ශ්‍රී ලංකාව සහ ඉන්දියාව අතර එළඹෙන දෙසැම්බර් 13 වැනිදා පැවැත්වීමට නියමිත පළමු එක්දින ක්‍රිකට් තරගය නවදිල්ලි නුවරින් ඉවත් කර විශාකාපට්නම් (Visakhapatnam) වෙත රැගෙන යාමට නිල වශයෙන් තීරණය වී තිබේ. මෙම වෙනස පිළිබඳව වාර්තා කර තිබූ ඉන්දීය මාධ්‍ය පෙන්වා දෙන්නේ, නවදිල්ලි නුවර අරුන් ජෙට්ලි ක්‍රීඩාංගණයේදී පැවැත්වීමට නියමිතව තිබූ මෙම ආරම්භක තරගය වෙනත් ක්‍රීඩාංගණයකට මාරු කිරීමට හේතු වී ඇත්තේ දිල්ලි සහ දිස්ත්‍රික් ක්‍රිකට් සංගමය (DDCA) විසින් ඉන්දීය ක්‍රිකට් පාලක මණ්ඩලයෙන් (BCCI) කරන ලද විශේෂ ඉල්ලීමකි.
නියමිත දිනයේදී එම තරගය පැවැත්වීමට නොහැකි බව දන්වා ඇති දිල්ලි සහ දිස්ත්‍රික් ක්‍රිකට් සංගමය, ඒ සඳහා හේතු දෙකක් මූලික කරගෙන තිබේ. අරුන් ජෙට්ලි ක්‍රීඩාංගණයේ මේ දිනවල සිදුවෙමින් පවතින ප්‍රතිසංස්කරණ කටයුතු එක් හේතුවක් වන අතර, අනෙක් ප්‍රධාන සාධකය වී ඇත්තේ දෙසැම්බර් මාසය තුළ නවදිල්ලි අගනුවර පවතින දැඩි වායු දූෂණ තත්ත්වයයි.
විශේෂයෙන්ම 2017 වසරේ දෙසැම්බර් මාසයේදී නවදිල්ලි නුවර පැවති ටෙස්ට් තරගයකදී, එහි පැවති අධික වායු දූෂණය හේතුවෙන් සංචාරක ශ්‍රී ලංකා ක්‍රීඩකයින් මුහුණ දුන් බරපතළ දුෂ්කරතා සහ අර්බුදකාරී තත්ත්වය නැවත වරක් ඇතිවීම වළක්වා ගැනීම දිල්ලි ක්‍රිකට් සංගමයේ ප්‍රධාන අරමුණක් වී තිබූ බව සඳහන් වේ. එම අතීත අත්දැකීම්ද සැලකිල්ලට ගනිමින් ඉදිරිපත් වූ ඉල්ලීමට අනුව, පළමු තරගය සම්පූර්ණයෙන්ම දිල්ලි නගරයෙන් ඉවතට ගෙන විශාකාපට්නම් වෙත ලබාදී ඇත.
කෙසේ වෙතත්, අයිපීඑල් (IPL) ක්‍රීඩක වෙන්දේසිය පැවැත්වෙන දිනයේදීම, එනම් දෙසැම්බර් 16 වැනිදා බැංගලෝර්හි පැවැත්වීමට නියමිත දෙවැනි එක්දින තරගයේ කිසිදු වෙනසක් සිදු කර නොමැත.
ඒ අනුව සංශෝධිත කාලසටහනට අනුව දෙරට අතර පළමු එක්දින තරගය දෙසැම්බර් 13 වැනිදා විශාකාපට්නම්හිදීත්, දෙවැනි තරගය දෙසැම්බර් 16 වැනිදා බැංගලෝර්හිදීත්, තුන්වැනි සහ අවසන් එක්දින තරගය දෙසැම්බර් 19 වැනිදා අහමදාබාද්හිදීත් පැවැත්වෙනු ඇත. ඉන් අනතුරුව පැවැත්වීමට නියමිත විස්සයි-විස්ස තරගාවලියේ තරග තුන රාජ්කොට් (Rajkot), කටැක් (Cuttack) සහ පූනේ (Pune) යන නගරවලදී පැවැත්වීමට සැලසුම් කර තිබේ.
