national-reading-month-special-awards-ceremony

මිනිස් සිතක සීමාවන් පුළුල් කරන, ජීවිත කාලය පුරාම ළඟින් හිඳින හොඳම මිතුරා පොතපත බව අමුතුවෙන් කිව යුතු නැත. "දිවි ඇති තුරු අකුරු මිතුරු" යන හරවත් තේමාව පෙරදැරිව, දැනුමෙන් පිරිපුන් සමාජයක් ගොඩනැගීමේ අරමුණින් මෙවරත් දීප ව්‍යාප්තව ක්‍රියාත්මක වූ ජාතික කියවීමේ මාසය වැඩසටහන් මාලාවේ සාර්ථකත්වය ඇගයෙන සුවිශේෂී සම්මාන ප්‍රදානෝත්සවයක් පසුගියදා අතිඋත්කර්ෂවත් අන්දමින් නිමාවට පත්විය.




වර්ෂ 2004 දී රජය විසින් ඔක්තෝබර් මාසය 'ජාතික කියවීමේ මාසය' ලෙස නිල වශයෙන් ප්‍රකාශයට පත් කළ දා සිට, සෑම වසරකම ජාතික මට්ටමින් කියවීම් ප්‍රවර්ධන වැඩසටහන් රැසක් ක්‍රියාත්මක වෙයි. මෙවර එහි ප්‍රධාන අරමුණ වූයේ කියවීම යනු හුදු විනෝදාංශයක් පමණක් නොව, ජීවිත කාලය පුරාම පවත්වාගෙන යා යුතු අතිශය වටිනා පුරුද්දක් බව සමාජයට අවධාරණය කිරීමයි.

ජාතික පුස්තකාල හා ප්‍රලේඛන සේවා මණ්ඩලයේ මෙහෙයවීමෙන්, දිවයින පුරා විසිරී ඇති සියලුම පුස්තකාල මෙන්ම තවත් රාජ්‍ය හා රාජ්‍ය නොවන ආයතන රැසක සහභාගීත්වයෙන් මෙම කියවීම් ප්‍රවර්ධන වැඩසටහන් ක්‍රියාත්මක විය. ඊට සමගාමීව පොත් ප්‍රදර්ශන, සාහිත්‍ය සම්මන්ත්‍රණ, පාඨක දැනුවත් කිරීමේ වැඩසටහන් මෙන්ම 'කියවමු දිනමු' නමින් විශේෂ ප්‍රශ්න විචාරාත්මක තරඟාවලියක් ද සංවිධානය කර තිබීම කැපී පෙනුණි. මීට අමතරව, පුස්තකාල සංවර්ධන කටයුතු සඳහා අවශ්‍ය මගපෙන්වීම් සහ සහාය ලබා දීම ද මෙම මාසය පුරාවටම ප්‍රමුඛතාවක් දී සිදු කෙරිණි.




පුද්ගලයෙකුගේ දැනුම, රසඥතාවය, නිර්මාණශීලීත්වය මෙන්ම විචාරශීලී හැකියාව වර්ධනය කිරීම උදෙසා කියවීමෙන් ලැබෙන දායකත්වය සුළුපටු නොවේ. රටක් වශයෙන් සංවර්ධනය කරා පියනැගීමේදී, දැනුම කේන්ද්‍ර කරගත්, සබුද්ධික සංස්කෘතික සමාජයක් නිර්මාණය කිරීම සඳහා කියවීම ඵලදායී හා අර්ථවත් ලෙස යොදා ගැනීමේ වැදගත්කම මෙවර වැඩසටහන් මාලාව හරහා මනාව පිළිබිඹු කෙරිණි.

මෙම දැවැන්ත ජාතික මෙහෙයුමට උරදෙමින්, කියවීමේ සංස්කෘතිය ප්‍රවර්ධනය කිරීම උදෙසා අතිමහත් කැපවීමෙන් කටයුතු කළ පුස්තකාල ඇගයීම වෙනුවෙන් සංවිධානය කෙරුණු 2026 ජාතික කියවීමේ මාසය වැඩසටහනේ සම්මාන ප්‍රදානෝත්සවය 2026 නොවැම්බර් මස 13 වැනි දින ජාතික පුස්තකාල හා ප්‍රලේඛන සේවා මණ්ඩලීය ශ්‍රවණාගාරයේදී අභිමානවත් අයුරින් පැවැත්විණි.



බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හින්දුගම සුනිල් සෙනෙවි මැතිතුමාගේ සහ නියෝජ්‍ය අමාත්‍ය ගමගෙදර දිසානායක මැතිතුමාගේ ප්‍රධානත්වයෙන්, ආරාධිත අමුත්තන් රැසකගේ සහභාගීත්වයෙන් මෙම සම්මාන උළෙල වර්ණවත් විය. එහිදී විශිෂ්ට සේවාවක් ඉටු කළ පුස්තකාල වෙත සම්මාන සහ සහතිකපත් පිරිනැමීම සිදු වූ අතර, එය හුදෙක් එක් මාසයකට සීමා වූ ව්‍යාපෘතියක නිමාව නොව, අකුරු හා බැඳුණු අපේක්ෂා සහගත සබුද්ධික සමාජයක අඛණ්ඩ ගමනක් බව පැහැදිලිය.

national-reading-month-special-awards-ceremony

national-reading-month-special-awards-ceremony



national-reading-month-special-awards-ceremony

national-reading-month-special-awards-ceremony



national-reading-month-special-awards-ceremony