චීනය තුළ මෝටර් රථ නිෂ්පාදනය කර එරට දේශීය වෙළෙඳපොළ තුළම පමණක් අලෙවි කිරීමට මීට පෙර කටයුතු කළ විදේශීය මෝටර් රථ නිෂ්පාදකයින්, මේ වන විට සිය ඒකාබද්ධ ව්යාපාරික කර්මාන්තශාලා ගෝලීය අපනයන මධ්යස්ථාන බවට පත් කිරීමට පියවර ගනිමින් සිටී. චීනයේ පවතින කාර්යක්ෂම නිෂ්පාදන පරිසර පද්ධතිය, පිරිවැය වාසි සහ දියුණු දේශීය තාක්ෂණය උපයෝගී කර ගනිමින් ජාත්යන්තර වෙළෙඳපොළ තුළ සිය තරඟකාරිත්වය ඉහළ නැංවීම මෙම බහුජාතික සමාගම්වල මූලික උපාය මාර්ගය වී තිබේ.
මේ සම්බන්ධයෙන් සුවිශේෂී උනන්දුවක් දක්වන ජපානයේ නිසාන් (Nissan) සමාගම, දොන්ග්ෆෙන්ග් නිශාන් (Dongfeng Nissan) සමාගම විසින් නිෂ්පාදනය කරනු ලබන 'N7' සෙඩාන් රථය ලතින් ඇමරිකාවට සහ ගිනිකොනදිග ආසියාවට අපනයනය කිරීමට සැලසුම් කර ඇත. මීට අමතරව 'Frontier Pro' පිකප් රථය මැදපෙරදිග කලාපයට අපනයනය කිරීමටත්, 'NX8' වර්ගයේ SUV රථ අපනයනය කිරීමටත් ඔවුන් කටයුතු යොදමින් සිටී. බීජිං නුවර පැවැති මෝටර් රථ ප්රදර්ශනයකදී නිශාන් සමාගමේ ප්රධාන විධායක අයිවන් එස්පිනෝසා ප්රකාශ කළේ චීනය තුළ පවතින තාක්ෂණික දියුණුව සහ අඩු පිරිවැය හේතුවෙන් කෙටි කාලීනව රථවාහන ලක්ෂයක් සහ දිගු කාලීනව වාහන ලක්ෂ තුනක් අපනයනය කිරීම තමන්ගේ ඉලක්කය බවයි.
දකුණු කොරියාවේ විශාලතම මෝටර් රථ නිෂ්පාදකයා වන හුන්ඩායි (Hyundai) සමාගම ද චීනය හුදෙක් නිෂ්පාදන මධ්යස්ථානයක් ලෙස පමණක් නොව, පර්යේෂණ හා සංවර්ධන කටයුතු මෙන්ම නව නිෂ්පාදන වෙනත් රටවලට හඳුන්වා දීමේ කේන්ද්රස්ථානයක් ලෙස භාවිත කිරීමට පටන් ගෙන තිබේ. එහි ප්රධාන විධායක ජෝසෆ් මුනෝස් සඳහන් කරන්නේ නවීනතම තාක්ෂණය චීනය තුළ භාවිත කරමින්, එමඟින් නිෂ්පාදනය වන වාහන වෙනත් කලාප වෙත අපනයනය කිරීමට බලාපොරොත්තු වන බවයි.
ජර්මනියේ වොක්ස්වැගන් (Volkswagen) සමාගම ද චීනය සිය අපනයන පදනම ලෙස යොදා ගැනීමට පියවර ගනිමින් සිටී. එක්ස්පෙන්ග් (XPeng) සහ කැට්ල් (CATL) වැනි චීන දේශීය සමාගම් සමඟ හවුල්කාරිත්වයන් ඇති කර ගැනීම හරහා වාහන සැලසුම් කිරීමේ සහ සංවර්ධනය කිරීමේ කාලය සියයට 30 කින් සහ පිරිවැය සියයට 40 කින් අඩු කර ගැනීමට ඔවුන් සමත්ව ඇත. වොක්ස්වැගන් සමූහයේ ප්රධාන විධායක ඔලිවර් බ්ලූම් පවසන පරිදි, ඔවුන් චීනයේ සිට දකුණු අර්ධගෝලයේ රටවල් වෙත වාහන සහ සේවාවන් සැපයීමට අදහස් කරයි. මේ යටතේ චීන තාක්ෂණයෙන් නිෂ්පාදනය කෙරෙන 'ID. ERA 9X' විදුලි මෝටර් රථය ජර්මනිය වෙත පවා අපනයනය කිරීමට නියමිතය.
මෝටර් රථ ක්ෂේත්රයේ විශ්ලේෂකයින් පෙන්වා දෙන්නේ විද්යුත්කරණය සහ බුද්ධිමත් රිය පැදවීමේ තාක්ෂණය අතින් චීනය ගෝලීය නායකයෙකු වී ඇති බැවින් විදේශීය සමාගම්වලට චීන වෙළෙඳපොළ අත්යවශ්ය වී ඇති බවයි. චීන දේශීය වෙළෙඳපොළ තුළ පවතින දැඩි තරඟකාරිත්වය හේතුවෙන් 2014 වසරේදී සියයට 60-70 ක්ව පැවති විදේශීය ඒකාබද්ධ ව්යාපාරවල වෙළෙඳපොළ කොටස 2025 වන විට සියයට 30 දක්වා පහත වැටුණි. මේ නිසා බොහෝ කර්මාන්තශාලාවල නිෂ්පාදන ධාරිතාවය අපතේ ගොස් තිබූ අතර, මෙම නව අපනයන උපාය මාර්ගය හේතුවෙන් එම කර්මාන්තශාලා වැසී යාම වැළකී ඒවා නැවත සක්රීය කිරීමට අවස්ථාව ලැබී ඇත.
මෙම අපනයන ක්රියාවලිය සාර්ථක කර ගත් සමාගම් අතර යුඑඩා කියෑ (Yueda Kia) සමාගම කැපී පෙනෙන අතර, ඔවුන් ජියැන්ග්සු පළාතේ පිහිටි කර්මාන්තශාලාවෙන් 2018 වසරේ සිට මේ දක්වා වාහන 582,000 කට වඩා අපනයනය කර ඇත. එමෙන්ම බීජිං හුන්ඩායි සමාගම 2025 වසරේදී වාහන 82,000 ක් අපනයනය කර ඇති අතර එය පෙර වසරට සාපේක්ෂව සියයට 48.7 ක වර්ධනයකි. සායික් වොක්ස්වැගන් (SAIC Volkswagen) සමාගම ද චීන-යුරෝපීය දුම්රිය මාර්ගය ඔස්සේ උස්බෙකිස්තානය වැනි රටවලට සිය නවතම මාදිලියේ රථවාහන අපනයනය කිරීම ආරම්භ කර තිබේ.
අතීතයේදී චීනයෙන් අපනයනය කෙරුණේ විදේශයන්හි සැලසුම් කර චීනයේ නිෂ්පාදනය කරන ලද සාම්ප්රදායික ඉන්ධන වාහන වුවද, වර්තමාන නැඹුරුව පවතින්නේ චීන තාක්ෂණයෙන් සහ චීනය තුළම සම්පූර්ණයෙන් සැලසුම් කරන ලද නව බලශක්ති වාහන (NEVs) අපනයනය කිරීමටයි. විශ්ලේෂකයින් අනාවැකි පල කරන්නේ චීනයේ සමස්ත වාහන අපනයනයෙන් නව බලශක්ති වාහනවල දායකත්වය 2025 වසරේ පැවති සියයට 35 ක මට්ටමේ සිට මේ වසර වන විට සියයට 60 ඉක්මවා යනු ඇති බවයි.
