ක්‍රිකට් යනු අවිනිශ්චිතතාවයෙන් පිරුණු අලංකාර ක්‍රීඩාවකි. පාකිස්තානයේ පැවැත්වෙන තුන්කොන් ක්‍රිකට් තරගාවලිය යටතේ එංගලන්තයට එරෙහිව පාකිස්තාන කණ්ඩායම හිමිකරගත් එක් කඩුල්ලක තියුණු ජයග්‍රහණය එම යථාර්ථය යළිත් වරක් ලොවට පෙන්වා දුන්නේය.
පරාජයේ අද්දරටම ගොස් සිටි පාකිස්තානය ජයග්‍රහණය කරා රැගෙන ගියේ දසවන කඩුල්ල සඳහා පිටියට එක්වූ ෂදාබ් ඛාන් සහ හරිෂ් රවුෆ් ගොඩනැගූ අසමසම ලකුණු 89ක සබඳතාවයයි.මෙම සටන්කාමී සබඳතාවය සුවිශේෂී වන්නේ එය එක්දින ක්‍රිකට් ඉතිහාසයේ සාර්ථක ලකුණු හඹායාමකදී දසවන කඩුල්ල වෙනුවෙන් ගොඩනැගුණු ඉහළම සබඳතාව ලෙස සැලකෙන බැවිනි. මීට වසර 51කට පෙර, එනම් 1975 වසරේදී බටහිර ඉන්දීය කොදෙව් ක්‍රීඩකයින් වන ඩ්‍රයික් මුරේ සහ ඇන්ඩ්‍රි රොබට්ස් විසින් පාකිස්තානයටම එරෙහිව පිහිටුවා තිබූ ලකුණු 64ක සබඳතාවය මෙම ජයග්‍රහණයත් සමඟ ඉතිහාසයට එක්විය.
තරගය ජයග්‍රහණය කිරීම සඳහා පාකිස්තානයට ලකුණු 242ක ඉලක්කයක් හිමිව තිබුණි. එහෙත් ජෙමී ඔවර්ටන් ඇතුළු එංගලන්ත පන්දු යවන්නන්ගේ දැඩි පීඩනය හමුවේ පාකිස්තාන ඉනිම කඩුලු 9ක් දැවී දැඩි අර්බුදයකට ලක්ව තිබිණි. ඔවර්ටන් එහිදී කඩුලු තුනක් බිඳහෙළීය. කෙසේ වෙතත්, එක් අන්තයක් ආරක්ෂා කරගනිමින් ප්‍රතිවාදීන්ට ප්‍රබල තර්ජනයක් වූ ෂදාබ් ඛාන් ලකුණු 113ක් රැස් කරමින් තරගයේ ගමන් මග මුළුමනින්ම වෙනස් කළේය. ඒ අනුව පන්දුවාර 47යි එක් පන්දුවක් තුළදී සිය කඩුලු 9ක් පමණක් දැවී තරගයේ ජය තහවුරු කරගැනීමට පාකිස්තානයට හැකි විය.
මීට පෙර තරගයේ ප්‍රථමයෙන් පන්දුවට පහරදුන් එංගලන්ත කණ්ඩායම නියමිත පන්දුවාර 50 අවසානයේ සියලු දෙනා දැවී ලකුණු 241ක් රැස් කළේය. එංගලන්ත ඉනිම වෙනුවෙන් විශිෂ්ට පිතිහරඹයක නිරත වූ බෙන් ඩකෙට් ලකුණු 105ක් ද, සෑම් කරන් ලකුණු 42ක් ද ලබා ගත්හ. පන්දු යැවීමේදී එංගලන්ත පිතිකරුවන් මෙල්ල කළ ශයින් ෂා අෆ්රිඩි කඩුලු 4ක් බිඳ හෙළීමට සමත් විය.
පරාජය පෙනි පෙනී තිබියදී ෂදාබ් සහ රවුෆ් එක්ව දැක්වූ මෙම අසාමාන්‍ය සටන්කාමීත්වය හමුවේ වාර්තා වූ ජයග්‍රහණයත් සමඟ, පාකිස්තාන කණ්ඩායම අදාළ තුන්කොන් තරගාවලියේ අවසන් මහා තරගය සඳහා සුදුසුකම් ලබාගැනීමට ද සමත් විය.
