ඉරානයට සම්බන්ධ බවට සැක කෙරෙන මිසයිල සහ ඩ්රෝන ප්රහාර මාලාවක් හේතුවෙන් එක්සත් අරාබි එමීර් රාජ්යයේ සිවිල් වැසියන්ට හානි සිදුවී ඇති බව එරට ආරක්ෂක අමාත්යාංශය නිල වශයෙන් තහවුරු කර තිබේ.
මෙම ප්රහාර හේතුවෙන් පාකිස්තාන, නේපාල සහ බංග්ලාදේශ ජාතිකයින් තිදෙනෙකු ජීවිතක්ෂයට පත්ව ඇති අතර, තවත් පුද්ගලයින් 58 දෙනෙකු සුළු තුවාල ලබා ඇත.
තුවාල ලැබූවන් අතර එක්සත් අරාබි එමීර් රාජ්යය, ඊජිප්තුව, ඉතියෝපියාව, පිලිපීනය, පාකිස්තානය, ඉරානය, ඉන්දියාව, බංග්ලාදේශය, අසර්බයිජානය, යේමනය, උගන්ඩාව, එරිත්රියාව, ලෙබනනය සහ ඇෆ්ගනිස්ථානය යන රටවල ජාතිකයින් මෙන්ම ශ්රී ලාංකිකයින් ද සිටින බව වාර්තා වේ. කෙසේ වෙතත්, තුවාල ලැබූ පිරිස අතර සිටින ශ්රී ලාංකිකයින් ගණන හෝ ඔවුන්ගේ අනන්යතාවය පිළිබඳව කිසිදු නිශ්චිත තොරතුරක් අමාත්යාංශය විසින් මෙතෙක් අනාවරණය කර නොමැත.
2026 පෙබරවාරි 28 වැනිදා ආරම්භ වූ මෙම ඉරාන ප්රහාර මාලාවේදී මේ දක්වා බැලස්ටික් මිසයිල 165ක්, කෲස් මිසයිල 2ක් සහ ඉරාන ඩ්රෝන යානා 541ක් හඳුනාගෙන ඇති බව එක්සත් අරාබි එමීර් රාජ්යයේ ගුවන් හමුදාව සහ ගුවන් ආරක්ෂක බලකාය ප්රකාශ කරයි.
එම මිසයිල සහ ඩ්රෝන යානා සාර්ථකව මැඩපැවැත්වීමට එරට ගුවන් ආරක්ෂක පද්ධති ක්රියාත්මක වී ඇති අතර, එහිදී බැලස්ටික් මිසයිල 152ක් ගුවනේදීම විනාශ කර ඇති බවත් ඉතිරි මිසයිල 13 මුහුදට පතිත වී ඇති බවත් බලධාරීහු පවසති. එසේම හඳුනාගත් කෲස් මිසයිල දෙකම සාර්ථකව විනාශ කර දැමීමට ආරක්ෂක අංශ සමත් වී තිබේ.
අඛණ්ඩව එල්ල වූ ඩ්රෝන යානා 541න් 506ක්ම අතරමගදී විනාශ කර දැමීමට ඔවුන් සමත් වී ඇති නමුත්, ඉතිරි ඩ්රෝන යානා 35 රට අභ්යන්තරයට කඩා වැටීම හේතුවෙන් දේපළ හානි සිදුවී ඇත.
ප්රහාරයේ දෙවන දිනය වූ උදෑසන කාලය තුළදී පමණක් බැලස්ටික් මිසයිල 20ක් විනාශ කර ඇති අතර තවත් මිසයිල 8ක් මුහුදට පතිත වී තිබේ. එම කාල සීමාව තුළදීම කෲස් මිසයිල 2ක් සහ ඩ්රෝන යානා 311ක් විනාශ කිරීමට ආරක්ෂක අංශ සමත් වී ඇති නමුදු, ඩ්රෝන යානා 21ක් සිවිල් ඉලක්ක වෙත පතිත වී ඇත.
මෙලෙස ආරක්ෂක පද්ධති මගින් මිසයිල සහ ඩ්රෝන යානා ගුවනේදීම විනාශ කිරීමේදී ඒවායේ සුන්බුන් විවිධ ප්රදේශවලට කඩා වැටී ඇති අතර, ඒ හේතුවෙන් සිවිල් දේපළ රැසකට සුළු හා මධ්යම ප්රමාණයේ හානි සිදුවී තිබේ.
ඕනෑම තර්ජනයකට සාර්ථකව මුහුණ දීම සඳහා තම සන්නද්ධ අංශ පූර්ණ සූදානමකින් පසුවන බවත්, රටෙහි පුරවැසියන්ගේ, පදිංචිකරුවන්ගේ සහ සංචාරකයින්ගේ ආරක්ෂාව තහවුරු කිරීම තම ප්රමුඛතම වගකීම බවත් එක්සත් අරාබි එමීර් රාජ්යයේ ආරක්ෂක අමාත්යාංශය අවධාරණය කර සිටියි.