චීනයේ ජනාධිපති ෂී ජින්පින්ග් විසින් ඇමෙරිකාවේ ජෝර්ජියා හි ඇට්ලන්ටා සත්වෝද්‍යානය වෙත 'පිං පිං' සහ 'පු ෂුවැන්ග්' නමැති පැන්ඩාවන් යුවළක් ලබා දී ඇත. බටහිර ජාතීන් තුළ යෝධ පැන්ඩාවන් කෙරෙහි ඇති දැඩි ආකර්ෂණය චීනය විසින් තම දේශපාලනික අරමුණු වෙනුවෙන් ඉතා සූක්ෂම ලෙස භාවිතා කරනු ලබයි.
1860 දශකය වන තුරුත් බ්‍රිතාන්‍යයන් පැන්ඩාවන් පිළිබඳව දැන සිටියේ නැත.1869 වසරේදී ආමන්ඩ් ඩේවිඩ් නමැති කතෝලික මිෂනාරිවරයා විසින් චීනයේදී පැන්ඩා සමක් ප්‍රදර්ශනය කර තිබෙනු දැකීමෙන් පසු මෙම සත්වයා පිළිබඳව බටහිර ලෝකය දැනුවත් විය. ඉන්පසුව බටහිර රටවලට පැන්ඩාවන්ගේ පැමිණීම මිනිසුන් තුළ දැඩි උමතුවක් නිර්මාණය කිරීමට සමත් විය. 1939 වසරේදී ලන්ඩන් සත්වෝද්‍යානයේ සිටි 'මින්ග්' නම් පැන්ඩා සමග එලිසබෙත් සහ මාග්‍රට් කුමරියන් ද ඡායාරූපයකට පෙනී සිට ඇත. වර්තමානය වන විට මෙම සතුන් ප්‍රදර්ශනය කිරීම සඳහා සත්වෝද්‍යානවලට වසරකට ඩොලර් මිලියනයක් දක්වා වූ විශාල මුදලක් ගෙවීමට සිදු වේ.
එමෙන්ම, කලාතුරකින් සිදුවන පැන්ඩාවන්ගේ අභිජනන ක්‍රියාවලියක් සාර්ථක වුවහොත්, ඉපදෙන පැටවුන්ගේ අයිතිය නිතැතින්ම චීනය සතු වෙයි. යම් හෙයකින් සත්වෝද්‍යානයේ වරදකින් පැන්ඩාවෙකු මිය ගියහොත් ඩොලර් 500,000 දක්වා වූ විශාල දඩ මුදලක් ගෙවීමට ද ඔවුන්ට සිදු වන බව වාර්තා වේ.
