බටහිර අප්රිකානු මුහුදු තීරයේ ධීවර කටයුතු වල නිරත වන චීන සහ තායිවාන ටූනා ධීවර යාත්රා මගින් නීතිවිරෝධී ලෙස මෝරුන්ගේ වරල් කපා ගැනීමේ දැවැන්ත ජාවාරමක් ක්රියාත්මක වන බවට තොරතුරු අනාවරණය වී තිබේ. පණපිටින් සිටින මෝරුන්ගේ වරල් කපා ඔවුන්ව නැවත සාගරයට මුදා හැරීම හේතුවෙන් එම සතුන් දියේ ගිලී අමානුෂික ලෙස මිය යන බව පරිසරවේදීහු පෙන්වා දෙති.
මෙම වරල් සෙනගල් රාජ්යයේ ප්රධානතම වරායක් වන ඩකාර් වරාය වෙත ගෙන එනු ලබන අතර, පසුව ඒවා ආසියානු රටවල සාම්ප්රදායික ඖෂධ නිෂ්පාදනය සහ සුප් සැකසීම සඳහා අපනයනය කෙරේ.ලන්ඩනය පදනම් කරගත් 'Environmental Justice Foundation' (EJF) නම් රාජ්ය නොවන සංවිධානය විසින් නිකුත් කරන ලද වාර්තාවකට අනුව, මෑත කාලය තුළ මෙම නීතිවිරෝධී ක්රියාවලිය ඉතා සීඝ්රයෙන් ව්යාප්ත වී ඇත. 2020 සහ 2025 අතර කාලය තුළ අදාළ ධීවර යාත්රා වල සේවය කළ ඉන්දුනීසියානු සහ පිලිපීන ජාතික ධීවරයින් 124 දෙනෙකුගෙන් ලබාගත් සාක්ෂි මත මෙම වාර්තාව සකස් කර තිබේ. එම කාල වකවානුව තුළ අත්ලාන්තික් සාගරයේ ධීවර කටයුතු කළ යාත්රා 130කින් 71ක් ඩකාර් වරායට පැමිණ ඇති අතර, ඉන් යාත්රා 41ක් මෙම මෝර වරල් ජාවාරමට සම්බන්ධ වී ඇති බව තහවුරු වී ඇත. එමෙන්ම ඉන් යාත්රා 24ක් සෘජුවම ඩකාර් වරායට මෝර වරල් ගොඩබා තිබේ.
මෙම ජාවාරම බොහෝ විට රාත්රී කාලයේදී රහසිගතව සිදු කෙරෙන බව අනාවරණය වී ඇත. 2018 සිට 2020 දක්වා චීන ධජය සහිත යාත්රාවක සේවය කළ ජමාලුඩින් නම් 29 හැවිරිදි ඉන්දුනීසියානු ජාතික ධීවරයා පවසා ඇත්තේ, තමන් දිනපතා මෝරුන්ගේ වරල් කපා දැමූ බවත්, වරායේ පොලිස් නිලධාරීන් නොමැති අවස්ථාවලදී ඉතා රහසිගතව එම වරල් ගොඩබෑ බවත්ය. සෙනගල් රාජ්යයේ ධීවර ආරක්ෂක දෙපාර්තමේන්තුවේ පරීක්ෂකවරයෙකු වන ෂෙයික් එන්ඩියායේ ප්රකාශ කරන්නේ, රාත්රී කාලයේ වරාය තුළ මිනිසුන් ගැවසීම අඩු බැවින් මෙවැනි නීතිවිරෝධී කටයුතු වඩාත් පහසුවෙන් සිදු වන බවයි.
කාර්මික මත්ස්ය කර්මාන්තයේ ඍජු බලපෑම හේතුවෙන් 1970 වසරේ සිට මේ දක්වා ගෝලීය මෝර ගහනය සියයට 71කින් පමණ පහත වැටී ඇති බව 'Nature' සඟරාවේ පළ වූ අධ්යයනයකින් තහවුරු වී ඇත. ධීවර කටයුතු හේතුවෙන් සෑම වසරකම මෝරුන් මිලියන 80ත් 101ත් අතර ප්රමාණයක් ඝාතනයට ලක්වන අතර, විවෘත සාගරයේ ජීවත් වන මෝරුන්ගෙන් සියයට 70ක් පමණ වඳවී යාමේ දැඩි තර්ජනයකට ලක්ව ඇති බව ජාත්යන්තර ස්වභාව සංරක්ෂණ සංගමය (IUCN) පෙන්වා දෙයි. මෙම අමානුෂික සහ නාස්තිකාර ක්රියාවලිය නැවැත්වීම සඳහා මෝරුන් ගොඩබිමට ගෙන එන විට ඔවුන්ගේ වරල් ශරීරයට ස්වාභාවිකව සම්බන්ධ වී තිබීම අනිවාර්ය කරන ගෝලීය ප්රතිපත්තියක් කඩිනමින් ක්රියාත්මක කළ යුතු බව ජර්මානු සමුද්රීය රාජ්ය නොවන සංවිධානයක් නියෝජනය කරන අයිරිස් සීග්ලර් අවධාරණය කරයි.
