වෑබඩ ප්‍රදේශයේ නිවෙසක ඉතා රහසිගතව පවත්වාගෙන ගොස් ඇති මෙම ව්‍යාජ මුදල් නෝට්ටු ජාවාරමට අදාළ ප්‍රධාන සැකකරු පරිගණක සහ ජංගම දුරකතන අලුත්වැඩියා කරන්නකු බවත් ඔහු වෑබඩ ප්‍රදේශයේ පදිංචි වයස අවුරුදු 29ක අවිවාහකයකු වන ඔහු තදින්ම හෙරොයින් මත්ද්‍රව්‍යට ඇබ්බැහි වූවකු බවත් පොලිසිය කියයි .
දෙල්ගොඩ ගොළුම්මහර ප්‍රදේශයේ බුරුපිටියක බුරු ගසා ජය ගත් පුද්ගලයකු මීට මාස කිහිපයකට පෙර දෙල්ගොඩ නගරයේ වාණිජ බැංකුවක තැත්පත් කිරීමට රැගෙන ආ මුදල් නෝට්ටු අතර රුපියල් දහසේ ව්‍යාජ මුදල් නෝට්ටු තිබී හමු වීමෙන් පසු එම බැංකුවේ නිලධාරිනියක කළ දැනුම්දීම මත එම පුද්ගලයා මීගහවත්ත පොලිසිය විසින් අත්අඩංගුවට ගෙන ඇත.
පසුව මේ පිළිබඳව පොලිසිය විසින් දිර්ඝ වශයෙන් කළ විමර්ශනවලට අනුව වෑබඩ ප්‍රදේශයේ නිවෙසක ඉතා රහසිගතව පවත්වාගෙන ගිය මෙම ව්‍යාජ මුදල් නෝට්ටු ඡාවාරම හෙළිදරව් වී ඇත.මෙහීදී රුපියල් දහසේ ව්‍යාජ මුදල් නෝට්ටු 11ක් පරිගණකයක් ප්‍රින්ටරයක් ඇතුළු උපාංග පොලිසිය විසින් අත්අඩංගුවට ගෙන ඇත.
සැකකරුවෝ හොර මහේස්ත්‍රාත් අධිකරණය වෙත ඉදිරිපත් කිරීමට නියමිතව සිටියහ. මීගහවත්ත පොලිසියේ ස්ථානාධිපති ප්‍රධානෙ පොලිස් පරික්ෂක නිශාන්ත හේරත් මහතාගේ උපදෙස් මත අපරාධ අංශයේ ස්ථානාධිපති පොලිස් පරික්ෂක එල්.ඒ. විමලරත්න, පොලිස් සැරයන් (6015) අබේසිංහ, පොලිස් කොස්තාපල්වරුන් වන (88789) රාජපක්ෂ, (35434) සුමේද බස්නාහිර පළාත් බුද්ධි නිලධාරින් වන (8234) කුමාර, (69425) මහේෂ්, පොලිස් රියැදුරු (80914) සාරංග යන නිලධාරිහු මෙම වැටලීමට එක්වූහ.
(දෙල්ගොඩ - සුදත් පුබුදු කීර්ති)
