ජීවිතයේ සැඳෑ සමය යනු විවේකයෙන් අතීතය ආවර්ජනය කරමින් නිහඬව කාලය ගත කරන වකවානුවක් යැයි බොහෝ දෙනා සිතුවද, ඇතැමුන්ට එය ජීවිතයේ සුන්දරම සහ වඩාත්ම උද්යෝගිමත් පරිච්ඡේදයේ ආරම්භය පමණි.
ඕස්ට්රේලියාවේ බ්රිස්බේන් නුවර වෙසෙන 91 හැවිරිදි චාල්ස් ස්මිත් ලොව වයස්ගතම 'පළමු වරට සීයා කෙනෙකු වූ පුද්ගලයා' ලෙස ගිනස් ලෝක වාර්තා පොතට එක්වන්නේ ඒ අපූරු යථාර්ථය ලොවටම පෙන්වා දෙමිනි. පසුගිය 2025 වසරේ අගෝස්තු 29 වැනිදා ඔහුගේ පුත් ඈෂ්ලි සහ ලේලි හැනාට දාව ඉස්ලා දැරිය උපත ලබන විට චාල්ස්ගේ වයස හරියටම අවුරුදු 91යි දින 209ක් ලෙස සටහන් වී තිබූ අතර, මේ වන විට ලොව පුරා අවධානය දිනාගත් සුවිශේෂී මාතෘකාවක් බවට මෙම පුවත පත්වී හමාරය.
සාමාන්යයෙන් 'සීයා' යන නාමයට වඩා තම මිනිබිරිය තමාට 'පොපී' (Poppy) කියා අමතනවාට ප්රිය කරන ඔහු, ඉස්ලා දැරිය දුටු පළමු මොහොතේම ඇයව තුරුලට ගත්තේ අපමණ සෙනෙහසකිනි. "මම ඇයව වඩාගත්තාම ආයෙත් කාටවත් දෙන්න හිතුණේම නැහැ, හැබැයි නැපි මාරු කරන වෙලාවට ඇරෙන්න," යැයි ඔහු සිනාසෙමින් පවසන්නේ ළදරුවෙකු සහ ජීවිතයේ නවවැනි දශකය පසුකළ මිනිසෙකු අතර ඇති සුන්දර ආදර බැඳීම මනාව විදහා දක්වමිනි. වයස අවුරුදු 55දී පියෙකු වීමේ වාසනාව ලද චාල්ස්ට, තම පරම්පරාවේ මීළඟ පුරුක දැකගැනීමට තවත් දශක තුනකට වැඩි කාලයක් බලා සිටීමට සිදුවීමම ජීවිතයේ අපූරු පෙළගැස්මකි.
මෙම ගිනස් වාර්තාව පිටුපස ඇත්තේ ද අතිශය රසවත් කතාවකි. චාල්ස්ගේ පුතු සහ ලේලිය ඔහුටත් හොර රහසේම මෙම වාර්තාව සඳහා අයදුම් කර තිබූ අතර, ඉස්ලාගේ උපතින් පසු නිල ගිනස් සහතිකය පෙන්වා ඔහුව පුදුමයට පත් කිරීමට ඔවුහු කටයුතු කළහ. අතීතයේ මෝටර් රථ ධාවන තරග ප්රවර්ධකයෙකු ලෙස කටයුතු කර විශ්රාම ගොස් සිටින චාල්ස්, කිසිසේත්ම සමාජය සිතන ආකාරයේ සාමාන්ය 91 හැවිරිදි වියපත් පුද්ගලයෙකු නොවේ. ඔහු තවමත් තමන්ගේම කඳවුරු බැඳීමේ රථයෙන් (camper van) ඕස්ට්රේලියාව පුරා සංචාරය කරන, මෝර්ටන් බොක්කේ තනිවම බෝට්ටු පදින, නිතරම තේ පානය කරන අතිශය ක්රියාශීලී ජීවිතයක් ගත කරන අයෙකු බව පවුලේ උදවිය ආඩම්බරයෙන් පවසති.
මේ සියල්ල අතරේ පවුලේ උදවිය නිතරම කතාබහ කරන එක් අපූරු කාරණයක් ද වේ; එනම් ඉස්ලා මීට පෙර ඉපදුණා නම් කිසිදා මේ ලෝක වාර්තාව චාල්ස්ට හිමි නොවන බවයි. ලොව වයස්ගතම පළමු වරට මිත්තණිය වූ තැනැත්තියගේ වාර්තාව ජර්මානු ජාතිකයෙකු සතුව වයස අවුරුදු 95ක් ලෙස සටහන්ව ඇති පසුබිමක, පිරිමි පාර්ශ්වයෙන් මෙවැනි වාර්තාවක් ගොඩනැගීම කෙතරම් දුර්ලභද සහ ඊට කෙතරම් නිරෝගී ජීවන රටාවක් අවශ්යද යන්න මෙයින් මනාව පැහැදිලි වේ.
"ඇය මගේ මිනිබිරියයි, ලෝක වාර්තා තිබුණත් නැතත් ඇය මගේ පවුලයි," යනුවෙන් ඔහු පවසන ඒ ආදරණීය වදන් පෙළ, ලෝක වාර්තාවලින් හෝ වසර ගණනකින් මැනිය නොහැකි තරම් ගැඹුරු වූ පවුල් බැඳීමක සදාතනික වටිනාකම අපගේ සිත් තුළ සදහටම රඳවා තබනු ඇත.
