2026 වර්ෂයේ මැයි මස 01 වන දිනට යෙදී ඇති ලෝක කම්කරු දිනයට සමගාමීව දිවයින පුරා පැවැත්වෙන දේශපාලන පක්ෂ සහ වෘත්තීය සමිති වලට අයත් මැයි දින රැලි සහ පෙළපාලි සඳහා විශේෂ පොලිස් ආරක්ෂාවක් සහ රථවාහන සැලැස්මක් ශ්රී ලංකා පොලිස් මාධ්ය කොට්ඨාසයේ වැඩබලන පොලිස් මාධ්ය ප්රකාශකවරයා විසින් නිවේදනය කර ඇත. මෙම සැමරුම් සාමකාමීව පවත්වාගෙන යාම සඳහා පොලිස් නිලධාරීන්, බුද්ධි අංශ නිලධාරීන්, යතුරුපැදි සංචාරක අංශ, විශේෂ කාර්ය බලකා නිලධාරීන් මෙන්ම නිල සුනඛ සහායද යොදවා ඇති අතර, රථවාහන ගමනාගමනය විධිමත්ව පවත්වාගෙන යාමට මහජනතාවගෙන් පූර්ණ සහයෝගය අපේක්ෂා කරන බව පොලිසිය සඳහන් කරයි.
කොළඹ නගරය මෙන්ම දිවයිනේ අනෙකුත් ප්රධාන නගර කේන්ද්ර කරගනිමින් සංවිධානය වී ඇති මෙම උත්සව සඳහා ප්රායෝගික රථවාහන සැලසුම් සහ විකල්ප මාර්ග හඳුන්වා දී තිබේ.කොළඹ නගරය සහ ඒ අවට ප්රදේශවල ප්රධාන රැලි කිහිපයක්ම පැවැත්වීමට නියමිත අතර, මහරගම ජාතික තරුණ සේවා සභාව ඉදිරිපිට පොදු රථ ගාලේදී ජාතික ජන බලවේගයේ මැයි රැළිය පැවැත්වේ. මේ හේතුවෙන් කොළඹ සිට හයිලෙවල් මාර්ගය ඔස්සේ මහරගම දෙසට ගමන් ගන්නා වාහන දෙල්කඳ සහ රත්තනපිටිය හරහා බොරලැස්ගමුවටත්, හෝමාගම දෙසින් පැමිණෙන වාහන බොරලැස්ගමුව සහ කොහුවල හරහා කොළඹටත් ගමන් කරන ලෙස උපදෙස් දී ඇති අතර, බර වාහන පන්නිපිටියෙන් තලවතුගොඩ හරහා පාර්ලිමේන්තු මාර්ගයට හරවා යැවීමට පියවර ගෙන තිබේ. සමගි ජන බලවේගයේ මැයි දින රැළිය මාලිගාවත්ත පී.ඩී. සිරිසේන ක්රීඩාංගනයේදී පැවැත්වෙන අතර, ඊට සහභාගී වන ජනතාව රැගත් බස් රථ ජයන්ත වීරසේකර මාවත, පංචිකාවත්ත පාර, ඔරාබිපාෂා මාවත ඇතුළු අවට මාර්ග රැසක ගාල් කිරීමට කටයුතු යොදා ඇත.
ශ්රී ලංකා නිදහස් පක්ෂ මැයි දින සැමරුම බොරැල්ල කැම්බල් පිටියේදී සංවිධානය කර ඇති අතර බේස්ලයින් මාර්ගය, සිරිධම්ම මාවත සහ වෝඩ් පෙදෙස ආශ්රිතව රථවාහන ගාල් කිරීමට අවස්ථාව සලසා තිබේ. පෙරටුගාමී සමාජවාදී පක්ෂයේ රැළිය කොම්පඤ්ඤවීදිය හයිඩ් පාර්ක් පිටියේදී පැවැත්වෙන අතර ඔවුන්ගේ පෙළපාලිය මරදාන, සොයිසා වටරවුම සහ ලිප්ටන් වටරවුම ඔස්සේ ගමන් කරනු ඇත. වේල්ලවීදිය ඊ.ඒ. ගුණසිංහ ක්රීඩාංගනයේදී ලංකා බැංකු සේවක සංගමය ඇතුළු නිදහස් වෙළඳ කලාප හා පොදු සේවක සංගමයේ රැස්වීම පැවැත්වෙන අතර එහි පෙළපාලිය ලේක්හවුස් ඉදිරිපිටින් ආරම්භ වීමට නියමිතය. ශ්රී ලංකා කොමියුනිස්ට් පක්ෂය සහ සමාජවාදී ජනතා පෙරමුණ කොටා පාරේ එන්.එම්. පෙරේරා මාවතේදී සිය රැළිය පවත්වන අතර ආයුර්වේද හන්දියෙන් ඊට අදාළ පෙළපාලිය ආරම්භ වේ. මීට අමතරව බොරැල්ල පාර්ක් ඇවනියු හි සර්වජන බලය පක්ෂයත්, ගාලු මුවදොර ආශ්රිතව ලංකා වෙළඳ කාර්මික සහ පොදු කම්කරු සංගමයත්, රොටුන්ඩා වටරවුමේදී පොදුජන පෙරමුණ සහ ටී.බී. ඉලංගරත්න සහෘද සංසදයත්, කොස්ගස් හන්දියේදී එක්සත් සමාජවාදී පක්ෂයත් සිය මැයි දින රැලි සහ පෙළපාලි පැවැත්වීමට සැලසුම් කර ඇත.
පිට පළාත් වලද ජාතික ජන බලවේගය විසින් ප්රධාන නගර රැසක මැයි දින රැලි සංවිධානය කර තිබේ. අනුරාධපුරයේ මැයි රැළිය නිවන්තකචේතිය විදුහල අසලින් ආරම්භ වී නව බස් නැවතුම්පොළ භූමියට පැමිණෙන අතර, යාපනය හන්දිය සහ දහයියාගම හන්දිය ඔස්සේ විකල්ප මාර්ග භාවිත කළ හැක. කළුතර නගරයේ පෙළපාලිය කටුකුරුන්ද හන්දියේ සිට කළුතර දකුණ බස් නැවතුම්පොළ දක්වා පැවැත්වේ. කුරුණෑගල මැයි රැළිය සඳහා බෝයගනේ මහා විද්යාලය අසලින් ගමන් ආරම්භ කර සත්යවාදී පිටිය දක්වා පැමිණෙන ජනතාව හේතුවෙන්, දඹුල්ල සහ කොළඹ මාර්ගවල ගමන් කරන රථවාහන නාවින්න, ගැට්ටුවාන සහ බරවැඩපොළ හරහා විකල්ප මාර්ග භාවිත කළ යුතු වේ. ගාල්ලේදී දෙවට අධිවේගී පිවිසුම අසලින් ආරම්භ වන පෙළපාලිය සමනළ ක්රීඩාංගණයෙන් අවසන් වන අතර කොළඹ සහ මාතර දෙසට යන වාහන සඳහා වක්වැල්ල සහ කරාපිටිය හරහා විකල්ප මාර්ග හඳුන්වා දී ඇත. මාතර නගරයේ පෙළපාලිය නූපේ හන්දියේ සිට කොටු දොරකඩ දක්වා ගමන් ගන්නා අතර තංගල්ල දෙසට යන රථවාහන රාහුල හන්දිය ඔස්සේ ගමන් කළ යුතුය.
නුවරඑළිය නගරයේ හාවා එළිය රෝහල හන්දියෙන් ආරම්භ වන පෙළපාලිය යූඩී ක්රීඩාංගණය දක්වා ගමන් කරන බැවින් මාගස්තොට සහ අශෝකාරාම හන්දි විකල්ප මාර්ග ලෙස භාවිත කිරීමට රියදුරන්ට උපදෙස් දී ඇත. මහනුවර නගරයේ පෙළපාලිය එඩ්මන්ඩ් සිල්වා ක්රීඩාංගණය අසලින් ආරම්භ කර විලියම් ගොපල්ලව මාවත ඔස්සේ ගැටඹේ ක්රීඩාංගණය දක්වා පැමිණීමට නියමිත අතර ගොහාගොඩ මාර්ගය සහ තැන්නේකුඹුර හරහා විකල්ප රථවාහන ගමනාගමනයට ඉඩ සලසා ඇත. මාතලේ අලුවිහාරය අසලින් ආරම්භ වන පෙළපාලිය අඹගහමුල බස් නැවතුම්පොළ වෙත ළඟා වන අතර දඹුල්ල සහ මහනුවර දෙසට යන වාහන ගොඩපල හන්දියෙන් ගොන්ගාවල පාරට යොමුවිය යුතුය. කෑගල්ල නගරයේ පෙළපාලිය රංවල මහානාග විදුහලෙන් ආරම්භ වී ප්රධාන බස් නැවතුම්පොළට පැමිණෙන අතර රංවල සහ මීපිටිය හන්දි වලින් වාහන විකල්ප මාර්ග වලට හරවා යැවේ. රත්නපුර බටුගෙදර විද්යාරාජ විද්යාලය අසලින් පිටත්වන පෙළපාලිය ඔරලෝසු කණුව දක්වා ගමන් කරන බැවින් කොළඹ සහ ඇඹිලිපිටිය දෙසට ගමන් කරන රථවාහන වෙරළුප හන්දිය සහ මුද්දුව හන්දිය හරහා ගමන් කළ යුතු බව පොලිසිය වැඩිදුරටත් නිවේදනය කර සිටී.
