ඩුබායි සිට ඊශ්‍රායලයේ ටෙල් අවීව් බලා පියාසර කරමින් තිබූ ගුවන් යානයක් තුළ සිදු වූ ත්‍රාසජනක ප්‍රහාරයකින් පසු, ඉන්දීය සම්භවයක් සහිත ගුවන් නියමුවා වන ස්මිත් මිචාර් වෙත බොහෝ දෙනෙකුගේ ප්‍රශංසාව හිමි වෙමින් පවතී. බරපතල ලෙස තුවාල ලබා සිටියදීත් කොක්පිට් කුටියේ දොර විවෘත කරමින් සිදුවන්නට යන අනතුර පිළිබඳව යානයේ කාර්ය මණ්ඩලයට දැනුම් දීමට ඔහු සමත් විය.
ඔහුගේ මෙම කාලෝචිත මැදිහත්වීම හේතුවෙන් විශාල ඛේදවාචකයක් වළක්වා ගැනීමට හැකි වූ අතර, ඊට සමගාමීව ගුවන් නියමුවාට සහාය වීම සඳහා වහාම ක්‍රියාත්මක වූ මගීන් පිරිසක් ද මෙම මෙහෙයුමේ වීරයන් බවට පත්ව සිටිති.යානය තුළ සිටි ඊශ්‍රායල ජාතික මගීන් සිව් දෙනෙකු වන යැනිව් හයුන්, අසාෆ් රාජ්වාන්, ස්විකා මානෙස් සහ මුසායෙව් ෂෝටා යන අය මෙලෙස කොක්පිට් කුටියට කඩා වැදී ප්‍රහාරකයා මෙල්ල කිරීම සඳහා කාර්ය මණ්ඩලයට සහාය වී ඇත. ජලනල කාර්මිකයෙකු ලෙස සේවය කරන යැනිව් හයුන් ප්‍රහාරයට ලක්වූ ගුවන් නියමුවා බේරාගැනීමට මුලින්ම ඉදිරිපත් වූ අයෙකි. ප්‍රහාරයෙන් පසු ලේ තැවරුණු කමිසයකින් සැරසී සිටි ඔහුව ඊශ්‍රායල අගමැති බෙන්ජමින් නෙතන්යාහු විසින් වැළඳගන්නා අයුරු දැක්වෙන වීඩියෝවක් ද මේ වන විට සමාජ මාධ්‍යවල සංසරණය වේ. තුවාල ලැබූ නියමුවා බිම ඇද වැටීමට පෙර කොක්පිට් කුටියේ දොර විවෘත කළ අවස්ථාවේදී යැනිව් එහි ඇතුළු වී ඇති අතර, ඒ වන විටත් ප්‍රහාරකයා ගුවන් නියමුවාගේ අසුනේ වාඩි වී යානයේ පාලනය සියතට ගෙන එය අක්‍රිය කිරීමට උත්සාහ කරමින් සිට ඇත. රූපවාහිනී වැඩසටහන් හරහා ලබා තිබූ දැනුම උපයෝගී කරගනිමින් යැනිව් වහාම සන්නිවේදන යන්ත්‍රය හරහා 'මේඩේ, මේඩේ' (Mayday) යනුවෙන් පවසා හදිසි අනතුරු ඇඟවීමක් සිදු කර තිබේ.
තායිලන්තයේ නිවාඩුවක් ගත කර යළි මව්බිමට පැමිණෙමින් සිටි රක්ෂණ නියෝජිතායතනයක හිමිකරුවෙකු වන අසාෆ් රාජ්වාන් ද මෙම අවදානම් මොහොතේ ඉදිරියට පැමිණි තවත් මගියෙකි. ඔහු මෙම අත්දැකීම විස්තර කරන්නේ හොල්මන් චිත්‍රපටයක සිදුවීමකට සමාන කරමිනි. යානයේ වැසිකිළිය දෙසින් ඇසුණු කෑගැසීම් සහ මවකගේ විලාපයත් සමඟ යානයට යම් අනතුරක් සිදුව ඇති බව වටහාගත් ඔහු, යානය වේගයෙන් පහළට ඇද වැටෙනු දැක වහාම විවෘතව තිබූ කොක්පිට් කුටිය වෙත දිව ගොස් ඇත. එහිදී තවත් මගියෙකු සහ කාර්ය මණ්ඩලයේ කිහිප දෙනෙකුගේ සහාය ඇතිව ප්‍රහාරකයා සමඟ පොරබදා ඔහුව මිනිත්තු පණහකට ආසන්න කාලයක් යටපත් කරගෙන සිටීමට අසාෆ් ඇතුළු පිරිසට හැකි වී තිබේ.
'Bank Leumi' බැංකුවට අයත් ආයතනයක ප්‍රධාන විධායක නිලධාරියෙකු (CEO) වන ස්විකා මානෙස් ද මෙම ගැටුමට මැදිහත් වූ අයෙකි. කොක්පිට් කුටිය තුළ විශාල රුධිර ප්‍රමාණයක් තිබූ බවත්, යානය වේගයෙන් පහළට ඇද වැටෙද්දී මගීන්ගේ කෑගැසීම් මධ්‍යයේ යානයේ පාලනය යථා තත්ත්වයට පත් කිරීමට විශාල පරිශ්‍රමයක් දැරීමට සිදු වූ බවත් ඔහු සඳහන් කරයි. දැඩි පරිශ්‍රමයකින් පසුව, මගීන්ට ලබා දී තිබූ හෙඩ්ෆෝන්වල කේබල් භාවිතා කරමින් ප්‍රහාරකයාව ගැටගසා මෙල්ල කිරීමට ස්විකා මානෙස් කටයුතු කර ඇත.
වෘත්තියෙන් දන්ත වෛද්‍යවරයෙකු වන මුසායෙව් ෂෝටා ද කොක්පිට් කුටිය වෙත දිව ගොස් බරපතල ලෙස තුවාල ලබා සිටි ගුවන් නියමුවාට කඩිනමින් ප්‍රථමාධාර ලබා දීමට කටයුතු කළේය. නියමුවාගේ හිසට සහ අත්වලට දැඩි ලෙස හානි සිදුවී තිබූ අතර, අධික රුධිර වහනය හේතුවෙන් ඔහු අසාධ්‍ය තත්ත්වයක පසුවිය. එලෙස බරපතල තත්ත්වයක සිටියදීත් ගුවන් නියමුවා ඔවුන් සමඟ අඛණ්ඩව කතාබහ කර ඇති අතර, තමා 39 හැවිරිදි දෙදරු පියෙකු බව ඔහු එහිදී පවසා තිබේ.
