ජීවන වියදම ඉහළ යාම, නිවාස අර්බුදය සහ අධ්‍යාපන කප්පාදුව හමුවේ තම අනාගතය අඳුරු වෙමින් පවතින බව පවසමින්, ජර්මනියේ තරුණ පරපුර හැලොවීන් දිනය වූ ඔක්තෝබර් 31 වැනිදා එරට නගර තිහකට අධික සංඛ්‍යාවක දැවැන්ත විරෝධතාවල නිරත වූහ. සමාජ මාධ්‍ය සහ වෙබ් අඩවියක් ඔස්සේ සංවිධානය වූ “Gen Z regelt” හෙවත් “Gen Z වගකීම භාරගනී” නම් නව තරුණ එකමුතුව විසින් මෙම ක්‍රියාමාර්ගය මෙහෙයවනු ලැබූ අතර, එය ජීවන වියදම් අර්බුදයට එරෙහිව යුරෝපය පුරා පැතිර යන තරුණ විරෝධතා රැල්ලක තවත් එක් ප්‍රධාන සන්ධිස්ථානයක් බවට පත්ව තිබේ.
චාන්සලර් ෆ්‍රෙඩ්රික් මර්ස්ගේ කොන්සර්වේටිව් නායකත්වයෙන් යුත් රජය ගෙන යන කප්පාදු ප්‍රතිපත්ති මගින් තමන්ගේ සියලු බලාපොරොත්තු උදුරා ගන්නා බවත්, අනාගතය විනාශ කර දමන බවත් විරෝධතාකරුවෝ විවෘත ලිපියක් මගින් චෝදනා කළහ. අධ්‍යාපනය, සමාජ සුබසාධනය, මත්ද්‍රව්‍යවලට ඇබ්බැහි වූවන් පුනරුත්ථාපනය කිරීම සහ මනෝචිකිත්සක ප්‍රතිකාර සේවා සඳහා වන රාජ්‍ය ප්‍රතිපාදන කප්පාදු කිරීම, නිවාස හිඟය, දේශගුණික අර්බුදය මෙන්ම ඉහළ යන මිල ගණන් හමුවේ බර අසමාන ලෙස බෙදී යාම ඔවුන්ගේ මූලික අවධානයට ලක් විය. ඊට අමතරව, හමුදා වියදම් ඉහළ නංවන පසුබිමක අනිවාර්ය හමුදා සේවය හෙවත් 'වෙහර්ප්ෆ්ලිච්ට්' යළි හඳුන්වා දීමට ගන්නා උත්සාහයන්, රාජ්‍ය නිරීක්ෂණ කටයුතු පුළුල් කිරීම, විශ්වවිද්‍යාලවල පවතින පීඩනය සහ ගාසා තීරය සම්බන්ධ රජයේ වියදම් ප්‍රමුඛතා පිළිබඳව ද විරෝධතාකරුවන් සිය අප්‍රසාදය පළ කර තිබිණි.
ප්‍රචණ්ඩත්වයෙන් තොර සාමකාමී උද්ඝෝෂණයක් ලෙස සැලසුම් කර තිබූ මෙම පාගමන් සඳහා අන්තර්ජාලය ඔස්සේ ලියාපදිංචි වූ පිරිස 160,000 ත් 182,000 ත් අතර විය. විරෝධතා සංවිධායකයන් ප්‍රකාශ කළේ රට පුරා නගර 30 ත් 34 ත් අතර ප්‍රමාණයක පුද්ගලයින් 100,000 ත් 120,000 ත් අතර සංඛ්‍යාවක් හෝ ඊටත් වැඩි පිරිසක් වීදි බැස සිටි බවයි. එහෙත් පොලිස් වාර්තා දැක්වූයේ ඊට වඩා අඩු සහභාගිත්වයකි. බර්ලිනයේ බ්‍රැන්ඩන්බර්ග් දොරටුව අසල සංවිධායකයන් 10,000 ක් පමණ සහභාගි වූ බව පැවසුවද පොලිස් ඇස්තමේන්තුව 5,000 ක් පමණ විය. ෆ්‍රැන්ක්ෆර්ට් නුවර යුරෝපීය මහ බැංකුව අසලින් ආරම්භ වූ පාගමනට 8,000 ක් පමණ එක්ව සිටි අතර, බර්ලින්, ෆ්‍රැන්ක්ෆර්ට් සහ මියුනිච් යන නගර තුනෙහිම එකතුව ඇතැම් ගණනය කිරීම්වල දැක්වුණේ 18,000 ක් වශයෙනි. ලයිප්සිග් හි 6,500 ත් 7,000 ත් අතර පිරිසක්ද, ස්ටුට්ගාර්ට් හි 3,000 ක් පමණ ද සහභාගි වූ අතර කොලෝන්, හැම්බර්ග්, ඩ්‍රෙස්ඩන්, නියුරම්බර්ග්, අර්ෆර්ට්, මන්ස්ටර්, කාල්ස්රුහේ සහ හැනෝවර් වැනි නගර රැසකද පෙළපාලි පැවැත්විණි.
පාසල් සිසුන්, විශ්වවිද්‍යාල ශිෂ්‍යයන්, දෙමාපියන් මෙන්ම වැඩිහිටියන් ද එක්ව සිටි මෙම දහවල් විරෝධතා බොහෝ දුරට සාමකාමී සහ උත්සවශ්‍රීයෙන් යුත් ස්වරූපයක් ගත් අතර හැලොවීන් ඇඳුමින් සැරසුණු පිරිස් ද ඒ අතර දක්නට ලැබිණි. "යුද්ධයට නොව මිනිසුන් වෙනුවෙන් වියදම් කරනු", "බෝම්බ වෙනුවට අධ්‍යාපනය", "අපේ අනාගතය විකිණීමට නැත" සහ "දේශගුණික විපර්යාස නොව පද්ධතියේ වෙනසක්" වැනි සටන් පාඨ ඔවුහු ප්‍රදර්ශනය කළහ. අධ්‍යාපනයට සහ සමාජ සේවාවලට මුදල් කප්පාදු කරමින් හමුදාව වෙනුවෙන් බිලියන ගණන් වෙන් කරන පසුබිමක, ඉහළ ජීවන වියදම නිසා අමතර රැකියාවල නිරත වීමට සිදුව ඇතැයි හැනෝවර් හි 23 හැවිරිදි දේශපාලන විද්‍යා ශිෂ්‍යයෙකු පෙන්වා දුන්නේය. රජය ඉදිරිපත් කරන්නේ තවදුරටත් කප්පාදු සහ බර පැටවීම් පමණක් බව මියුනිච් හි 18 හැවිරිදි තරුණයෙකු පැවසූ අතර, සංවිධානයේ ප්‍රකාශිකා ලීනා ෆ්‍රීඩ්රික් සඳහන් කළේ යුද්ධය සහ බලහත්කාරය වෙනුවට සෞඛ්‍ය හා අධ්‍යාපන පද්ධතියට ප්‍රමුඛත්වය ලබාදෙන සාමය සහ නිදහස වෙනුවෙන් තමන් පෙනී සිටින බවයි.
කෙසේ වෙතත්, සවස් කාලය එළඹෙත්ම ඇතැම් නගරවල හටගත් ප්‍රචණ්ඩ ක්‍රියා, කොල්ලකෑම් සහ පොලිසියට එල්ල වූ ප්‍රහාර හේතුවෙන් දිවා කාලයේ පැවති සාමකාමී වාතාවරණය යටපත් විය. විරෝධතාවලට මුවා වී ප්‍රචණ්ඩත්වය ඇති කළ බවට බලධාරීන් සහ දේශපාලනඥයන් චෝදනා කළේ මුහුණු ආවරණය කරගත් අන්ත වාමාංශික කණ්ඩායම්වලටය. ෆ්‍රැන්ක්ෆර්ට් නුවරදී පැවති ප්‍රධාන පාගමන ගිනිකෙළි සහ ගල් ප්‍රහාර මධ්‍යයේ විසිරුවා හැරීමෙන් අනතුරුව, වාණිජ කලාපයක් වන 'සයිල්' වීදියේ සහ ඒ අවට සාප්පු කවුළු බිඳ දමමින් සපත්තු සහ සුවඳ විලවුන් මෙන්ම විශේෂිත ගිනිඅවි අලෙවිසැලක් ද කොල්ලකනු ලැබිණි. අත්අඩංගුවට පත් වූවෙකු සන්තකයේ තිබී ගිනිඅවි දෙකක් සොයාගැනීමට පොලිසිය සමත් විය.
ෆ්‍රැන්ක්ෆර්ට් හි කසළ බඳුන් සහ මාර්ග බාධක ගිනි තබමින් මොලොටොව් කොක්ටේල් ප්‍රහාර එල්ල වූ අතර, වීදි සංඥා පුවරු ගලවා පොලිස් නිලධාරීන්ට ප්‍රහාර එල්ල කෙරිණි. ප්‍රචණ්ඩත්වය පාලනය කිරීම සඳහා ජල ප්‍රහාරක සහ 'SEK' විශේෂ කාර්ය ඒකක යෙදවීමට සිදුවූ අතර, ප්‍රදේශය මුද්‍රා තැබිණි. නිලධාරීන් දුසිම් ගණනක් තුවාල ලැබූ බව ඇතැම් වාර්තාවල දැක්වුණු අතර සැකකරුවන් රැසක් අත්අඩංගුවට ගැනිණි. එම ස්ථානයට පැමිණි හෙසන් ප්‍රාන්ත අභ්‍යන්තර කටයුතු අමාත්‍ය රෝමන් පොසෙක් දැඩි ක්‍රියාමාර්ග ගන්නා බවට අනතුරු ඇඟවීය. ඔහු සඳහන් කළේ ෆ්‍රැන්ක්ෆර්ට් නුවර පැහැදිලිව හඳුනාගත් අන්ත වාමාංශිකයන් 100 ක් පමණ සිටි බවයි.
මීට අමතරව කොලෝන් නගරයේ ආසන දෙව්මැදුර අසල බෝතල් සහ බයිසිකල්වලින් පහරදීම් සහ ගිනිකෙළි ප්‍රහාර එල්ල වූ අතර පොලිසිය ජල ප්‍රහාර එල්ල කළේය. හැම්බර්ග් නුවරද බාධක ගිනි තැබීම්, ගිනිකෙළි ප්‍රහාර සහ අත්අඩංගුවට ගැනීම් වාර්තා වූ අතර, ව්‍යාජ ගිනිඅවියක් ළඟ තබාගෙන සිටි පුද්ගලයෙකු ද ඒ අතර විය. බර්ලිනයේ සහ සෙසු ප්‍රදේශවලද බෝතල්, බිත්තර සහ ගිනිකෙළි ප්‍රහාර වාර්තා වූ අතර ලයිප්සිග් සහ ස්ටුට්ගාර්ට් හිදී ගම්මිරිස් ප්‍රහාර එල්ල කිරීමට පොලිසියට සිදුවිය. ප්‍රචණ්ඩත්වය හෙළාදුටු විරෝධතා සංවිධායකයන් කියා සිටියේ මාධ්‍ය මගින් මෙම සිදුවීම් ඉස්මතු කිරීම හරහා තම මූලික ගැටලු සහ ඉල්ලීම් යටපත් කර ඇති බවයි. බර්ලිනයේ ටිෆනි ඇන්ඩ් කෝ සහ බල්ගාරි වැනි සුඛෝපභෝගී වෙළඳසැල් විරෝධතාවට පෙරම තම වීදුරු ආවරණය කර තිබුණද, එවැනි කල්තියා සැලසුම් කළ කොල්ලකෑම් පිළිබඳ පැහැදිලි සාක්ෂි නොතිබූ බව බර්ලින් පොලිස් ප්‍රධානියා මීට පෙර සඳහන් කර තිබුණි.
මෙම අසහනය පිටුපස පවතින්නේ ජර්මනියේ වත්මන් ආර්ථික හා සමාජීය පසුබිමයි. ජනගහනය වයස්ගත වීම, ශ්‍රම බලකාය හැකිලීම සහ දුර්වල ආර්ථික වර්ධනය හමුවේ විශ්‍රාම වැටුප් සහ පොදු සේවාවන් දැඩි පීඩනයකට ලක්ව ඇති අතර උද්ධමනය ඉහළ මට්ටමක පවතී. 2026 ඔක්තෝබර් මාසයේ වාර්ෂික උද්ධමනය සියයට 2.8 ක් ලෙස සටහන් වූ අතර ගෝලීය අර්බුද මධ්‍යයේ බලශක්ති පිරිවැය තවමත් ප්‍රධාන සාධකයක්ව පවතී. මෑතකදී නිකුත් වූ 2026 MLP ශිෂ්‍ය නිවාස වාර්තාවට අනුව, ශිෂ්‍ය නිවාස කුලිය සාමාන්‍යයෙන් සියයට 2.6 කින්ද, කුඩා මහල් නිවාස සඳහා එය සියයට 3.5 කින්ද ඉහළ ගොස් ඇත. වර්ග මීටර් 30 ක සාමාන්‍ය මහල් නිවාසයක මාසික කුලිය යුරෝ 567 ක් වන අතර, හවුල් කාමරයක කුලිය යුරෝ 513 ක් පමණ වේ. මෙය රජය ලබාදෙන BAföG නිවාස දීමනාව වන යුරෝ 380 සීමාව බෙහෙවින් ඉක්මවා යාමකි. මියුනිච් නුවර කුඩා කාමරයක කුලිය බොහෝ විට යුරෝ 800 ඉක්මවන අතර බර්ලින්, ෆ්‍රැන්ක්ෆර්ට්, හැම්බර්ග්, කොලෝන් සහ ස්ටුට්ගාර්ට් යන නගරවලද තත්ත්වය බරපතල ය. එහි ප්‍රතිඵලයක් ලෙස ශිෂ්‍ය පවුල්වලින් තුනෙන් දෙකක්ම දරාගත නොහැකි ආර්ථික බරකට මුහුණ දී සිටින බවත්, ආදායමෙන් සියයට 50 කට වඩා නිවාස කුලිය සඳහා වැයවීම අධ්‍යාපනයට ඇති සමාන අවස්ථා අහිමි කරන බවත් වාර්තා වේ.
ප්‍රංශයේ ඔක්තෝබර් 31 දින ලක්ෂ සංඛ්‍යාත පිරිසකගේ සහභාගිත්වයෙන් පැවති විරෝධතා මෙන්ම ඉතාලිය, පෘතුගාලය, බෙල්ජියම සහ ස්පාඤ්ඤය වැනි රටවල වැටුප්, නිවාස සහ රාජ්‍ය සේවා අරමුදල් වෙනුවෙන් මතු වූ තරුණ නැගිටීම්වලින් ජර්මානු සංවිධායකයන් සෘජු ආභාෂය ලබා තිබිණි. ෆෙඩරල් ශිෂ්‍ය සංගමයක් මෙම ක්‍රියාමාර්ගයෙන් බැහැරව නොවැම්බර් 20 වන දිනට වෙනම විරෝධතාවක් සැලසුම් කර ඇති නමුත්, "Gen Z regelt" එකමුතුව ද නොවැම්බර් 20 ආසන්නයේදී යුරෝපය පුරා විහිදෙන තවත් විරෝධතා මාලාවක් දියත් කිරීමට සූදානම් වෙමින් සිටී.
