ජෙෆ්රි එප්ස්ටයින් (Jeffrey Epstein) වෙනුවෙන් තරුණ කාන්තාවන් බඳවා ගත් බවට චෝදනා එල්ල වූ මෝස්තර නිරූපණ ක්ෂේත්රයේ බඳවාගැනීම් නිලධාරියෙකු වන ඩැනියෙල් සියාඩ් (Daniel Siad) ප්රංශයේ පැරිස් නුවරට ආසන්නයේ පිහිටි සිය නිවසේදී මියගොස් සිටියදී සොයාගෙන ඇත. 69 හැවිරිදි සියාඩ්, එප්ස්ටයින්ගේ ජාලයට සම්බන්ධ බවට සැක කෙරෙන ප්රංශ ජාතිකයන් කිහිප දෙනෙකුගෙන් අයෙකු වන අතර, සඳුදා සවස ඔහුගේ මළ සිරුර හමුවී තිබේ.
මෙම මරණයට හේතුව මෙතෙක් අනාවරණය වී නොමැති අතර, ඒ පිළිබඳව විමර්ශනයක් ආරම්භ කර පශ්චාත් මරණ පරීක්ෂණයක් පැවැත්වීමට නියමිත බව බලධාරීහු තහවුරු කරති.මානව ජාවාරම්, ස්ත්රී දූෂණ සහ තවත් අපරාධ චෝදනා රැසක් සම්බන්ධයෙන් ප්රංශ අභිචෝදකයන් විසින් ඔහු පිළිබඳව විමර්ශන සිදු කරමින් පැවතුණි. විශේෂයෙන්ම, මෙම වසරේදී ප්රසිද්ධියට පත් කරන ලද අමෙරිකානු අධිකරණ දෙපාර්තමේන්තුවට අයත් ජෙෆ්රි එප්ස්ටයින් සම්බන්ධ ලිපිගොනු දහසකට අධික ප්රමාණයක සියාඩ්ගේ නම සඳහන් වී තිබීම ඔහුගේ ක්රියාකාරකම් පිළිබඳ සැක මතු කිරීමට ප්රබල හේතුවක් විය. කෙසේ වෙතත්, විමර්ශකයන් විසින් ඔහුගෙන් මෙතෙක් ප්රශ්න කර නොතිබූ අතර, ඔහු මිය යාමට පෙර තමාට එල්ල වී ඇති සියලු චෝදනා ප්රතික්ෂේප කරමින් තමාගේ නිර්දෝෂීභාවය ප්රකාශ කිරීමට අපේක්ෂාවෙන් සිටි බවද සඳහන් වේ.
ලොව පුරා සංචාරය කරමින් මෝස්තර නිරූපණ ක්ෂේත්රය සඳහා කාන්තාවන් සොයා ගැනීමේ මුවාවෙන් ඔහු එප්ස්ටයින්ගේ අවශ්යතා සපුරාලීමට කටයුතු කර ඇති බව අනාවරණය වී ඇත. 2014 වසරේදී එප්ස්ටයින් වෙත යැවූ විද්යුත් තැපෑලකදී ඔහු සිය රාජකාරිය 'මසුන් ඇල්ලීමකට' සමාන කර තිබූ අතර, එප්ස්ටයින්ගේ මරණයට මාස කිහිපයකට පෙර දක්වාම ඔවුන් දෙදෙනා අතර සමීප සබඳතා සහ මුදල් ගනුදෙනු සිදුවී තිබේ. ඔහු පැරිස්, නිව්යෝර්ක් සහ මියාමි හි ප්රධාන පෙළේ නියෝජිතයෙකු වූ ජීන්-ලුක් බෲනෙල් (Jean-Luc Brunel) යටතේ ද කොමිස් පදනම මත දශක හතරකට වැඩි කාලයක් සේවය කර ඇති අතර බෲනෙල් ද 2022 වසරේදී ලිංගික අපයෝජන චෝදනා මත සිරගතව සිටියදී සියදිවි නසාගන්නා ලදී.
හිටපු ස්වීඩන් ජාතික මෝස්තර නිරූපණ ශිල්පිණියක වන එබ්බා කාල්සන් (Ebba Karlsson) විසින් සියාඩ්ට එරෙහිව දූෂණ චෝදනා ගොනු කර තිබූ අතර, ඇය පවසන්නේ 1990 වසරේදී ස්ටොක්හෝම් හිදී තමාට වයස අවුරුදු 20 දී ඔහු විසින් තමාව බඳවා ගෙන පසුව ප්රංශයේදී දූෂණය කළ බවයි. සියාඩ්ගේ මරණය පිළිබඳව අදහස් දක්වමින් ඇය ප්රකාශ කර තිබුණේ, ඔහුව අත්අඩංගුවට ගැනීමට ඉතා ආසන්නව තිබියදී මෙලෙස මිය යාමෙන් තමන්ට යුක්තිය ඉටු කර ගැනීමට තිබූ අවස්ථාව මඟහැරී යාම දැඩි කණගාටුවට කරුණක් බවයි. සියාඩ් සහ එප්ස්ටයින් අතර හුවමාරු වූ පණිවිඩ හරහා ස්ලෝවැකියාව, පෝලන්තය, චෙක් ජනරජය සහ හංගේරියාව වැනි රටවලින් කාන්තාවන් සෙවීම පිළිබඳව සාකච්ඡා කර ඇති බවද එම ලිපිගොනු මගින් තවදුරටත් තහවුරු වී ඇත.
චෝදනාවලට ප්රතිචාර දක්වමින් සියාඩ් ප්රංශ රූපවාහිනියට පවසා තිබුණේ, තමා එප්ස්ටයින්ට කාන්තාවන් හඳුන්වා දුන්නේ වික්ටෝරියාස් සීක්රට් (Victoria's Secret) සහ MC2 වැනි පිළිගත් ආයතනවල නීත්යානුකූල මෝස්තර නිරූපණ කටයුතු සඳහා පමණක් බවත්, එප්ස්ටයින් තම විශ්වාසය කඩ කරමින් මෙවැනි අපරාධ සිදු කර ඇති බව තමා නොදැන සිටි බවත්ය. කාලයත් සමඟ එප්ස්ටයින්ගේ කෲරත්වය තමන්ටද වැටහුණු බව පැවසූ සියාඩ්, තමා කිසි දිනෙක බාලවයස්කරුවන්ව ඔහුට හඳුන්වා දී නොමැති බවත් තම කටයුතු හුදෙක් වෘත්තීය මට්ටමේ ඒවා පමණක් වූ බවත් මියයාමට පෙර ප්රකාශ කර තිබුණි.