පසුගිය සෙනසුරාදා රාත්රියේ ජර්මනියේ බර්ලින් නුවර පැවති ප්රයිඩ් (Pride) උත්සවයකට රැස්ව සිටි පිරිසක් වෙත කුඩා ප්රමාණයේ වෑන් රථයක් ධාවනය කරවීමෙන් එක් පුද්ගලයෙකු ජීවිතක්ෂයට පත්ව තවත් 29 දෙනෙකු තුවාල ලබා ඇත. මෙම ප්රහාරයේ ප්රධාන සැකකරු ලෙස සැලකෙන පුද්ගලයා ඉරිදා සවස ජර්මානු විශේෂ පොලිස් බලකාය විසින් වෙඩි තබා ඝාතනය කර තිබේ.
මෙලෙස මියගොස් ඇත්තේ අබ්දුල් බැලවුට් නමැති 21 හැවිරිදි ජර්මානු ජාතිකයෙකි. බර්ලිනයේ බටහිර ප්රදේශයේ පිහිටි ස්පැන්ඩව් (Spandau) දිස්ත්රික්කයේදී පොලිසිය විසින් ඔහුව අත්අඩංගුවට ගැනීමට උත්සාහ කළ අවස්ථාවේදී ඔහු පිහියකින් පොලිස් නිලධාරීන්ට පහර දී ඇති බව පොලිස් මාධ්ය ප්රකාශක ෆ්ලෝරියන් නාත් ප්රකාශ කළේය. ඊට ප්රතිචාර දක්වමින් නිලධාරීන් විසින් එල්ල කළ වෙඩි ප්රහාරවලින් බරපතල තුවාල ලැබූ සැකකරු එම ස්ථානයේදීම මිය ගොස් ඇත.
මෙම මූලික ප්රහාරය සෙනසුරාදා රාත්රී 10.00 න් පමණ පසුව සිදුවී ඇත. පිරිස අතරට කඩා වැදුණු වෑන් රථය පසුව ගසක හැපී නතර වී ඇති අතර, ඉන්පසු රියදුරු විසින් අතහැර දමා ගොස් තිබේ. අනතුරුව ඔහු විසින් මාර්ගයේ ගමන් කළ පුද්ගලයින්ට විශාල පිහියකින් (machete) පහර දී ඇත. තුවාල ලැබූ 29 දෙනාගෙන් කිහිප දෙනෙකුගේ තත්ත්වය බරපතල වුවද ඔවුන් කිසිවෙකුගේ ජීවිතවලට අවදානමක් නොමැති බව බලධාරීන් තහවුරු කළේය. තවද, ප්රහාරය සිදුවන අවස්ථාවේ වෑන් රථයේ තවත් සැකකරුවෙකු සිටි බවට ලැබෙන වාර්තා පිළිබඳවද විමර්ශකයන්ගේ අවධානය යොමු වී තිබේ.
මියගිය බැලවුට් මීට පෙරද ත්රස්තවාදී ක්රියාවන්ට සම්බන්ධව චෝදනා ලැබූවෙකි. සිරියාවේ අයි.එස් (ISIS) ත්රස්ත සංවිධානයට එක්වීමට උත්සාහ කිරීමේ චෝදනාව මත 2025 වසරේදී ලෙබනනයේදී ඔහුට මාස තුනක සිරදඬුවමක් නියම වී තිබුණි. පසුව ඔහුව ජර්මනියට පිටුවහල් කර ඇති අතර, එහිදී ත්රස්ත ප්රහාරයක් සැලසුම් කිරීම සම්බන්ධයෙන් ඔහු වරදකරු වුවද, පෙර රිමාන්ඩ් භාරයේ ගත කළ මාස හයක කාලය සලකා බලා විනිසුරුවරයා විසින් ඔහුගේ සිරදඬුවම අත්හිටුවා තිබුණි. ජර්මානු අභ්යන්තර කටයුතු අමාත්ය ඇලෙක්සැන්ඩර් ඩොබ්රින්ඩ්ට් සඳහන් කළේ සැකකරුගේ මව ලෙබනනයේ උපත ලබා පසුව ජර්මානු පුරවැසිභාවය ලබා ගත් තැනැත්තියක් බවයි.
මෙම සිදුවීමත් සමග සංවිධායකයින් විසින් ක්රිස්ටෝපර් ස්ට්රීට් ඩේ (Christopher Street Day) ප්රයිඩ් උත්සවය වහාම නතර කිරීමට පියවර ගන්නා ලදී. ජර්මානු චාන්සලර් ෆ්රෙඩ්රික් මර්ස් 'X' සමාජ මාධ්ය ජාලය ඔස්සේ මෙම ප්රහාරය පිළිකුල්සහගත ක්රියාවක් ලෙස හඳුන්වමින්, නීතියේ උපරිම බලය යොදවා මේ පිළිබඳව විමර්ශනය කරන බව ප්රකාශ කළේය. මෙම ප්රහාරය ජර්මනිය තුළ ආරක්ෂාව සහ මුස්ලිම් සංක්රමණිකයින් පිළිබඳ විවාදය නැවතත් ඇති කිරීමට හේතු වී ඇති අතර, එළඹෙන මැතිවරණයේදී සංක්රමණික විරෝධී අන්ත දක්ෂිණාංශික 'AfD' පක්ෂය වෙත ඇති සහයෝගය තවදුරටත් වර්ධනය වීමට මෙය බලපානු ඇතැයි දේශපාලන විශ්ලේෂකයෝ මත පළ කරති.
