හිටපු ජනාධිපති ගෝඨාභය රාජපක්ෂ මහතා පාස්කු ඉරිදා ත්රස්ත ප්රහාරයට සම්බන්ධ බවට මෙතෙක් කිසිදු සාක්ෂියක් අනාවරණය වී නොමැති බැවින්, නීතිවිරෝධී ලෙස ඔහුව අත්අඩංගුවට ගතහොත් ඔහුගේ මූලික නිදහස දැඩි ලෙස සීමා වනු ඇතැයි ජනාධිපති නීතිඥ රොමේෂ් ද සිල්වා මහතා ඊයේ (18) අභියාචනාධිකරණය හමුවේ අවධාරණය කළේය. බ්රිතාන්යයේ 'චැනල් ෆෝ' නාලිකාව විසින් මෑතකදී විකාශය කළ වැඩසටහනක අඩංගු කරුණු පදනම් කරගනිමින් ත්රස්තවාදය වැළැක්වීමේ පනත යටතේ තමන්ව අත්අඩංගුවට ගෙන රැඳවුම් නියෝග මත රඳවා තබා ගැනීම වළක්වන ලෙස ඉල්ලා හිටපු ජනාධිපතිවරයා විසින් ගොනු කරන ලද පෙත්සම සලකා බැලූ අවස්ථාවේදී මෙම කරුණු ඉදිරිපත් කෙරිණි.
අභියාචනාධිකරණයේ සභාපති විනිසුරු රොහන්ත අබේසූරිය සහ විනිසුරු සරත් දිසානායක යන මහත්වරුන්ගෙන් සමන්විත ද්විපුද්ගල විනිසුරු මඬුල්ලක් ඉදිරියේ මෙම පෙත්සම විභාගයට ගැනුණු අතර, එහි වගඋත්තරකරුවන් ලෙස පොලිස්පතිවරයා, රහස් පොලිස් අධ්යක්ෂ ශානි අබේසේකර මහතා ඇතුළු කණ්ඩායමක් නම් කර තිබේ. තම සේවාදායකයා සම්බන්ධයෙන් කොටුව මහේස්ත්රාත්වරයා විසින් මේ වන විටත් විදේශ ගමන් තහනමක් පනවා ඇති බව පෙන්වා දුන් ජනාධිපති නීතිඥවරයා, චැනල් ෆෝ නාලිකාවේ තොරතුරු මත ඕනෑම මොහොතක ඔහුව අත්අඩංගුවට ගැනීමේ දැඩි අවදානමක් පවතින බව අධිකරණයට දන්වා සිටියේය.
විශේෂයෙන්ම පෙත්සමේ වගඋත්තරකරුවකු වන වත්මන් රහස් පොලිස් අධ්යක්ෂ ශානි අබේසේකර මහතා යනු ගෝඨාභය රාජපක්ෂ මහතා ජනාධිපතිවරයා ලෙස කටයුතු කළ සමයේ බොරු සාක්ෂි නිර්මාණය කිරීමේ සිද්ධියක් මත අත්අඩංගුවට පත්වූ නිලධාරියෙකු බවත්, එවැනි අයෙකුගෙන් කිසිසේත්ම සාධාරණ හා අපක්ෂපාතී පරීක්ෂණයක් අපේක්ෂා කළ නොහැකි බවත් රොමේෂ් ද සිල්වා මහතා ප්රකාශ කළේය. කිසිදු පූර්ව පරීක්ෂණයකින් තොරව සහ සාක්ෂියක් නොමැතිව පුද්ගලයෙකු අත්අඩංගුවට ගැනීම ආණ්ඩුක්රම ව්යවස්ථාවේ ස්වාභාවික යුක්ති මූලධර්මයට පටහැනි බවත්, එය ශ්රේෂ්ඨාධිකරණය දුන් 'රාඩා නඩු තීන්දුවට' අනුවද පැහැදිලි වන බවත් පෙන්වා දුන් ඔහු, නීතිපති දෙපාර්තමේන්තුව රහස් පොලීසියේ රූකඩයක් මෙන් හැසිරෙන බවටද චෝදනා කළේය.
මෙහිදී වගඋත්තරකරුවන් වෙනුවෙන් අධිකරණය හමුවේ පෙනී සිටි අතිරේක සොලිසිටර් ජනරාල් ජනාධිපති නීතිඥ සුවර්ෂි හේරත් මහත්මිය ප්රතිචාර දක්වමින් ප්රකාශ කළේ, පෙත්සම්කාර පාර්ශ්වයේ නීතිඥවරයා අධිකරණයට වඩා ජනමාධ්ය වෙනුවෙන් කරුණු දක්වන බවක් හැඟී යන බවයි. නීතිඥ සනත් විජේවර්ධන මහතාගේ උපදෙස් මත ජනාධිපති නීතිඥ අලි සබ්රි මහතා ද පෙත්සම්කරු වෙනුවෙන් පෙනී සිටි අතර, පෙත්සම සම්බන්ධ වැඩිදුර විභාගය ලබන 24 වැනිදා පැවැත්වීමට අභියාචනාධිකරණය තීරණය කළේය.
