බ්රිතාන්යයේ සමාජ ඒකාබද්ධතාව සහ ජාතික අනන්යතාව සම්බන්ධයෙන් පවතින ගැටලුකාරී තත්ත්වයන් පිළිබඳව නවතම මත විමසුමකින් කරුණු අනාවරණය වී තිබේ. 'බ්රිතාන්යය පීඩනය යටතේ' (Britain Under Strain) යන මැයෙන් එළිදැක්වූ වාර්තාවකට අනුව, බ්රිතාන්ය වැසියන්ගෙන් 40% කට වැඩි පිරිසක් විශ්වාස කරන්නේ මුස්ලිම් ජාතිකයන්ට බ්රිතාන්ය සමාජය සමඟ ඒකාබද්ධ වීමට නොහැකි බවයි.
බ්රිතාන්ය රජයේ හිටපු අන්තවාද විරෝධී කොමසාරිස්වරියක වන ඩේම් සාරා ඛාන් මහත්මිය පෙන්වා දෙන්නේ, ජාතික අනන්යතාව කෙරෙහි පවතින විශ්වාසය රට තුළ බිඳ වැටෙමින් පවතින බවයි. විවිධත්වය හේතුවෙන් බ්රිතාන්ය අනන්යතාව අතුරුදහන් වෙමින් පවතින බව බ්රිතාන්ය වැසියන්ගෙන් 55% ක් විශ්වාස කරන අතර, සමාජය පාලනය කරන නීති සහ ආයතන කෙරෙහි පවතින 'සමාජ ගිවිසුම' බිඳ වැටී ඇති බව 61% ක පිරිසක් ප්රකාශ කරති.
මෙම වාර්තාවට සමගාමීව සිදුකළ මත විමසුමකදී, සුදු ජාතිකයන් නොවන පුද්ගලයන් කිසිවිටෙකත් සුදු ජාතිකයින් තරම් බ්රිතාන්යයන් නොවන බවට 31% ක් අදහස් දක්වා ඇත. එමෙන්ම, බ්රිතාන්ය වැසියන්ගෙන් 33% ක් පිරිසක් නැවත තම මව් රටවල් කරා යෑමේ ප්රතිපත්තියක් (remigration) සඳහා සහාය පළ කරන අතර, මෙම මතය ප්රතිසංස්කරණවාදී බ්රිතාන්ය පක්ෂයේ (Reform UK) ආධාරකරුවන් අතර 71% ක් දක්වා ඉහළ අගයක් ගනී.
කෙසේ වෙතත්, බ්රිතාන්ය මුස්ලිම් ජාතිකයන් සම්බන්ධයෙන් කරන ලද වෙනම සමීක්ෂණයකින් ඊට හාත්පසින්ම වෙනස් ප්රතිඵල ලැබී ඇත. ඒ අනුව, බ්රිතාන්ය මුස්ලිම්වරුන්ගෙන් 85% ක් සමාජ ඒකාබද්ධතාවට කැමැත්ත පළ කර ඇති අතර, අනෙකුත් ආගමික කණ්ඩායම් සමඟ සුහදව ජීවත් වීමට සහ තම ආගම නිදහසේ ඇදහීමට අවස්ථාව ලැබී ඇතැයි ඔවුන් පවසති. එසේ වුවද, 64% ක් විශ්වාස කරන්නේ සුදු ජාතිකයින් තමන්ට එරෙහිව කටයුතු කරන බවයි.
සමාජ ආයතන කෙරෙහි පවතින ගෞරවය හීන වීම ද බරපතළ කරුණක් බව වාර්තාව පෙන්වා දෙයි. බ්රිතාන්ය වැසියන්ගෙන් 28% ක් විශ්වාස කරන්නේ වෙනසක් ඇති කිරීමේදී බාධාවන නීති සහ ආයතන නොසලකා හැරිය යුතු බවයි. එසේම, දේශපාලන ප්රචණ්ඩත්වය කිසිසේත්ම පිළිගත නොහැකි බව බහුතරයක් ප්රකාශ කළ ද, වයස අවුරුදු 18 ත් 34 ත් අතර තරුණ පිරිසෙන් 29% ක් ප්රචණ්ඩත්වය අනුමත කළ හැකි බව ප්රකාශ කර තිබීම විශේෂත්වයකි.