ජපානයට බලපා ඇති දැඩි උෂ්ණ තරංගය හේතුවෙන් මේ වන විට පුද්ගලයන් සිය ගණනක් රෝහල්ගත කර ඇති අතර, අදාළ බලධාරීන් විසින් එය 'ආපදාවක්' ලෙස හඳුන්වා දී තිබේ. බ්රහස්පතින්දා නිකුත් කළ වාර්තා අනුව, ටෝකියෝ නුවර පමණක් බදාදා දිනය තුළ පුද්ගලයන් 453 ක් තාපය ආශ්රිත රෝගාබාධ සඳහා රෝහල් ප්රතිකාර ලබාගෙන ඇත.
ටෝකියෝ ගිනි නිවන දෙපාර්තමේන්තුව පවසන පරිදි මෙය 2010 වසරේ වාර්තා තැබීම ආරම්භ කළ පසු වාර්තා වූ ඉහළම අගය වේ. එසේම හදිසි ඇමතුම් ප්රමාණය ද 1963 වසරෙන් පසු ඉහළම මට්ටමට පැමිණ ඇති බව නිලධාරීහු තවදුරටත් සඳහන් කරති.පසුගිය සතිය පුරා මෙම දැඩි උෂ්ණත්වය හේතුවෙන් ජපානය පුරා අවම වශයෙන් පුද්ගලයන් 14 දෙනෙකු මියගොස් ඇති බව ගිනි හා ආපදා කළමනාකරණ ඒජන්සිය බදාදා වාර්තා කළේය. තවද, රට පුරා පුද්ගලයින් 11,000 ක් පමණ හදිසි වෛද්ය ප්රතිකාර ලබාගෙන ඇති බව ද එම වාර්තාවල දැක්වේ. මිලියන 14 ක පමණ ජනගහනයක් වෙසෙන ටෝකියෝ ප්රාන්තයේ එක් අයෙකු මියගොස් ඇති අතර, තවත් සිව් දෙනෙකු අසාධ්ය තත්ත්වයේත්, 18 දෙනෙකු බරපතල තත්ත්වයේත් පසුවෙති. මීට අමතරව, නගෝයා නගරය ද ඇතුළත් වන අයිචි කලාපයෙන් බදාදා දිනයේ පමණක් පුද්ගලයින් 116 දෙනෙකු රෝහල්ගත කර ඇති බව වාර්තා වේ.
මිලියන 125 ක් පමණ වන සමස්ත ජපාන ජනගහනයෙන් වැඩි පිරිසකට බලපාන පරිදි රටේ බොහෝ ප්රදේශ සඳහා තාප ආඝාත (heatstroke) අනතුරු ඇඟවීම් නිකුත් කර තිබේ. බ්රහස්පතින්දා පස්වරුව වන විට ස්ථාන හයක උෂ්ණත්වය සෙල්සියස් අංශක 40 (40C) හෝ ඊට වැඩි අගයක් ගත් අතර, තවත් ස්ථාන තුනක එය 39.9C දක්වා ඉහළ ගියේය. වැඩිම උෂ්ණත්වය මධ්යම ෂිසුවෝකා කලාපයේ හමාමට්සු ප්රදේශයෙන් 41.1C ක් ලෙස වාර්තා වූ අතර, අසල්වැසි අයිචි කලාපයේ ටොයෝටා නගරයෙන් 40.8C ක් ද මියේ හි කුවානා ප්රදේශයෙන් 40.7C ක් ද වාර්තා විය.
ජපානයේ මෙතෙක් වාර්තා වී ඇති ඉහළම උෂ්ණත්වය ටෝකියෝ නුවරට උතුරින් පිහිටි ඉසෙසාකි හිදී 41.8C ක් ලෙස සටහන් වී තිබේ. මෙම වසරේ සිට සෙල්සියස් අංශක 40 ට වැඩි උෂ්ණත්වයක් සහිත දින හැඳින්වීම සඳහා "කොකුෂොබි" (kokushobi) හෙවත් "කෲර ලෙස උණුසුම් දිනය" (cruelly hot day) නමින් නව යෙදුමක් ද එරට බලධාරීන් විසින් හඳුන්වා දී ඇත. මිනිස් ක්රියාකාරකම් හේතුවෙන් සිදුවන දේශගුණික විපර්යාස නිසා මෙවැනි අන්තගාමී උෂ්ණත්ව තත්ත්වයන්ගේ වාර ගණන සහ තීව්රතාවය වැඩි වෙමින් පවතින බව විද්යාඥයෝ පෙන්වා දෙති. ජපානයට පැමිණ සිටින විදෙස් සංචාරකයින් පවා පවසන්නේ වායුසමීකරණය කළ ස්ථාන නිරන්තරයෙන් සොයා යෑමට ඔවුන්ට සිදුව ඇති බවත්, මෙම උණුසුම් තත්ත්වය අතිශය දරුණු මට්ටමක පවතින බවත්ය.