මියන්මාරයේ ප්රජාතන්ත්රවාදී නායිකා අවුන් සාන් සූ කී මහත්මිය සහ ජාත්යන්තර රතු කුරුස සංවිධානයේ නිලධාරියෙකු අතර විශේෂ හමුවක් පසුගිය සඳුදා දිනයේදී සිදුවී තිබේ. ඇයගේ සෞඛ්ය තත්ත්වය සම්බන්ධයෙන් ඇයගේ ආධාරකරුවන් අතර දැඩි කනස්සල්ලක් පැවති පසුබිමක, මෙම හමුවීම හරහා ඇය තවමත් ජීවතුන් අතර සිටින බවට පැහැදිලි සාක්ෂි සපයා ඇත.
රතු කුරුස සංවිධානයේ නේවාසික නියෝජිත ආර්නෝ ඩි බෙක් මහතා සමඟ ඇය මෙම සාකච්ඡාවට එක්වී ඇති අතර, මියන්මාර ජනාධිපති කාර්යාලය විසින් සිය නිල ටෙලිග්රෑම් නාලිකාව ඔස්සේ නිකුත් කළ නිවේදනයක් මගින් මේ බව තහවුරු කර තිබුණි. වසර ගණනාවකින් ඇය පිළිබඳ කිසිදු තොරතුරක් දැනගැනීමට නොලැබුණු බව පවසමින් ඇයගේ පවුලේ සාමාජිකයින් සහ ලන්ඩනයේ වෙසෙන ඇයගේ පුත් කිම් අරිස් විසින් ඇය ජීවතුන් අතර සිටින බවට සාක්ෂි ලබා දෙන ලෙස මියන්මාර බලධාරීන්ට දිගින් දිගටම බලපෑම් කරමින් සිටියහ.
මෙම හමුවීම මියන්මාරයේ වත්මන් හමුදා පාලකයින්ට ජාත්යන්තරය හමුවේ සිය නීත්යානුකූලභාවය තහවුරු කර ගැනීම සඳහා යම් පිටිවහලක් වනු ඇතැයි විචාරකයෝ මත පළ කරති. මියන්මාරයේ හමුදා රජය සහ ප්රජාතන්ත්රවාදී ක්රියාකාරීන් මෙන්ම විවිධ ජනවාර්ගික කණ්ඩායම් අතර මේ වන විටත් දැඩි සිවිල් යුද තත්ත්වයක් පවතින අතර, චීනයේ සහාය ලබන මියන්මාර හමුදාව මෑතකදී එහි යම් ප්රගතියක් අත්කර ගෙන ඇති බවද වාර්තා වේ. කෙසේ වෙතත්, වත්මන් ජනාධිපති සහ හිටපු හමුදා ප්රධානී මින් අවුන් හ්ලයින්ග්ගේ නායකත්වයෙන් යුත් රජය විසින් මෙම හමුවීමට හේතුව හෝ එහිදී සාකච්ඡා වූ කරුණු පිළිබඳව මෙතෙක් කිසිවක් අනාවරණය කර නොමැත.
ජනාධිපති කාර්යාලයේ ප්රකාශිකා ඛයින් ඛයින් සෝ මහත්මිය පසුව පණිවිඩයක් නිකුත් කරමින් සඳහන් කර තිබුණේ 81 හැවිරිදි වියේ පසුවන සූ කී මහත්මිය යහපත් සෞඛ්ය තත්ත්වයෙන් පසුවන බවයි. මෙම හමුවීම සනාථ කිරීම සඳහා ඇය රතු කුරුස නිලධාරියා සමඟ අතට අත දෙන අයුරු සහ ඔවුන් දෙදෙනා අසුන්ගෙන සිටින අයුරු දැක්වෙන ඡායාරූප කිහිපයක්ද සඳුදා දිනයේදී මාධ්ය වෙත මුදාහැර තිබුණි. නිදහස අහිමි වූ පුද්ගලයින් බැහැදැකීම සඳහා වන තම සංවිධානයේ සම්මත ක්රියාපටිපාටීන්ට අනුකූලව මෙම හමුවීම සිදුවූ බවත්, එහිදී පෞද්ගලිකව අදහස් හුවමාරු කර ගැනීමට අවස්ථාව හිමිවූ බවත් රතු කුරුස සංවිධානය ප්රකාශ කළද, සූ කී මහත්මියගේ සෞඛ්ය තත්ත්වය පිළිබඳව ඔවුන් විසින් කිසිදු නිල තක්සේරුවක් ඉදිරිපත් කර නොමැත.
