එක්සත් අරාබි එමීර් රාජ්යයට සහ තවත් අරාබි රටවල් කිහිපයකට එල්ල වූ ඉරාන ප්රහාර සම්බන්ධයෙන් එක්සත් අරාබි එමීර් රාජ්යයේ ජනාධිපති ෂෙයික් මොහොමඩ් බින් සයීඩ් අල් නහියන් සහ රුසියානු ජනාධිපති ව්ලැඩිමීර් පුටින් අතර සඳුදා දින දුරකථන සංවාදයක් පවත්වා ඇත. මෙම සාකච්ඡාවේදී කලාපීය ආරක්ෂාව සහ මිලිටරි වර්ධනයන් පිළිබඳව අවධානය යොමු කර ඇති අතර, ගැටුම තවදුරටත් ව්යාප්ත වීම වළක්වා ගැනීම සඳහා හමුදාමය ක්රියාමාර්ග වහාම නතර කරන ලෙස නායකයින් දෙපළ ඉල්ලා සිටියහ. තවද, අර්බුද විසඳීමේදී රාජ්ය තාන්ත්රිකභාවය සහ සංවාදය කෙරෙහි ප්රමුඛතාවය දීමේ වැදගත්කම ඔවුහු මෙහිදී අවධාරණය කළහ.
මෙම ප්රහාර දැඩි ලෙස හෙළා දකිමින් සියෙරා ලියොන් ජනාධිපති ජුලියස් මාඩා බයෝ, චැඩ් ජනරජයේ ජනාධිපති මහමත් ඉඩ්රිස් ඩෙබි ඉට්නෝ, කොංගෝ ප්රජාතන්ත්රවාදී ජනරජයේ ජනාධිපති ෆීලික්ස් ෂිසෙකෙඩි සහ සෙනගල් ජනාධිපති බසිරෝ දියෝමායේ ෆයේ යන නායකයින් ද එක්සත් අරාබි එමීර් රාජ්යයේ ජනාධිපතිවරයා වෙත දුරකථන ඇමතුම් ලබා දී තිබේ. මෙම ක්රියාමාර්ග ජාත්යන්තර නීතිය සහ එක්සත් ජාතීන්ගේ මූලධර්ම උල්ලංඝනය කිරීමක් බව සියෙරා ලියොන් ජනාධිපතිවරයා ප්රකාශ කළේය. මීට අමතරව, උතුරු මැසිඩෝනියාවේ අග්රාමාත්ය ක්රිස්ටියන් මිකොස්කි සහ කෙන්යානු ජනාධිපති ආචාර්ය විලියම් සමෝයි රූටෝ ද ඉරාන ප්රහාර හෙළා දුටු අතර, එක්සත් අරාබි එමීර් රාජ්යයේ ආරක්ෂාව සහ ස්ථාවරත්වය තහවුරු කිරීමේ ක්රියාමාර්ග සඳහා සිය සහයෝගය සහ සහකම්පනය පළ කළහ.
මේ අතර, එක්සත් අරාබි එමීර් රාජ්යය, කටාර්, සෞදි අරාබිය, බහරේනය, ජෝර්දානය, කුවේටය සහ අමෙරිකා එක්සත් ජනපදය යන රටවල් එක්ව ඒකාබද්ධ නිවේදනයක් නිකුත් කරමින් ඉරානයේ මිසයිල සහ ඩ්රෝන ප්රහාර දැඩි ලෙස හෙළා දැක ඇත. මෙම ප්රහාරයන් එක්සත් අරාබි එමීර් රාජ්යය, බහරේනය, ජෝර්දානය, කුවේටය, ඕමානය, කටාර්, සෞදි අරාබිය සහ ඉරාකය යන රටවල ස්වෛරී ප්රදේශ ඉලක්ක කර ගනිමින් සිවිල් වැසියන්ට සහ යටිතල පහසුකම්වලට දැඩි තර්ජනයක් එල්ල කර ඇති බව එම නිවේදනයේ දැක්වේ. ඉරානයේ මෙම ක්රියාකලාපය කලාපීය ස්ථාවරත්වයට තර්ජනයක් වන මෙන්ම ස්වෛරීත්වය උල්ලංඝනය කරන භයානක තත්ත්වයක් බව ඔවුහු පෙන්වා දෙති.
ගල්ෆ් සහයෝගිතා කවුන්සිලයේ (GCC) අමාත්ය මණ්ඩලය ඉරිදා දින වීඩියෝ තාක්ෂණය ඔස්සේ සිය 50 වැනි විශේෂ රැස්වීම පවත්වා ඇත. එහිදී ඉරාන ප්රහාර හේතුවෙන් සිවිල් පහසුකම් සහ නේවාසික ප්රදේශවලට සිදුව ඇති විශාල හානිය පිළිබඳව සමාලෝචනය කර ඇති අතර, මෙම තත්ත්වය පුරවැසියන්ගේ ජීවිතවලට තර්ජනයක් වෙමින් ජනතාව අතර බියක් ඇති කර තිබෙන බව කවුන්සිලය ප්රකාශ කළේය. ගෝලීය නායකයින් මේ වන විට මෙම මිලිටරි ගැටුම් වහාම නතර කරන ලෙස ඒකාබද්ධව ඉල්ලා සිටිති. (ගල්ෆ් ටුඩේ ඇසුරිනි)
