ඉරාන යුද්ධය මගින් තමන්ට එරෙහි එප්ස්ටයින් අපවාද වසාගන්නට ට්රම්ප් ජනපතිවරයා උත්සාහ කළද අනවශ්ය යුද්ධය, අනපේක්ෂිත ආර්ථික ගැටලු හා සුළුජාතික ගැටලු උත්සන්න කිරීම් හමුවේ ඊළඟ නොවැම්බරයේ ඇමරිකාවේ පවත්වන මැදවාර මැතිවරණයෙන් ට්රම්ප් ජනපතිවරයා නියෝජනය කරන රිපබ්ලිකන් පක්ෂය ඉතිහාසයේ දරුනු පරාජයක් අත්විඳින බව මේ වනවිට පෙන්නුම් කර ඇතැයි අලුත්ම 'ද ඉකොනොමිස්ට්' සඟරාව සමීක්ෂණ ඇසුරින් හෙළිකර තිබේ. 2024 වසරේදී ඩොනල්ඩ් ට්රම්ප් හිස්පැනික් ජාතිකයින් තමාට ආදරය කරන බව පැවසූ විට එය හුදු පුරසාරම් දෙඩීමක් පමණක් නොවීය.
එම වසරේදී ලතින් ඇමරිකානු ඡන්ද වලින් සියයට 48ක් දිනා ගැනීමට ඔහු සමත් වූ අතර එය පෙර සිටි ඕනෑම රිපබ්ලිකන් ජනාධිපතිවරණ අපේක්ෂකයෙකුට වඩා ඉහළ අගයක් විය. උද්ධමනය හේතුවෙන් පීඩාවට පත්ව සිටි බොහෝ හිස්පැනික්වරුන් ඒ සම්බන්ධයෙන් ජෝ බයිඩන්ට දොස් පැවරූ අතර, දුප්පත් රටවලින් පැමිණෙන සංක්රමණිකයින් සඳහා විවෘතව පැවති දේශසීමා ප්රතිපත්ති කෙරෙහිද ඔවුහු දැඩි අප්රසාදයක් පළ කළහ. ජීවන වියදම අඩු කරන බවටත්, අපරාධ සිදු කළ සංක්රමණිකයින් රටින් පිටුවහල් කරන බවටත් ට්රම්ප් ලබා දුන් පොරොන්දු විශ්වාස කළ බොහෝ ලතින් ජාතිකයින්ට අද වන විට තමන් ගත් තීරණය පිළිබඳව දැඩි සේ පසුතැවීමට සිදුවී තිබේ.මිල ගණන් පාලනය කිරීම වෙනුවට තීරුබදු පැනවීම සහ ඉරානය සමඟ ඇති කරගත් අනවශ්ය යුද තත්ත්වය හේතුවෙන් ට්රම්ප් විසින් මේ වන විට භාණ්ඩ මිල තවදුරටත් ඉහළ නංවා ඇත. එමෙන්ම අපරාධකරුවන් සහ මැර කල්ලි සාමාජිකයින් පිටුවහල් කිරීම කෙරෙහි පමණක් අවධානය යොමු කරනු වෙනුවට, ඔහුගේ නිලධාරීන් විසින් සාමාන්ය වයෝවෘද්ධ පුද්ගලයින් සහ උද්යාන සේවකයින් පවා අත්අඩංගුවට ගනිමින් සිටියි. ලතින් ජාතික පෙදරේරුවන් සහ විදුලි කාර්මිකයින් සේවයට වාර්තා කිරීමට බිය වීම හේතුවෙන් ටෙක්සාස් ප්රාන්තයේ ඉදිකිරීම්කරුවෝ දැඩි අර්බුදයකට මුහුණ පා සිටිති. ෆෙඩරල් නියෝජිතයින් අධිකරණ වරෙන්තු නොමැතිව පුද්ගලික දේපළවලට කඩා වදින පසුබිමක් තුළ, වෙස්මුහුණු පැළඳගත් ආයුධ සන්නද්ධ පුද්ගලයින්ගෙන් තමන්ට දැඩි තර්ජනයක් එල්ල වී ඇති බව හිස්පැනික් ජාතිකයින්ට හැඟී යාම පුදුමයට කරුණක් නොවන අතර, ට්රම්ප්ගේ ජනප්රියත්වය ඔවුන් අතර සියයට 22ක් දක්වා පහත වැටී ඇත්තේ ද මේ නිසාමය.
මෙම තත්ත්වය හේතුවෙන් එළඹෙන නොවැම්බර් මාසයේ පැවැත්වෙන මැදවාර මැතිවරණයේදී කොන්ග්රසයේ බලය රඳවා ගැනීම රිපබ්ලිකන්වරුන්ට දැඩි අභියෝගයක් වනු ඇත. ලතින් ජාතිකයින්ගේ සහාය අඛණ්ඩව ලැබෙනු ඇතැයි උපකල්පනය කරමින් ටෙක්සාස් වැනි ප්රාන්තවල සිදු කරන ලද මැතිවරණ සිතියම් වෙනස් කිරීම් ඔවුන්ටම පාරාවළල්ලක් වීමේ අවදානමක් පවතී. රට පුරා තරඟකාරී මැතිවරණයක් පැවතුණහොත්, හිස්පැනික් ඡන්ද හරහා ආසන දුසිම් ගණනක ප්රතිඵල වෙනස් කළ හැකිය. ඉකොනොමිස්ට් සහ යූගොව් ආයතන විසින් සිදු කරන ලද නවතම මත විමසුමකට අනුව, ලතින් ජාතිකයින් සියයට 43ක් ඩිමොක්රටික් අපේක්ෂකයින්ට සහාය පළ කරන අතර රිපබ්ලිකන් අපේක්ෂකයින්ට සහාය දක්වන්නේ සියයට 27ක් පමණි. පසුගිය මාස හය තුළ, නියෝජිත මන්ත්රී මණ්ඩලයේ බලය ඩිමොක්රටික් පක්ෂය විසින් අත්පත් කර ගැනීමේ සම්භාවිතාව සියයට 69 සිට 85 දක්වා ඉහළ ගොස් ඇති අතර, ආසන තුනෙන් එකක් සඳහා පමණක් මැතිවරණය පැවැත්වෙන සෙනෙට් සභාවේ බලය ලබා ගැනීමේ සම්භාවිතාව ද සියයට 29 සිට 47 දක්වා වර්ධනය වී තිබේ.
රිපබ්ලිකන්වරුන් දැඩි පරාජයකට මුහුණ දීමේ අවදානමක් මතුවීමට ලතින් ජාතිකයින්ගේ සහාය අහිමි වීම පමණක් හේතු වී නැත. ඉහළ යන භාණ්ඩ මිල සහ නීති විරෝධී හමුදාවක් මෙන් ක්රියා කරන ආගමන විගමන නිලධාරීන්ගේ හැසිරීම පිළිබඳව තවත් බොහෝ ඇමරිකානුවෝ කලකිරීමට පත්ව සිටිති. දේශපාලන ඉතිහාසය දෙස බැලීමේදී, යම් පක්ෂයක් විසින් සමස්ත ජනවර්ගයක්ම කොන් කිරීමේ දේශපාලනික ප්රතිවිපාක දිගු කාලයක් පුරා පවතින බව පෙනී යයි. 1952 සහ 1988 අතර කාලයේදී කැලිෆෝනියා ප්රාන්තය අවස්ථා දහයකින් නවයක්ම ජයග්රහණය කිරීමට රිපබ්ලිකන් ජනාධිපති අපේක්ෂකයින් සමත් වුවද, 1994 දී රිපබ්ලිකන් ආණ්ඩුකාරවරයෙකු විසින් සංක්රමණිකයින්ට එරෙහි ජනමත විචාරණයකට සහාය දීමෙන් පසු ඔවුන්ට කිසි දිනෙක එම ප්රාන්තය ජයග්රහණය කිරීමට හැකි වී නැත.
පවතින ගැටලුව හඳුනාගෙන ඇති වත්මන් පරිපාලනය සිය දැඩි ස්ථාවරය තරමක් ලිහිල් කිරීමට උත්සාහ කරමින් සිටින අතර, ස්වදේශ කටයුතු දෙපාර්තමේන්තුවේ නායකත්වයේ වෙනස්කම් සිදු කිරීම සහ ආගමන විගමන නිලධාරීන් බඳවා ගැනීමේ දැන්වීම්වලින් අන්තවාදී වදන් ඉවත් කර ඒවා වඩාත් මධ්යස්ථ ස්වරූපයකට ගෙන ඒම ඊට නිදසුන් වේ. සමූහ පිටුවහල් කිරීම් වෙනුවට අපරාධකරුවන් ඉවත් කිරීම කෙරෙහි පමණක් අවධානය යොමු කරන ලෙස ධවල මන්දිරය විසින් කොන්ග්රසයේ රිපබ්ලිකන්වරුන්ට උපදෙස් දී ඇතත්, මූලික ප්රතිපත්තිවල සැලකිය යුතු වෙනසක් සිදුවී නොමැති බැවින් බොහෝ ලතින් ජාතිකයින් තවමත් ජීවත් වන්නේ සිය පවුල්වලින් වෙන්වීමට සිදුවනු ඇතැයි යන දැඩි භීතියකිනි. මෙම පසුබිම තුළ ඩිමොක්රටික් පක්ෂයට ඉතා පහසු වාසිදායක තත්ත්වයක් නිර්මාණය වී ඇති අතර, හිතුමතේ පනවන තීරුබදු සහ වර්ගවාදී හිරිහැර කිරීම් වෙනුවට ආර්ථික ස්ථාවරත්වය සහ නීතියේ ආධිපත්යය සුරකින පක්ෂය ලෙස ඩිමොක්රටික්වරුන් තමන්ව ස්ථාපිත කරගතහොත්, එය කලකිරීමට පත් හිස්පැනික්වරුන්ට මෙන්ම සමස්ත ඇමරිකානුවන්ටම විශාල ආකර්ෂණයක් වනු ඇත.
(The Economist ඇසුරිනි)
