ඉන්දීය ප්රිමියර් ලීග් (IPL) ක්රිකට් තරඟාවලි ඉතිහාසයේ වැඩිම තරඟ සංඛ්යාවකට ක්රීඩා කළ ක්රීඩකයන්ගේ වාර්තාව සම කිරීමට මුම්බායි ඉන්දියන්ස් කණ්ඩායමේ ආරම්භක පිතිකරු රෝහිත් ෂර්මා සමත් වී තිබේ. ෂාහිඩ් වීර් නාරායන් සිං ජාත්යන්තර ක්රීඩාංගණයේදී රෝයල් චැලෙන්ජර්ස් බැංගලෝර් (RCB) කණ්ඩායමට එරෙහිව පිටියට පිවිසෙමින් ඔහු සිය 278 වැනි අයි.පී.එල්.
තරඟයට සහභාගී වූ අතර, ඒ සමඟින් ඔහු මහේන්ද්ර සිං දෝනි සහ විරාත් කෝලි සමඟ මෙම සුවිශේෂී ලැයිස්තුවේ සම පෙරමුණ ගෙන ඇත.වසර දහනවයක අයි.පී.එල්. ඉතිහාසයේ වැදගත් සන්ධිස්ථානයක් සනිටුහන් කරන මෙම අවස්ථාවේදී, තරඟාවලිය නියෝජනය කළ සාර්ථකම ක්රීඩකයින් තිදෙනෙකු මෙලෙස පෙරමුණේ පසුවීම විශේෂත්වයකි. 2008 වසරේ පැවති ආරම්භක තරඟාවලියේදී ඩෙකෑන් චාජර්ස් කණ්ඩායම නියෝජනය කරමින් සිය අයි.පී.එල්. ගමන ආරම්භ කළ රෝහිත්, 2009 වසරේදී සිය මංගල කුසලානය ජයග්රහණය කිරීමට දායක විය. කෙසේ වෙතත්, ඔහුගේ ක්රිකට් දිවියේ ස්වර්ණමය යුගය ආරම්භ වූයේ 2011 වසරේදී මුම්බායි ඉන්දියන්ස් කණ්ඩායමට එක්වීමෙන් පසුව වන අතර, ඔහුගේ නායකත්වය යටතේ එම කණ්ඩායම 2013 සිට 2020 දක්වා කාලය තුළ අයි.පී.එල්. ශූරතා පහක් හිමිකර ගැනීමට සමත් විය.
සිය ක්රිකට් දිවිය තුළ තරඟ 278කට ක්රීඩා කරමින් තරඟාවලියේ අතිසාර්ථකම ලකුණු රැස්කරන්නෙකු ලෙස රෝහිත් ෂර්මා සිය ස්ථානය මනාව තහවුරු කරගෙන සිටියි. මෙම තරඟයේදීම රෝයල් චැලෙන්ජර්ස් කණ්ඩායම නියෝජනය කරමින් විරාත් කෝලි ද ක්රීඩා කළ බැවින්, ඔවුන් දෙදෙනාම මේ වන විට එකම තරඟ සංඛ්යාවක් සටහන් කරගෙන එකටම ඉදිරියට යමින් සිටිති. මීට අමතරව, චෙන්නායි සුපර් කිංග්ස් කණ්ඩායම ඉදිරි වටයට සුදුසුකම් ලබාගෙන, මහේන්ද්ර සිං දෝනි යළිත් පූර්ණ ශාරීරික යෝග්යතාව ලබා තරඟ බිමට පිවිසියහොත්, මැයි මස අගභාගයේ පැවැත්වෙන අවසන් මහා තරඟයට පෙර මෙම වැඩිම තරඟ වාර්තාව කිහිප වතාවක්ම වෙනස් වීමට ඉඩකඩ පවතී.
