රටේ වර්තමානයේ උද්ගතව ඇති තත්ත්වයන් හමුවේ මේ වසර තුළ පළාත් සභා මැතිවරණය පැවැත්වීමට හැකියාවක් නොමැති බව ජනතා විමුක්ති පෙරමුණේ (JVP) ප්රධාන ලේකම් ටිල්වින් සිල්වා මහතා පවසයි. ඒ සම්බන්ධයෙන් පවතින හැකියාවන් සොයා බැලීම ලබන වසරේදී පමණක් සිදු කෙරෙනු ඇති බවද ඔහු වැඩිදුරටත් සඳහන් කර ඇත.
ජාතික ජන බලවේගයේ (NPP) ප්රධානතම පාර්ශ්වකරු වන්නේද ජනතා විමුක්ති පෙරමුණයි.මෙරට පළාත් සභා පද්ධතිය 2017 වසරේ සිට මේ දක්වාම පවතින්නේ අක්රිය තත්ත්වයකයි. කෙසේ වෙතත්, බලය විමධ්යගත කිරීම, ආණ්ඩුක්රම ව්යවස්ථා ප්රතිසංස්කරණ මෙන්ම කල් දමා ඇති පළාත් සභා මැතිවරණ පැවැත්වීම යන කරුණු ජාතික ජන බලවේගයේ මැතිවරණ ප්රකාශනය මගින් ද ප්රධාන වශයෙන් අවධාරණය කර තිබේ.
මේ අතර, මැතිවරණ ක්රමය වෙනස් කරමින් ගෙන ආ නව නීතිය හේතුවෙන් පැන නැගී ඇති නෛතික ගැටලුවක් මත පළාත් සභා මැතිවරණය පැවැත්වීම මැතිවරණ කොමිෂන් සභාවට ද දුෂ්කර කටයුත්තක් වී ඇත. 2017 අංක 17 දරන පළාත් සභා මැතිවරණ (සංශෝධන) පනත මගින් නව මිශ්ර සමානුපාතික නියෝජන ක්රමයක් හඳුන්වා දුන් අතර, ඒ යටතේ නියෝජිතයින්ගෙන් 50% ක් කොට්ඨාස ක්රමයටත්, ඉතිරි 50% සමානුපාතික ලැයිස්තු මගිනුත් තෝරා පත් කර ගැනීමට නියමිතව තිබුණි.
මෙම නව ක්රමවේදයට අවශ්ය සීමා නිර්ණය කිරීමේ කටයුතු වෙනුවෙන් පත් කළ සීමා නිර්ණය කිරීමේ කොමිසම විසින් සිය වාර්තාව සකස් කර 2018 වසරේදී පාර්ලිමේන්තුවට ඉදිරිපත් කරන ලදී. එහෙත් දේශපාලන පක්ෂ අතර පැවති මතභේද හේතුවෙන් එකඟතාවයක් ලබා ගැනීමට නොහැකි වූ බැවින් එය පාර්ලිමේන්තුවේදී විවාදයට ගෙන පරාජයට පත් කෙරිණි.
නව ක්රමය යටතේ සීමා නිර්ණය කිරීම නෛතික වශයෙන් අභියෝගාත්මක මෙන්ම කාලය වැය වන කටයුත්තක් වන බැවින්, පැරණි මැතිවරණ ක්රමය යටතේ හෝ මැතිවරණය පැවැත්විය යුතු බවට විපක්ෂයේ පක්ෂ විසින් අවධාරණය කරනු ලබයි. මේ අතර, පළාත් සභා මැතිවරණය පැවැත්විය යුතු සුදුසු මැතිවරණ ක්රමය කුමක්ද යන්න පිළිබඳව සොයා බලා පාර්ලිමේන්තුවට වාර්තා කිරීම සඳහා මේ වන විට පාර්ලිමේන්තු තේරීම් කාරක සභාවක් ද පත් කර තිබේ.
