එක්සත් ජනපදය විසින් ඉරානය තුළ අඛණ්ඩව සිදුකරන හමුදා ක්රියාමාර්ග මධ්යයේ, ගැටුම් පවතින කලාපවල දරුවන් සහ ඔවුන්ගේ අධ්යාපනය පිළිබඳව සඳුදා නිව්යෝර්ක් නුවර පැවති එක්සත් ජාතීන්ගේ ආරක්ෂක මණ්ඩල රැස්වීමෙහි මුලසුන ඇමරිකානු ජනාධිපති ආර්යා මෙලානියා ට්රම්ප් විසින් හොබවන ලදී. මේ මස එක්සත් ජාතීන්ගේ ආරක්ෂක මණ්ඩලයේ සභාපතිත්වය එක්සත් ජනපදයට හිමිව ඇති අතර, ලෝක නායකයෙකුගේ බිරිඳක් හෝ ස්වාමිපුරුෂයෙකු විසින් මෙවැනි රැස්වීමක මුලසුන හෙබවූ පළමු අවස්ථාව මෙය ලෙස ඉතිහාසයට එක්වෙයි.
ඉවසීම සහ ලෝක සාමය ප්රවර්ධනය කිරීම සඳහා දරුවන්ගේ අධ්යාපනය සතු කාර්යභාරය පිළිබඳව ජනාධිපති ආර්යාව සිය කතාවේදී වැඩිදුරටත් අවධාරණය කළාය. කිසිදු නිශ්චිත හමුදා මෙහෙයුමක් පිළිබඳව සෘජුව සඳහන් නොකළද, ජීවිතක්ෂයට පත් වූ ඇමරිකානු හමුදා සාමාජිකයින්ගේ පවුල් වෙත ඇය සිය ශෝකය ප්රකාශ කර සිටියාය. එම හමුදා සාමාජිකයින්ගේ නිර්භීතකම සහ කැපවීම සැමවිටම සිහිපත් කරන බව පැවසූ ඇය, තුවාල ලැබූ සියලු දෙනාට ඉක්මන් සුවය ප්රාර්ථනා කළ අතර මෙම අභියෝගාත්මක කාල පරිච්ඡේදයේදී තම යාඥාවන් ඔවුන් සමඟ පවතින බවද සඳහන් කළාය. එමෙන්ම, නිල වශයෙන් දරුවන්ගේ අයිතිවාසිකම් වෙනුවෙන් පෙනී සිටින ට්රම්ප් මහත්මිය එහිදී ප්රකාශ කළේ, එක්සත් ජනපදය ලොව පුරා සිටින සියලුම දරුවන් වෙනුවෙන් පෙනී සිටින බවත්, ඉක්මනින් ඔවුන්ට සාමය උදාවනු ඇතැයි තමා බලාපොරොත්තු වන බවත්ය.
එක්සත් ජාතීන්ගේ නියෝජ්ය මහලේකම් රෝස්මරී ඩිකාලෝ ද මෙම රැස්වීම අමතමින් කියා සිටියේ, ගැටුම් හටගන්නා විට ඉන් වඩාත්ම දැඩි ලෙස පීඩාවට පත්වන්නේ දරුවන් බවයි. පසුගිය දින දෙක තුළ මෙම සත්යය නැවත වරක් සිහිපත් වූ බවත්, කලාපයේ සිදුවන හමුදා මෙහෙයුම් හේතුවෙන් ඊශ්රායලය, එක්සත් අරාබි එමීර් රාජ්යය, කටාර්, බහරේන් සහ ඕමාන් යන රටවල පාසල් වසා දමා දුරස්ථ අධ්යාපන ක්රම වෙත යොමුවීමට සිදුවී ඇති බවත් ඇය පෙන්වා දුන්නාය.
මේ අතර, සෙනසුරාදා දින ඉරානයේ මිනාබ් නගරයේ ප්රාථමික පාසලකට එල්ල වූ ප්රහාරයකින් පුද්ගලයින් 153 දෙනෙකු මියගිය බව ඉරාන බලධාරීහු පවසති. මෙම ප්රහාරයේ වගකීම එක්සත් ජනපදයට සහ ඊශ්රායලයට පැටවීමට ඉරානය කටයුතු කර ඇත. සඳුදා රැස්වීම ආරම්භ වීමට පෙර අදහස් දැක්වූ එක්සත් ජාතීන්ගේ ඉරාන තානාපති අමීර් සයීඩ් ඉරවානි ප්රකාශ කළේ, ආරක්ෂක මණ්ඩලයේ සභාපතිත්වය භාරගත් පළමු දිනයේම එක්සත් ජනපදය විසින් දරුවන් ආරක්ෂා කිරීම පිළිබඳ ඉහළ පෙළේ රැස්වීමක් කැඳවීම අතිශයින්ම ලැජ්ජා සහගත මෙන්ම කුහක ක්රියාවක් බවයි.
කෙසේ වෙතත්, ඇමරිකානු හමුදාවේ මධ්යම අණදෙන මූලස්ථානය පවසා ඇත්තේ මිනාබ් ප්රදේශයේ සිදුවීම පිළිබඳ වාර්තා සම්බන්ධයෙන් තමන් සොයා බලමින් සිටින බවයි. එසේම, ඊශ්රායල හමුදාව ප්රකාශ කළේ අදාළ ප්රදේශය තුළ සිදුකළ කිසිදු ඊශ්රායල හමුදා මෙහෙයුමක් පිළිබඳව තමන් දැනුවත් නොමැති බවයි. මේ සම්බන්ධයෙන් අදහස් දක්වමින් ඇමරිකානු රාජ්ය ලේකම් මාර්කෝ රුබියෝ සඳුදා ප්රකාශ කර සිටියේ, එක්සත් ජනපදය කිසිවිටෙකත් හිතාමතාම පාසලක් ඉලක්ක කර ප්රහාර එල්ල නොකරන බවයි.
