අර්බුදයට විසඳුමක් ලබාගැනීම සඳහා පක්ෂ මන්ත්‍රී කණ්ඩායම ඊයේ සවස සිරිකොත පක්ෂ මූලස්ථානයට රැස්විය. එම කණ්ඩායම් රැස්වීම සඳහා මන්ත්‍රීවරුන් 65 දෙනකු සහභාගි වූ බවත්, ඉන් මන්ත්‍රීවරුන් පනස් දෙදෙනකු සජිත් ප්‍රේමදාස මහතා නායකත්වයට පත්කර ගත යුතු බවට කැමැත්ත පළ කළ බවත් රංජිත් මද්දුමබණ්ඩාර මහතා සඳහන් කළේය.
බහුතර මතයට ගරු කර ව්‍යවස්ථානුකූලව අවශ්‍ය කටයුතු කිරිම සඳහා පක්ෂ කෘත්‍යාධිකාරි මණ්ඩලය සහ පක්ෂ සම්මේලනය කැඳවන ලෙස ඉල්ලා සිටින බව ද මන්ත්‍රීවරයා සඳහන් කළේය. පක්ෂයේ සමගිය ආරක්ෂා කරගෙන ඉදිරි කටයුතු කරන්නට බලාපොරොත්තු වන බවත්, කරු ජයසුරිය මහතාගේ හා රනිල් වික්රමසිංහ මහතාගේ උපදේශකත්වය ඇතිව සජිත් ප්‍රේමදාස මහතාගේ පක්ෂ නායකත්වය හා අගමැති අපේක්ෂකත්වයන් ඉදිරි මැතිවරණයට තරග කරන බවත් රංජිත් මද්දුම බණ්ඩාර මහතා කීය. මෙහිදී අදහස් දැක්වූ එක්සත් ජාතික පක්ෂ පාර්ලිමේන්තු මන්ත්‍රී හරීන් ප්‍රනාන්දු මහතා කීවේ,
නායකත්වය තෝරා පත් කර ගැනීම සඳහා මත විමසුමක් තබන ලෙස ඉල්ලා සිටියද ඊට ප්‍රතිචාරයක් නොලැබුණු හෙයින් රංජිත් මද්දුම බණ්ඩාර මහතා විසින් සජිත් ප්‍රේමදාස මහතාගේ නම පක්ෂ නායකත්වය සඳහා යෝජනා කරන ලද බවය. තමා ඒ යෝජනාව ස්ථිර කළ බවත්, ඒ අනුව අද (17) සිට ඉදිරි සංධානයේ වැඩකටයුතු අරඹන බවත් හරීන් ප්‍රනාන්දු මහතා කීය.පක්ෂය කුමන තීරණයක් ගන්නවාද කියන කාරණයට වඩා බහුතර මතය අනුව සජිත් ප්‍රේමදාස පක්ෂ නායක ලෙසත්, ඉදිරි මැතිවරණයේ අගමැති අපේක්ෂක සහ පක්ෂයේ නායක ලෙසත් පත් කර ගැනීමට යෝජනා වූ බවත්, ඒ අනුව ඉදිරියේදී ව්‍යවස්ථානුකූලව ඉදිරියට යන්නට තීරණය කළ බවත් හරින් ප්‍රනාන්දු මහතා සඳහන් කළේය.
පක්ෂ නායකයා ලෙස සජිත් ප්‍රේමදාස මහතාගේ නම යෝජනා කළැයි කියන කතාව පක්ෂ ව්‍යස්ථාවට පටහැනි බව කී මහා ලේකම්වරයා, අදාළ තීරණය ගන්නා අවස්ථාවේ පක්ෂ නායක හෝ මහ ලේකම් හෝ වගකිවයුතු තනතුරක් දරන කෙනකු එහි නොසිටි බව ද සඳහන් කළේය. එවැනි මත විමසුමක් සඳහා මන්ත්‍රී කණ්ඩායමේ සූදානමක් නොතිබූ බවත්, ඇතැම් මන්ත්‍රීවරුන් මෙදින රැස්වීමට නොපැමිණි බවත් මහ ලේකම්වරයා සඳහන් කළේය.මන්ත්‍රී කණ්ඩායම් රැස්වීම අවසන් කොට පක්ෂ නායකයා නිල කාමරයෙන් පිටව ගිය පසු අදාළ මත විසුම් කර ඇති බව දැනගන්නට තිබෙන බවද, පක්ෂ මහ ලේකම් අකිල විරාජ් කාරියවසම් මහතා පැවසීය.
එක්සත් ජාතික පක්ෂයේ මන්ත්‍රී කණ්ඩායම් රෑස්වීම ඊයේ (16) පස්වරු 5ට පමණ පක්ෂ නායක රනිල් වික්රමසිංහ මහතාගේ ප්‍රාධානත්වයෙන් සිරිකොත පක්ෂ මූලස්ථානයේ දී රැස්විය.
නායකත්ව මණ්ඩලයක් පිළිබඳව මෙහිදී මන්ත්‍රී පිරිසක් යෝජනා ඉදිරිපත් කර ඇති අතර, සජිත් ප්‍රේමදාස මහතාට හිතවත් මන්ත්‍රී පිරිසක් ඊට එරෙහිව අදහස් පළ කිරීමත් සමග මන්ත්‍රී කණ්ඩායම අතර උණුසුම් තත්ත්වයක් ඇතිවී තිබේ. පැය කීපයක් වාද විවාද කෙරෙමින් මන්ත්‍රී කණ්ඩායමේ අවසන් එකඟතාවක් නොමැති වූ බැවින් පක්ෂ නායක රනිල් වික්රමසිංහ මහතා සිරිකොත පක්ෂ මූලස්ථානයේ නිල කාමරයට ගොස් තිබේ. පසුව මන්ත්‍රී කණ්ඩායම පක්ෂ නායකත්වය පිළිබඳ මත විමසුම පවත්වා ඇත. එක්සත් ජාතික පක්ෂයේ මන්ත්‍රී කණ්ඩායම් රැස්වීම වාද විවාද මැද පැය පහක් පමණ සිරිකොත පක්ෂ මූලස්ථානයේ දී පැවැත්විණි.
-අංජුල මහීක වීරරත්න-
