රතිඤ්ඤා පත්තු කරමින් බීමතින් හෝමාගම මූලික රෝහලේ ප්‍රධාන ගේට්ටුව අභියස කලහකාරීව හැසිරුණු දෙදෙනකු ඉකුත් 24 වැනි රාත්‍රී අත්අඩංගුවට ගත් බව  හෝමාගම පොලිසිය පවසයි.
මෙසේ අන්දඅඩංගුවට ගෙන ඇත්තේ හෝමාගම මූලික රෝහලේ ප්‍රධාන ගේට්ටුව අසල ත්‍රිරෝද රථ ගාලේ රියදුරකු සහ ඔහුගේ මිතුරෙකු බව පොලීසිය කියයි. මොවුන් දෙදෙනා 24 වැනිදා රාත්‍රී රෝහලේ ප්‍රධාන ගේට්ටුව අසලට බීමතින් පැමිණ රෝහලේ පාලනාධිකාරියට පරුෂ වචනයෙන් බැන වදිමින් එහි සේවා කටයුතුවලට බාධා වන අයුරින් රතිඤ්ඤා දල්වමින් කලහකාරීව හැසිරී ඇතැයි පොලිසිය පවසයි.


මේ පිළිබඳව ලද තොරතුරක් අනුව වහාම පොලිස් නිලධාරීන් එම ස්ථානයට ගොස් ඇති අතර ඒ බව දැනගත් එක් සැකකරුවකු ත්‍රීරෝද රථයකින් පලා ගොස් ඇති අතර පසුව ත්‍රීරෝද රථය සහ පලා ගිය සැකකරු අත්අඩංගුවට ගත් බව පොලිසිය කියයි. අත්අඩංගුවට ගත් හෝමාගම ප්‍රදේශයේ පදිංචි සැකකරුවන් හෝමාගම අධිකරණයට ඉදිරිපත් කිරීමට නියමිතය. සිද්ධිය සම්බන්ධයෙන් හෝමාගම මූලස්ථාන පොලිසියේ ස්ථානාධිපති ප්‍රධාන පොලිස් පරික්ෂක ප්‍රේමලාල් මහතාගේ උපදෙස් මත නිලධාරීහු පරීක්ෂණ පවත්වති.


- ශාන්ත ප්‍රදීප් කුමාර කුලරත්න-