ගාල්ල මහින්ද විද්යාලයේ සිසුවෙකු වන බිහදු බිනාල් සාමාන්ය පෙළ විභාගයෙන් විශිෂ්ටතම ප්රතිඵල වාර්තා කරමින් රටේම අවධානය දිනා ගැනීමට සමත්ව තිබේ. ඔහු සාමාන්යයෙන් සිසුන් මෙම විභාගයට මුහුණ දෙන වයස් සීමාවට පෙර, එනම් සිය පාසල් ජීවිතයේ 9 වන වසරේ පසුවෙද්දීම සාමාන්ය පෙළ විභාගය සඳහා පෙනී සිට ඇත.
එහිදී ‘ඒ’ සාමාර්ථ 9ක් වැනි ඉහළම ප්රතිඵලයක් ලබා ගැනීමට ඔහු සමත්ව ඇති අතර එම සුවිශේෂී සාර්ථකත්වය පිළිබඳව ඔහු පසුවන්නේ දැඩි සතුටකිනි. මීට පෙර වෙනත් කිසිවෙකු නොකළ ආකාරයේ අලුත් දෙයක් කිරීමට තිබූ දැඩි උනන්දුව නිසාම බිහදු මෙම තීරණය ගෙන තිබේ. බොහෝ දෙනෙකු 10 වන වසරේදී මෙවැනි උත්සාහයන් ගන්නා අයුරු දුටු ඔහුට, තමන්ට 9 වන වසරේදීම මෙය සාර්ථකව කළ හැකි බවට විශ්වාසයක් ඇතිවී ඇත.සිය පුතු 9 වන වසරේදී සාමාන්ය පෙළ විභාගයට ලියන බව පැවසූ අවස්ථාවේදී දෙමාපියන්ගෙන් ලැබුණේ මිශ්ර ප්රතිචාරයකි. ඔහුගේ මෑණියන් ආරම්භයේ සිටම මෙම අභියෝගාත්මක තීරණයට සිය පූර්ණ කැමැත්ත සහ සහයෝගය පළ කර තිබේ. කෙසේ වෙතත්, බිහදු 8 වන වසර අවසානයේදී මෙම අදහස ඉදිරිපත් කළ මුල් වකවානුවේදී ඔහුගේ පියා තුළ යම් අදිමදි කිරීමක් සහ සිතේ චකිතයක් හටගෙන තිබුණි. පසුව තම පුතුගේ දක්ෂතාව සහ හැකියාව හඳුනාගත් පියාද ඔහුට උපරිම අයුරින් සහයෝගය දැක්වීමට ඉදිරිපත් විය. තමන් අධ්යාපන කටයුතුවලදී පසුබෑමකට හෝ අධෛර්යයට පත් වූ සෑම අවස්ථාවකදීම ළඟින්ම හිඳිමින් තමන්ව නැවත නැගිටුවීමට කටයුතු කළේ තම ආදරණීය අම්මා සහ තාත්තා බව බිහදු කෘතවේදීව මතක් කර සිටියි. තමන්ට මේ තැනට පැමිණීමට ශක්තියක් වූ දෙමාපියන් ඇතුළු සැමට ඔහු සිය ස්තූතිය පුද කරයි.
මෙම විශිෂ්ට ජයග්රහණය වෙනුවෙන් බිහදු සාමාන්ය උපකාරක පන්ති සඳහා විශාල වශයෙන් සහභාගී වී නොමැති අතර, ඔහු වැඩි වශයෙන් සම්බන්ධ වී ඇත්තේ පුනරීක්ෂණ පන්ති සඳහා පමණි. ඔහු මෙලෙස කලින්ම විභාගයට මුහුණ දෙන බව දැනගත් පසු ගාල්ල මහින්ද විද්යාලයේ ගුරුභවතුන් මෙන්ම උපකාරක පන්තිවල ගුරුවරුන්ද ඔහු වෙනුවෙන් විශාල කැපවීමක් සිදු කර තිබේ. පාසල් ගුරුවරුන් විසින් ඔහුට අවශ්ය පසුගිය විභාග ප්රශ්න පත්ර ආදිය සොයා දෙමින් උදව් කර ඇති අතර, අනෙකුත් ගුරුවරුන්ද විෂය නිර්දේශයේ වැදගත් කොටස් සහ සෛද්ධාන්තික කරුණු ඉතා පැහැදිලිව කියා දෙමින් ඔහුව දිරිමත් කර ඇත. තමන්ව මේ සාර්ථකත්වය කරා මෙහෙයවූ ඒ සියලුම ගුරුභවතුන්ට බිහදු සිය ගෞරවපූර්වක ස්තූතිය පුද කර සිටියි.
තම පුතු අත්කර ගත් මෙම සුවිශේෂී ජයග්රහණය පිළිබඳව බිහදුගේ පියා අද වන විට අතිශය සතුටට පත්ව සිටියි. අන් අයට කිරීමට අපහසු සහ කිසිවෙකු නොකළ අලුත් අභියෝග ජය ගැනීම බිහදුගේ ලොකුම සිහිනයක් බව පවසන ඔහුගේ පියා, රටේ සෙසු දරු පරපුර වෙතද වටිනා පණිවිඩයක් සමාජගත කරයි. ශක්තිමත් අධිෂ්ඨානශීලී හිතක් ඇත්නම් ඕනෑම දරුවෙකුට ජීවිතයේ ජයගත නොහැකි කිසිදු දෙයක් නොමැති බව පවසන ඔහු, තමන්ට වඩා වෙනස් අලුත් දේවල් අත්හදා බලමින් රටට වැඩදායී සහ ඵලදායී පුරවැසියන් බවට පත්වන ලෙස සමස්ත දරුවන්ගෙන් ඉල්ලා සිටියි.
