මහා භාණ්ඩාගාරයෙන් ඇමරිකානු ඩොලර් මිලියන 2.5ක මුදලක් අතුරුදන් වීම සම්බන්ධයෙන් දැඩි සංවාදයක් ගොඩනැගී ඇති පසුබිමක, මුදල් අමාත්යාංශයේ ලේකම් හර්ෂණ සූරියප්පෙරුම මහතාගේ පුරවැසිභාවය පිළිබඳ තොරතුරු මුදාහැරීම ඕස්ට්රේලියානු රජය විසින් ප්රතික්ෂේප කර තිබේ. 'දි අයිලන්ඩ්' පුවත්පත වාර්තා කරන අන්දමට, ප්රසිද්ධ නීතිඥ සහ සිවිල් ක්රියාකාරී නාගානන්ද කොඩිතුවක්කු මහතා විසින් ඕස්ට්රේලියාවේ 1982 අංක 3 දරන තොරතුරු දැනගැනීමේ අයිතිය පිළිබඳ පනතේ 15 වන වගන්තිය ප්රකාරව එරට ස්වදේශ කටයුතු දෙපාර්තමේන්තුවෙන් මෙම තොරතුරු ඉල්ලා සිටිනු ලැබ ඇත.
අදාළ තොරතුරු ලබාදීමට මුලින් කැමැත්ත පළ කළ ද, පසුව ඕස්ට්රේලියානු බලධාරීන් එම ඉල්ලීම ඉවත දමා ඇති බව නීතිඥ කොඩිතුවක්කු මහතා ප්රකාශ කර තිබේ. සූරියප්පෙරුම මහතා ඕස්ට්රේලියානු පුරවැසියෙකු නොවේ නම් එම දෙපාර්තමේන්තුවට ඒ බව සෘජුවම පැහැදිලි කිරීමට ඉඩ තිබූ බවත්, මෙලෙස තොරතුරු වසන් කිරීම හරහා බරපතළ සැකයක් නිර්මාණය වන බවත් ඔහු පෙන්වා දෙයි. ආණ්ඩුක්රම ව්යවස්ථාව උල්ලංඝනය කරමින් ජාතික ජන බලවේගයේ (NPP) ජාතික ලැයිස්තුව හරහා සූරියප්පෙරුම මහතා පාර්ලිමේන්තුවට පිවිසීමේ සිද්ධිය සම්බන්ධයෙන් ඉදිරියේදී අධිකරණ ක්රියාමාර්ග ගැනීමට අපේක්ෂා කරන බව ද ඔහු වැඩිදුරටත් සඳහන් කර ඇත.
2024 නොවැම්බර් සිට 2025 ජූනි දක්වා කාලය තුළ හිටපු මුදල් හා ක්රමසම්පාදන නියෝජ්ය අමාත්යවරයා ලෙස කටයුතු කළ සූරියප්පෙරුම මහතා, භාණ්ඩාගාරයෙන් අතුරුදන් වූ බව කියන ඇමරිකානු ඩොලර් මිලියන 2.5ක මුදල සම්බන්ධ චෝදනාවලට ද මැදිව සිටියි. ඕස්ට්රේලියාවෙන් ලබාගත් ණය මුදලක වාරිකයක් ලෙස තෙවන පාර්ශවයකට ගෙවන ලද මෙම මුදල සම්බන්ධයෙන් බරපතළ විනිවිදභාවයේ ගැටලුවක් පවතින බව නාගානන්ද කොඩිතුවක්කු මහතා අවධාරණය කරයි. මේ අතර, මීට පෙර ද්විත්ව පුරවැසිභාවය පිළිබඳ නීතිමය ගැටලු හේතුවෙන් ගීතා කුමාරසිංහ සහ ඩයනා ගමගේ යන මහත්මීන්ට සිය පාර්ලිමේන්තු මන්ත්රී ධුර අහිමි වූ ආකාරය ද 'දි අයිලන්ඩ්' පුවත්පත් වාර්තාව මගින් මතක් කර දී තිබේ.