බටහිර ඉන්දීය කොදෙව් දූපත්හි සංචාරයක නිරත ශ්රී ලංකා කණ්ඩායම සහ කොදෙව් කණ්ඩායම අතර පැවැත්වෙන දෙවන ටෙස්ට් ක්රිකට් තරගය අද (03) ඇන්ටිගුහාහිදී ආරම්භ වීමට නියමිතව ඇත. දෙරට අතර පැවැති පළමු ටෙස්ට් තරගයෙන් ඉනිමකින් සහ ලකුණු 217ක දැවැන්ත පරාජයකට මුහුණ දීමට ශ්රී ලංකා කණ්ඩායමට සිදු විය.
එම පසුබෑම හමුවේ වුවද දෙවන තරගයට මුහුණ දීමට සූදානම් වන ශ්රී ලංකා පිලේ ක්රීඩකයින් කිහිප දෙනෙකුම මේ වනවිට ආබාධවලට ලක්ව සිටීම හේතුවෙන් සමස්ත කණ්ඩායමම දැඩි අර්බුදයකට ලක්ව තිබේ. මේ හේතුවෙන් තරගය සඳහා අවසන් එකොළොස් දෙනා තේරීමේ දැඩි අසීරු කාර්යයට මුහුණ දීමට සිදු වී ඇත්තේ ක්රීඩකයින් 13 දෙනෙකුගෙන් යුත් සීමිත සංචිතයක් මූලික කරගනිමිනි.ශ්රී ලංකා බලඇණියේ ප්රධාන වේගපන්දු යවන්නන් වන ළහිරු කුමාර මෙන්ම විශ්ව ප්රනාන්දු යන දෙදෙනාම ආබාධවලට ලක්ව සිටීම කණ්ඩායමට එල්ල වූ දැඩි පහරකි. මීට අමතරව අනෙක් වේගපන්දු යවන ක්රීඩක කසුන් රාජිත මෙම තරගයට ක්රීඩා කිරීම ද අවිනිශ්චිත මට්ටමක පවතින බැවින්, ඉසිත් විජේසුන්දරට මෙම තරගයේදී සිය මංගල ටෙස්ට් වරම් හිමි කර ගැනීමට වැඩි ඉඩකඩක් පවතී. මේ අතර දඟපන්දු යවන ක්රීඩක රමේෂ් මෙන්ඩිස් බැක්ටීරියා ආසාදනයකට ගොදුරු වීම හේතුවෙන් ඔහුට ද දෙවන ටෙස්ට් ක්රිකට් තරගයට ක්රීඩා කිරීමේ අවස්ථාව සම්පූර්ණයෙන්ම අහිමි වී තිබේ.
පිතිකරණ අංශය දෙස බැලීමේදී දක්ෂ ආරම්භක පිතිකරු පැතුම් නිස්සංක ද ආබාධයකට ලක්ව සිටින අතර, ඒ හේතුවෙන් ඔහුගේ ස්ථානය සඳහා ළහිරු උදාර කණ්ඩායමට කැඳවීමට නියමිත බව වාර්තා වේ. කෙසේ වෙතත්, පවතින අභියෝග මධ්යයේ ශ්රී ලංකා කණ්ඩායමට යම් බලාපොරොත්තුවක් එක් කරමින් විශේෂඥ දඟපන්දු යවන ක්රීඩක ප්රභාත් ජයසූරිය දෙවන ටෙස්ට් තරගය සඳහා ක්රීඩා කිරීමට නියමිත බවට තොරතුරු තහවුරු වී ඇත.