ඇපල් සමාගමේ මීළඟ ප්‍රවේශ මට්ටමේ (entry-level) ස්මාර්ට් ජංගම දුරකථනය ලෙස සැලකෙන iPhone 18e පිළිබඳව මේ දිනවල තාක්ෂණික ලෝකයේ නව කතාබහක් නිර්මාණය වී තිබේ. Weibo සමාජ මාධ්‍ය ජාලයේ Digital Chat Station නමැති තොරතුරු හෙළිකරන්නා විසින් නිකුත් කරන ලද නවතම සටහනක් සහ 9to5Mac වාර්තාවන්ට අනුව, මෙම නව දුරකථනය ඇපල් සමාගමේ නවතම 2nm තාක්ෂණයෙන් නිපදවූ A20 චිපයෙන් බලගැන්වෙනු ඇතැයි අපේක්ෂා කෙරේ.
මින් පෙර A20 චිපය පිළිබඳව සාකච්ඡා වූයේ ප්‍රෝ (Pro) මාදිලියේ දුරකථන සම්බන්ධයෙන් පමණක් වීම මෙහි ඇති විශේෂත්වයයි.මෙම කාන්දු වූ තොරතුරු සත්‍ය වුවහොත්, එය පෙර මාදිලිය වූ iPhone 17e දුරකථනයට වඩා කැපී පෙනෙන ඉදිරි පිම්මක් වනු ඇත. iPhone 17e මාදිලිය සමන්විත වූයේ 3nm තාක්ෂණයෙන් යුත් A19 චිපයකිනි. නව 2nm A20 චිපය හරහා දුරකථනයේ ක්‍රියාකාරීත්වය මෙන්ම බලශක්ති කාර්යක්ෂමතාව ද ඉහළ නැංවෙනු ඇතැයි විශ්වාස කෙරේ. කෙසේ වෙතත්, iPhone 18e සඳහා යොදාගන්නේ ප්‍රෝ මාදිලිවල භාවිත වන A20 චිපයම ද, නැතහොත් එහි වෙනස්කම් සහිත සංස්කරණයක් ද යන්න මෙතෙක් තහවුරු වී නොමැත. දුරකථනයේ සැබෑම ක්‍රියාකාරීත්වය නිශ්චිතවම දැනගත හැකි වන්නේ එය නිල වශයෙන් වෙළඳපොළට නිකුත් කර සිදුකරන පරීක්ෂණවලින් පසුව පමණි.
කැමරා පද්ධතිය සම්බන්ධයෙන් ද නව වෙනස්කම් කිහිපයක් අපේක්ෂා කළ හැකිය. වාර්තාවලට අනුව, iPhone 18e හි පසුපස කැමරාව මෙගාපික්සල් 48ක තනි කාචයකින් සමන්විත වීමට නියමිත අතර, සෙල්ෆි සහ වීඩියෝ ඇමතුම් සඳහා ඉදිරිපසින් මෙගාපික්සල් 24ක කැමරාවක් ලැබෙනු ඇතැයි අනුමාන කෙරේ. මෙම ඉදිරිපස කැමරාව යාවත්කාලීන කිරීම හරහා පරිශීලකයන්ට වඩාත් ගුණාත්මක සෙල්ෆි සහ වීඩියෝ ඇමතුම් අත්දැකීමක් ලබා ගැනීමට අවස්ථාව උදා වනු ඇත.
අභ්‍යන්තර උපාංග මෙලෙස යාවත්කාලීන වුවද, සංදර්ශකය (display) සම්බන්ධයෙන් ඇපල් සමාගම සිය පැරණි සීමාවන් තුළම රැඳී සිටින බවක් පෙනෙන්නට තිබේ. iPhone 18e දුරකථනය ද අඟල් 6.12ක OLED තිරයකින් සහ 60Hz Refresh Rate අගයකින් සමන්විත වනු ඇතැයි වාර්තා වේ. වර්තමානය වන විට බොහෝ මධ්‍යම මට්ටමේ ස්මාර්ට් දුරකථන පවා 90Hz හෝ 120Hz තිර ලබා දෙන පසුබිමක, පෙර පැවති iPhone 17e මාදිලියට බොහෝ සෙයින් සමාන වන මෙම 60Hz තිරය භාවිත කිරීම ඇතැම් මිලදී ගන්නන්ගේ බලාපොරොත්තු කඩ කිරීමට හේතු විය හැකිය.
මෙම දුරකථනයේ මිල සම්බන්ධයෙන් කියැවෙන්නේ අලුත්ම 18 මාදිලියේ එන දුරකථන වලින් අඩුම එක මෙය වනු ඇති බවයි. මෑත මාස කිහිපය තුළ ස්මාර්ට් දුරකථන මතක ධාරිතාවන් (memory) ඇතුළු අනෙකුත් ඉලෙක්ට්‍රොනික උපාංග නිෂ්පාදන පිරිවැය ඉහළ යාම හේතුවෙන්, ඇපල් සමාගම නව දුරකථනයේ මිල පෙර පැවති මට්ටමේම පවත්වා ගනීවිද නැතහොත් මිල වැඩි කිරීමක් සිදු කරාවිද යන්න පිළිබඳව අවධානය යොමු වී තිබේ.
වාර්තාවන්ට අනුව, සම්මත iPhone 18 සහ දෙවන පරම්පරාවේ iPhone Air මාදිලි සමඟින්, iPhone 18e දුරකථනය ද මාර්තු මාසය ආසන්නයේදී එළිදැක්වෙනු ඇතැයි අපේක්ෂා කෙරේ. එහෙත්, මෙම දුරකථනයේ විශේෂාංග, මිල හෝ නිකුත් කරන කාලරාමුව පිළිබඳව ඇපල් සමාගම මෙතෙක් කිසිදු නිල ප්‍රකාශයක් සිදු කර නොමැත.