සංවිධානාත්මක අපරාධ ජාල, මත්ද්රව්ය ජාවාරම් සහ මූල්ය වංචාවලට සම්බන්ධ 'පාතාලයන්' ගැන සිදුකළ විමර්ශන 113 කට අදාළව රුපියල් බිලියන 6 කට අධික වටිනාකමකින් යුත් පාතාලයන්ගේ දේපළ හා වත්කම් තහනම් කිරීමට ශ්රී ලංකා පොලීසිය පියවර ගෙන තිබේ. පොලිස් වාර්තාවලට අනුව හඳුනාගන්නා ලද සමස්ත වත්කම් අතුරින් රුපියල් බිලියන 5.423 කට ආසන්න ප්රමාණයක් ප්රධාන පෙළේ මත්ද්රව්ය ජාවාරම්කරුවන් සහ සංවිධානාත්මක අපරාධකරුවන් 102 දෙනෙකුට අයත් වේ.
තවද, සිදුකරන ලද පරීක්ෂණවල කොටසක් ලෙස පාතාල ලෝකයේ ප්රධානීන් තිදෙනෙකුට අයත් රුපියල් මිලියන 209 ක පමණ වටිනාකමකින් යුත් දේපළ ද රාජසන්තක කර ඇත.නීති විරෝධී පිරමිඩ යෝජනාක්රම, ළමා අපයෝජන, නීති විරෝධී පුපුරන ද්රව්ය සහ මහා පරිමාණ වංචාවලට සම්බන්ධ බවට චෝදනා එල්ල වූ සැකකරුවන් අටදෙනෙකුගෙන් රුපියල් මිලියන 367 ක පමණ වත්කම් ද පොලීසිය භාරයට ගෙන තිබේ. මෙලෙස හඳුනාගෙන ඇති දේපළ අතර රුපියල් බිලියන 1.437 ක් වටිනා නිවාස 55 ක් සහ රුපියල් බිලියන 1.322 ක් ලෙස තක්සේරු කර ඇති අක්කර 138 ක ඉඩම් ප්රමාණයක් ඇතුළත් වේ. මීට අමතරව රුපියල් බිලියන 1.171 ක් පමණ වටිනා මෝටර් රථ ඇතුළු වාහන 142 ක් ද පොලිස් භාරයට ගෙන ඇත. එමෙන්ම බලධාරීන් විසින් රුපියල් මිලියන 461 ක මුදලක් සොයා ගැනීමට හෝ තහනම් කිරීමට කටයුතු කර ඇති අතර,
රුපියල් මිලියන 428 කට ආසන්න මුදලක් සහිත බැංකු ගිණුම් 27 ක් ද අත්හිටුවා තිබේ. මෙම විමර්ශනවලදී රුපියල් මිලියන 305 ක් වටිනා බහුදින ධීවර යාත්රා 12 ක්, රුපියල් මිලියන 250 ක් වටිනා වාණිජ ගොඩනැගිලි අටක්, රුපියල් මිලියන 214 ක් වටිනා වෙළඳසැල් 21 ක් සහ රුපියල් මිලියන 168 ක් වටිනා රන් භාණ්ඩ හා ආභරණ ද තහනම් කර ඇත. තවත් රුපියල් මිලියන 239 ක විවිධ වත්කම් ද මෙලෙස අත්අඩංගුවට ගත් දේපළ අතර වේ. මේ අතර, විදේශයන් වෙත පලාගොස් සිටින සැකකරුවන් සොයා ගැනීම සඳහා ශ්රී ලංකා පොලීසිය ජාත්යන්තර මට්ටමින් මෙහෙයුම් වේගවත් කර ඇති අතර, සංවිධානාත්මක අපරාධ සහ වෙනත් බරපතල වැරදි සම්බන්ධයෙන් තේරී පත්වුණු පුද්ගලයින් 38 දෙනෙකු ඇතුළුව, පලාගිය පුද්ගලයින් 66 දෙනෙකු මේ වන විට විදේශයන්හි සිට නැවත ශ්රී ලංකාවට ගෙන්වාගෙන තිබේ. පොලීසිය සඳහන් කරන්නේ ඉන් සංවිධානාත්මක අපරාධ සම්බන්ධ සැකකරුවන් 28 දෙනෙකු මෙරටට ගෙන්වාගෙන ඇත්තේ ඉන්ටර්පෝල් රතු නිවේදන යටතේ බවයි.
සංවිධානාත්මක අපරාධ කල්ලි නායකයින් සහ මහා පරිමාණ මත්ද්රව්ය ජාවාරම්කරුවන් 55 දෙනෙකු ඉලක්ක කරගනිමින් නිකුත් කළ නිවේදන ද ඇතුළුව ඉන්ටර්පෝල් රතු නිවේදන 110 ක් බලධාරීන් විසින් ලබාගෙන ඇත. ඒ අනුව 2023 වසරේ සිට මේ දක්වා ඉන්ටර්පෝල් රතු නිවේදන යටතේ සැකකරුවන් 42 දෙදෙනෙකු ශ්රී ලංකාවට උදර්පනය කර තිබේ. දැනට ජාත්යන්තර මට්ටමින් සක්රීයව පවතින ඉන්ටර්පෝල් රතු නිවේදන 236 ක් පොලීසිය විසින් පවත්වාගෙන යනු ලබන අතර, ඉන් 96 ක් සංවිධානාත්මක අපරාධ කල්ලි නායකයින් ඉලක්ක කරගත් ඒවා වේ. තවත් පලාගිය පිරිසක් මෙරටට ගෙන්වා ගැනීමට අදාළව නිවේදන 93 ක් සකස් කරමින් පවතින බව ද පොලීසිය වැඩිදුරටත් සඳහන් කරයි.