොළොස් දෙනකුගේ පී.සී.ආර්. පරීක්ෂණ කටයුතු සිදුකළා. මාත් ඇතුළුව ඒ කාටවත් කොරෝනා වයිරසය ආසාදනය වී තිබුණේ නැහැයි කියලා ඒ වාර්තාවේ දක්වා තිබුණා.


එමෙන්ම අවශ්‍ය ඕනෑම කෙනකුට පී.සී.ආර්. පරික්ෂණ කරගැනීම සඳහා පාර්ලිමේන්තුවේ කටයුතු සලස්වා තිබෙනවා.  පවතින තත්වය අනුව පාර්ලිමේන්තුව පවත්වාගෙන යාම සඳහා මන්ත්‍රීවරුන් තීන්දු කරනවා නම් ඒකට කිසිම බාධාවක් නැහැ යැයි ද මහින්ද යාපා අබේවර්ධන මහතා එහිදී  වැඩිදුරටත් කීය.


 -කේ. අජිත්-