මෙලෙස අනතුරට ලක්වූයේ ගාල්ලේ සිට දක්ෂිණ අධිවේගී මාර්ගය ඔස්සේ කතරගම බලා යෑමට පෑමිණී තරුණයන් පිරිසක් රැගත් සුඛෝපභෝගී වෑන් රථයකි. අනතුරින් බරපතළ තුවාල ලැබූ වෑන් රථයේ රියැදුරු ඇතුළු තිදෙනකු ලුණුගම්වෙහෙර රෝහලට ඇතුළත් කිරිමෙන් අනතුරුව වැඩිදුර ප්‍රතිකාර සඳහා හම්බන්තොට මහ රෝහලට ඇතුළත් කර ඇතැයි ද පොලිසිය කියයි.
ඒ අතරිනුත් රියැදුරු හැර අනෙක් දෙදෙනාගේ තත්වය බරපතළ බවත් ඔවුන් හම්බන්තොට මහ රෝහලේ දැඩි සත්කාර ඒකකයේ ප්‍රතිකාර ලබන බවත් රෝහල් ප්‍රකාංශකයෙක් පැවසීය. අනතුර සිදුවන අවස්ථාව වන විට වෑන් රථයේ තරුණයන් නව දෙනකු පැමිණ ඇති අතර පිරිස අලුයම ගාල්ල ප්‍රදේශයේ මිතුරන් කිහිප දෙනකු සමග එකතු වී මේ වන්දනා ගමනට පැමීණෙ තිබේ. තරුණයන් පිරිස රැගත් වෑන් රථය දක්ෂිණ අධිවේගී මාර්ගය ඔස්සේ පැමිණ අලුයම 1.20ට පමණ අධිවේගී මාර්ගයේ මත්තල පිටවීමේ දොරටුවෙන් පිටවී මත්තල මාර්ගය ඔස්සේ කතරගම දෙසට ධාවනය කර ඇති බව පොලිසිය කල මූලික පරීක්‍ෂණවලින් අනාවරණය වී ඇත.
මත්තල පිටවීමේ දොරටුවෙන් පසු කිලෝ මීටර් 12ක් පමණ ගිය විට ඇති 22 හන්දියේදී හමුවන තණමල්විල මාතර ප්‍රධාන මාර්ගයෙන් කතරගම දෙසට යන්නට දකුණට හැරවිය යුතු අතර වෑන් රථය එකවරම මෙම ටී හන්දියෙන් හැරවීමට යාමේ දී මාර්ගයෙන් ඉවතට පැන අසල තිබූ විශාල පළු ගසක වැදී අනතුරට පත්වන්නට ඇතැයි පොලිසිය කියයි. අනතුර සිදුවන විට වෑන් රථයේ වේග මීටරය 120 ලෙස සටහන්ව ඇති අතර එකවර ටී හන්දියෙන් වෑන් රථය හරවා ගැනීමට නොහැකි වීමෙන් මෙම අනතුර සිදුවී ඇති බව මූලික පොලිස් පරික්‍ෂණවලදී අනාවරණය විය.
-දීලිප් ජයසේකර-
