බටහිර-මධ්යම සහ ඊට යාබද වයඹ බෙංගාල බොක්ක ආශ්රිතව පැවති ගැඹුරු පීඩන අවපාතය ඉන්දියාවේ උතුරු ආන්ද්ර ප්රදේශ් සහ දකුණු ඔඩිෂා වෙරළ තීරය හරහා ගමන් කරමින් පැවතුණ ද, එම පද්ධතිය දෙසට ඇදී යන සුළං ප්රවාහයන් හේතුවෙන් ශ්රී ලංකාවේ නිරිතදිග කොටස ඇතුළු ප්රදේශ රැසක පවතින වැසි සහ සුළං සහිත කාලගුණ තත්ත්වය තවදුරටත් අපේක්ෂා කෙරේ. කාලගුණ විද්යා දෙපාර්තමේන්තුව පෙන්වා දෙන්නේ මෙම පද්ධතියෙන් දිවයිනට සෘජු බලපෑමක් එල්ල නොවන මුත්, ඊට අදාළ සුළං ධාරා සක්රීය වීම නිසා ඉදිරි හෝරා කිහිපය තුළ නිරිතදිග කලාපයට බලපෑම් එල්ල වන බවයි.
ඒ අනුව බස්නාහිර, සබරගමුව, මධ්යම සහ වයඹ පළාත්වලට මෙන්ම ගාල්ල සහ මාතර දිස්ත්රික්කවලට විටින් විට වැසි හෝ ගිගුරුම් සහිත වැසි ඇතිවිය හැකි අතර, ඇතැම් ප්රදේශවලට මිලිමීටර් 100 ඉක්මවූ තද වැසි ඇද හැලීමේ හැකියාවක් පවතී. උතුරු-මැද පළාතේ සහ මන්නාරම දිස්ත්රික්කයේ ද වැසි වාර කිහිපයක් අපේක්ෂා කෙරෙන අතර, මධ්යම කඳුකරයේ බටහිර බෑවුම් ප්රදේශ, උතුරු-මැද සහ වයඹ පළාත්වලත්, ත්රිකුණාමලය, හම්බන්තොට සහ මාතලේ දිස්ත්රික්කවලත් පැයට කිලෝමීටර් 40 ත් 50 ත් අතර තද සුළං හමනු ඇත.
දිවයින වටා වන මුහුදු තීරයේ ද සුළගේ වේගය සැලකිය යුතු ලෙස ඉහළ යන බැවින් ත්රිකුණාමලයේ සිට කන්කසන්තුරේ, මන්නාරම සහ පුත්තලම හරහා මීගමුව දක්වා මෙන්ම ගාල්ල සිට හම්බන්තොට හරහා පොතුවිල් දක්වා වන වෙරළාශ්රිත මුහුදු ප්රදේශවල සුළං වේගය පැයට කිලෝමීටර් 55 ත් 65 ත් අතර අගයක් දක්වා වැඩි විය හැක. සෙසු මුහුදු ප්රදේශවල සුළගේ වේගය පැයට කිලෝමීටර් 50 දක්වා ඉහළ යා හැකි බැවින්, නාවික හා ධීවර ප්රජාව මේ පිළිබඳව දැඩි විමසිල්ලෙන් කටයුතු කළ යුතු බවට කාලගුණ විද්යා දෙපාර්තමේන්තුව විශේෂ අනතුරු ඇඟවීමක් නිකුත් කරයි.
අධික වර්ෂාපතනය හේතුවෙන් ජාතික ගොඩනැගිලි පර්යේෂණ සංවිධානය විසින් සැප්තැම්බර් 24 වනදා පෙ.ව. 4.00 සිට ඉදිරි පැය 24 සඳහා නායයාමේ පූර්ව අනතුරු ඇඟවීම් නිකුත් කර තිබේ. මෙහිදී මහනුවර දිස්ත්රික්කයේ පස්බාගේ කෝරලේ මෙන්ම නුවරඑළිය දිස්ත්රික්කයේ අඹගමුව, නෝර්වුඩ්, කොත්මලේ බටහිර සහ කොත්මලේ නැගෙනහිර යන ප්රාදේශීය ලේකම් කොට්ඨාස සඳහා රතු පැහැති තෙවන මට්ටමේ (ඉවත් වීමේ) අනතුරු ඇඟවීම් නිකුත් කර ඇති අතර, එකී අවදානම් ප්රදේශවල සිටින ජනතාව වහාම ආරක්ෂිත ස්ථාන වෙත ඉවත් විය යුතුය.
මීට අමතරව ගාල්ල, මහනුවර, කෑගල්ල, නුවරඑළිය, රත්නපුර සහ මාතර යන දිස්ත්රික්කවල ප්රාදේශීය ලේකම් කොට්ඨාස ගණනාවකට දෙවන මට්ටමේ (ඇම්බර්) නායයාමේ අනතුරු ඇඟවීම් ද, කොළඹ, ගම්පහ, කළුතර, හම්බන්තොට සහ කුරුණෑගල ඇතුළු දිස්ත්රික්ක රැසකට පළමු මට්ටමේ (කහ) විමසිලිමත් වීමේ පණිවිඩ ද නිකුත් කර ඇත. පවතින හදිසි තත්ත්වය හමුවේ අනවශ්ය ගමන් බිමන් සීමා කරන ලෙසත්, ගිගුරුම් සහිත වැසි සහ අකුණු අනතුරුවලින් ආරක්ෂා වීමට පියවර ගන්නා ලෙසත්, කඩා වැටීමේ අවදානමක් සහිත ගස් හෝ විදුලි රැහැන් අසල රැඳී සිටීමෙන් වළකින ලෙසත් බලධාරීන් ජනතාවගෙන් ඉල්ලා සිටී.
