හිටපු අමාත්ය විමල් වීරවංශ මහතා විසින් ශ්රේෂ්ඨාධිකරණය වෙත ඉදිරිපත් කර තිබූ අභියාචනා පෙත්සමක් සම්පූර්ණයෙන්ම නිෂ්ප්රභ කිරීමට එම අධිකරණය අද පියවර ගත්තේය. "නැත්ත වෙනුවට ඇත්ත" නමැති ග්රන්ථය ප්රකාශයට පත් කිරීම තුළින් බුද්ධිමය දේපළ පනත උල්ලංඝණය කර ඇති බවට කොළඹ වාණිජ මහාධිකරණය ලබා දී තිබූ තීන්දුවකට එරෙහිව මෙම අභියාචනය ගොනු කර තිබුණි.
ඒ අනුව, ජනතා විමුක්ති පෙරමුණේ ප්රධාන ලේකම් ටිල්වින් සිල්වා මහතා වෙත රුපියල් මිලියනයක හානිපූර්ණ වන්දියක් ගෙවන ලෙස වාණිජ මහාධිකරණය මින් පෙර නිකුත් කර තිබූ නියෝගය ශ්රේෂ්ඨාධිකරණය විසින් ස්ථිර කරනු ලැබීය.මෙම නඩු තීන්දුවත් සමඟ ශ්රේෂ්ඨාධිකරණය විසින් හිටපු අමාත්යවරයා වෙත විශේෂ වාරණ නියෝගයක් ද පනවනු ලැබීය. ඒ අනුව, අදාළ කෘතියට ඇතුළත් කර ඇති ජනතා විමුක්ති පෙරමුණට සම්බන්ධ ලේඛන මින් ඉදිරියට මුද්රණය කිරීම, බෙදා හැරීම හෝ අලෙවි කිරීම සම්පූර්ණයෙන්ම තහනම් වන අතර, බුද්ධිමය දේපළ අයිතිවාසිකම් උල්ලංඝණය වන කිසිදු ක්රියාවක නිරත නොවන ලෙස ද වගඋත්තරකරුට දන්වා ඇත.
මෙම නීතිමය ක්රියාමාර්ගය ආරම්භ වූයේ ටිල්වින් සිල්වා මහතා විසින් කොළඹ වාණිජ මහාධිකරණය හමුවේ පවරන ලද නඩුවක් ද සමඟිනි. තමන් ජනතා විමුක්ති පෙරමුණේ සිටියදී පක්ෂ විධායක මණ්ඩලයට ඉදිරිපත් කළ අදහස් මෙන්ම යෝජනා, විමල් වීරවංශ මහතා විසින් තම කෘතියට අනවසරයෙන් ඇතුළත් කර ඇති බවට ඔහු එහිදී චෝදනා කළේය. එමඟින් තම බුද්ධිමය දේපළ අයිතිය උල්ලංඝණය වී ඇති බව පැමිණිලිකාර ටිල්වින් සිල්වා මහතා අධිකරණය හමුවේ පෙන්වා දී තිබුණි.
දීර්ඝ නඩු විභාගයකින් අනතුරුව, 2019 වසරේ ජනවාරි මස 11 වැනිදා කොළඹ වාණිජ මහාධිකරණය විසින් ප්රකාශයට පත් කරන ලද තීන්දුවේ සඳහන් වූයේ "නැත්ත වෙනුවට ඇත්ත" ග්රන්ථයේ අන්තර්ගත අදාළ කොටස්වල සැබෑ හිමිකාරිත්වය හිමිවිය යුත්තේ ටිල්වින් සිල්වා මහතාට බවයි. එම මහාධිකරණ නියෝගයට එරෙහිව ඉදිරිපත් වූ අභියාචනයේ අවසන් තීන්දුව ශ්රේෂ්ඨාධිකරණ විනිසුරු සෝභිත රාජකරුණා මහතා විසින් අද දින ප්රකාශයට පත් කරන ලදී.