බොලිවුඩයේ දැවැන්තම තරුවකගේ රුවින් විකිණෙන භාණ්ඩයක්, අවසානයේ ඔහුගේම ගෙල සිරකරන තොණ්ඩුවක් බවට පත්වෙමින් තිබේ.
රාජ්ශ්රී පාන් මසාලා (Rajshree Pan Masala) නම් නිෂ්පාදනයක් සඳහා පෙනී සිටිමින් ජනතාව නොමඟ යවන සුළු ප්රචාරණයක් ලබාදීමේ චෝදනාවට ලක්ව සිටින සුපිරි බොලිවුඩ් නළු සල්මාන් ඛාන්ට එරෙහි නඩුව, මැයි මස 11 වැනිදා තීරණාත්මක කඩඉමකට පිවිසීමට නියමිතව ඇත. පසුගිය අඟහරුවාදා කොටා හි පාරිභෝගික අධිකරණයේ පැවති නඩු විභාගය, දෙපාර්ශවයේම නීතිඥයන්ගේ උණුසුම් වාද විවාද මධ්යයේ අවසන් වූයේ අවසන් තීන්දුවක් කරා යන ගමනේ තවත් එක් පියවරක් සනිටුහන් කරමිනි.
මෙම නීතිමය සටන මෙහෙයවන්නේ භාරතීය ජනතා පක්ෂ නායක ඉන්ද්රමෝහන් සිං හනී විසිනි. ප්රබල තාරකාවකට එරෙහිව සාමාන්ය පුරවැසියෙකුගේ හඬක් ලෙස නැගී එන මෙම නඩුව, පාරිභෝගික අයිතීන් පිළිබඳව සමාජය තුළ දැඩි කතාබහක් නිර්මාණය කර තිබේ. ඔහුගේ ප්රධානතම චෝදනාව වී ඇත්තේ, පසුගිය දෙසැම්බර් 26 වැනිදා අධිකරණයට ඉදිරිපත් කළ නීතිමය ලේඛනවල සහ පිළිතුරු පත්රවල ඇති සල්මාන් ඛාන්ගේ අත්සන් ව්යාජ ඒවා බවයි.
මෙම අත්සන් සම්බන්ධයෙන් අධිකරණ වෛද්ය විද්යාගාර (FSL) පරීක්ෂණයක් පවත්වන ලෙස පැමිණිලිකාර පාර්ශවය කළ ඉල්ලීමට මුලින් කොටා දිස්ත්රික් පාරිභෝගික අධිකරණයෙන් අනුමැතිය හිමිවිය. එපමණක් නොව, සල්මාන් ඛාන් පෞද්ගලිකවම අධිකරණය හමුවේ පෙනී සිට අත්සන් කරන ලද දිවුරුම් ප්රකාශයක් ලබා දිය යුතු බවටද නියෝග කෙරිණි. කෙසේ වෙතත්, සල්මාන්ගේ නීතිඥ ශුභම් ෂර්මා සහ පාන් මසාලා සමාගමේ නීතිඥ රාකේෂ් සුවාල්කා විසින් නවදිල්ලියේ ජාතික පාරිභෝගික කොමිසමෙන් සහ ජායිපූර් හි රාජස්ථාන් මහාධිකරණයෙන් ලබාගත් සහන නියෝග පසුගිය අඟහරුවාදා පැවති නඩු විභාගයේදී අධිකරණයට ඉදිරිපත් කරන ලදී.
පැමිණිලිකාර පාර්ශවයේ නීතිඥ රිපුදමන් සිං මෙම ලේඛනවලට දැඩි ලෙස විරෝධය පළ කළේය. කෙසේ වුවද, විත්තිකාර පාර්ශවයට සාක්ෂි ඉදිරිපත් කිරීම සඳහා තවදුරටත් කල් ඉල්ලා සිටීම හේතුවෙන් අධිකරණය දැඩි ස්ථාවරයකට එළඹෙමින් එය ඔවුන්ට හිමිවන අවසන් අවස්ථාව බව අවධාරණය කළේය. දැන් මුළු රටේම අවධානය යොමුව ඇත්තේ ජාතික පාරිභෝගික කොමිසමෙන් සල්මාන්ගේ ඇප සහිත වරෙන්තුවට ලැබී ඇති තාවකාලික සහනය සහ මහාධිකරණ තීන්දු මත පදනම්ව, මීළඟ නඩු වාරය කෙබඳු දිශානතියක් ගනු ඇත්ද යන්න පිළිබඳවයි.
රිදී තිරයේ නීතිය තමන්ට අවශ්ය පරිදි නමන වීරයාට, සැබෑ ලෝකයේ නීතිය ඉදිරියේ නිහඬ වීමට සිදුවන දිනය වැඩි ඈතක නොවිය හැකිය.
