ළමුන් සඳහා සමාජ මාධ්ය භාවිතය තහනම් කිරීමට අදාළව සංශෝධිත නව පනත් කෙටුම්පතක් ප්රංශ රජය විසින් ඉදිරිපත් කර තිබේ. ප්රංශ ජනාධිපති එමානුවෙල් මැක්රොන් සෙප්තැම්බර් 14 වනදා X (ට්විටර්) ගිණුමේ සටහනක් තබමින් සඳහන් කළේ, තාක්ෂණික මට්ටමේ පුළුල් අධ්යයනයකින් පසුව සකස් කළ මෙම නව කෙටුම්පත සම්බන්ධයෙන් යුරෝපීය කොමිසම වෙත නිල වශයෙන් දැනුම් දුන් බවයි.
මීට පෙර ප්රංශ රජය විසින් ඉදිරිපත් කළ අදාළ යෝජනාව එරට උසස්ම ආණ්ඩුක්රම ව්යවස්ථා බලධාරියා වන ආණ්ඩුක්රම ව්යවස්ථා කවුන්සිලය විසින් ඉකුත් අගෝස්තු මාසයේ මැද භාගයේදී අහෝසි කරන ලදී. එම පනත මගින් පුද්ගලයන්ගේ භාෂණයේ නිදහසට අනවශ්ය ලෙස බාධා එල්ල වන බව පවසමින් කවුන්සිලය එම තීරණය ගෙන තිබුණි.
නව යෝජනාව යුරෝපා සංගමයේ පවතින නීති රාමුවට අනුකූල වන පරිදි සකස් කර ඇති අතර, එය මෙම ක්රියාවලියේ වැදගත් ඉදිරි පියවරක් ලෙස සැලකේ. තමන් 2027 වසරේදී ධුරයෙන් නික්ම යාමට ප්රථම ළමුන් සහ යෞවනයන් සඳහා වන මෙම සමාජ මාධ්ය තහනම සක්රියව ක්රියාත්මක කිරීම සිය ප්රමුඛතම අභිප්රායක් කරගෙන ඇති මැක්රොන්, මුළු යුරෝපා සංගමය පුරාම මෙවැනි නීති සම්මත කරගත යුතු බවටද යෝජනා කරයි.
මේ අතර, යුරෝපා සංගමය පුරා ළමුන් සඳහා සමාජ මාධ්ය තහනමක් පැනවීම පිළිබඳව යුරෝපීය කොමිසමේ සභාපතිනි උර්සුලා වොන් ඩර් ලෙයෙන් ද මේ සතියේ බ්රසල්ස් නුවරදී පැවැත්වෙන විශේෂ කතාවකදී කරුණු දැක්වීමට නියමිතව ඇත. සමාජ මාධ්ය භාවිතය මගින් ළමයින්ට සිදුවන හානිකර බලපෑම් පිළිබඳව දැඩි අවධානයක් යොමුවීමත් සමඟ, ලොව පුරා රටවල් ගණනාවක්ම ළමුන්ගේ සමාජ මාධ්ය ප්රවේශය සීමා කිරීමට මේ වන විට පියවර ගනිමින් සිටී.
