ලොව ප්රමුඛතම තාක්ෂණික සමාජයක් ලෙස සැලකෙන ස්වීඩනය, සිය පාසල් අධ්යාපන පද්ධතිය තුළ පෙරළිකාර වෙනසක් සිදු කරමින් සිටියි. 2010 දශකයේ සිට සෑම සිසුවෙකුටම පාහේ ලැප්ටොප් හෝ ටැබ්ලට් පරිගණක ලබා දෙමින් තාක්ෂණය මත දැඩිව යැපුණු ඔවුන්, මේ වන විට යළිත් මුද්රිත පොත්පත්, පෑන් සහ කඩදාසි වෙත යොමු වීමට තීරණය කර ඇත.
මෙම අනපේක්ෂිත වෙනසට ප්රධානතම හේතුව වී ඇත්තේ එරට සිසුන්ගේ කියවීමේ සහ ලිවීමේ කුසලතා, එනම් සාක්ෂරතා මට්ටම ක්රමයෙන් පහත වැටීමයි. ජාත්යන්තර සමීක්ෂණ වාර්තා තුළ ස්වීඩනයේ ස්ථානය පහළට වැටීමත් සමඟ, තිර මත දිගු කාලයක් ගත කිරීම අධ්යාපනයට ඍණාත්මක ලෙස බලපාන්නේද යන සැකය එරට රජය තුළ මතු වී තිබේ. මොළය පිළිබඳ පර්යේෂකයන් පෙන්වා දෙන පරිදි, පන්ති කාමරයක් තුළ තිරයක් තිබීම සිසුන්ගේ අවධානය බිඳ වැටීමට ප්රබල හේතුවක් වන අතර, තිරයක් මත කියවීමට වඩා මුද්රිත පොතක් කියවීමෙන් හෝ කඩදාසියක ලිවීමෙන් තොරතුරු මතක තබා ගැනීම සහ ග්රහණය කර ගැනීම වඩාත් ඵලදායී වේ.
විශේෂයෙන්ම පෙරපාසල් දරුවන් අධික ලෙස තිර භාවිතයට යොමු වීම ඔවුන්ගේ මොළයේ වර්ධනයට මෙන්ම භාෂා කුසලතාවලට ද දැඩි ලෙස හානි කරන බව පර්යේෂණ මගින් තහවුරු වී ඇත. මේ හේතුවෙන් ස්වීඩන රජය පෙරපාසල් තුළ ටැබ්ලට් පරිගණක භාවිතය දැඩි ලෙස අධෛර්යමත් කර ඇති අතර, මෙම වසර අග සිට පාසල් තුළ ජංගම දුරකථන භාවිතය සම්පූර්ණයෙන්ම තහනම් කිරීමටද පියවර ගනිමින් සිටියි. ඊට අමතරව, පාසල් පුස්තකාල වැඩිදියුණු කිරීම සහ මුද්රිත පොත්පත් මිලදී ගැනීම සඳහා රජය විසින් පාසල් වෙත විශාල මූල්ය ප්රතිපාදන ලබා දෙමින් පවතී.
මෙම ක්රමවේදය පිළිබඳව අදහස් දක්වන ගුරුවරුන් පෙන්වා දෙන්නේ, තිර වලින් තොරව ඉගෙනීම සිසුන්ගේ අවධානය රඳවා ගැනීමට, විවේචනාත්මක චින්තනය වර්ධනය කිරීමට මෙන්ම අක්ෂි ආබාධ සහ නිද්රා ගැටළු අවම කරමින් සෞඛ්ය තත්ත්වය නංවාලීමටද උපකාරී වන බවයි. කෙසේ වෙතත්, සිසුන් අතර මේ සම්බන්ධයෙන් ඇත්තේ මිශ්ර ප්රතිචාරයකි. ඇතැම් සිසුන් තිර වලින් තොරව මුද්රිත පොත්පත් භාවිතය අගය කරන අතර, තවත් සමහරුන් තාක්ෂණයෙන් තොරව ඉගෙනීම සීමාසහිත සහ අපහසු අත්දැකීමක් වනු ඇතැයි කනස්සල්ල පළ කරති.
මෙම ප්රතිපත්තිමය වෙනස සම්බන්ධයෙන් ස්වීඩනය තුළ මෙන්ම ගෝලීයවද දැඩි විවාදයක් නිර්මාණය වී තිබේ. ඩිස්ලෙක්සියා වැනි විශේෂ අධ්යාපන අවශ්යතා සහිත දරුවන්ට ඩිජිටල් මෙවලම් ඉතා ප්රයෝජනවත් වන බව අධ්යාපන විශේෂඥයෝ පෙන්වා දෙති. තවද, Spotify සහ Klarna වැනි ලොව දැවැන්ත තාක්ෂණික සමාගම් බිහි කළ ස්වීඩනය, මෙලෙස තාක්ෂණයෙන් ඈත් වීම හරහා අනාගත ශ්රම බලකායට සහ ව්යවසායකයින්ට අහිතකර බලපෑමක් එල්ල වනු ඇත්දැයි පරිගණක විද්යාඥයින් ප්රශ්න කරති. ස්වීඩනය සහ ඩෙන්මාර්කය, නෝර්වේ වැනි අසල්වැසි රටවල් මුද්රිත පොත් වෙත ආපසු යද්දී, එස්තෝනියාව සහ දකුණු කොරියාව වැනි රටවල් කෘත්රිම බුද්ධිය (AI) සහ ඩිජිටල් පෙළපොත් සඳහා විශාල වශයෙන් ආයෝජනය කරමින් සිටියි.
(BBC ඇසුරිනි)
