ලිබියාවේ හිටපු නායක කර්නල් මුවම්මර් ගඩාෆිගේ පුත් සයිෆ් අල්-ඉස්ලාම් ගඩාෆි වෙඩි තබා ඝාතනය කර ඇති බව ජාත්යන්තර මාධ්ය වාර්තා කරයි. කලක් තම පියාගේ දේශපාලන උරුමකරු ලෙස සැලකුණු 53 හැවිරිදි සයිෆ් අල්-ඉස්ලාම්ගේ මරණය, ඔහුගේ දේශපාලන කණ්ඩායමේ ප්රධානියා විසින් අඟහරුවාදා දිනයේදී ලිබියානු ප්රවෘත්ති ඒජන්සිය වෙත තහවුරු කර තිබේ.
ඔහුගේ නීතිඥවරයා AFP පුවත් සේවයට පවසා ඇත්තේ සිව් දෙනෙකුගෙන් යුත් විශේෂ කොමාන්ඩෝ කණ්ඩායමක් විසින් සින්ටාන් නගරයේ පිහිටි ඔහුගේ නිවසේදී මෙම ඝාතනය සිදු කර ඇති බවයි. මෙම ප්රහාරය පිටුපස සිටින්නේ කවුරුන්ද යන්න මෙතෙක් පැහැදිලි වී නොමැති අතර, සිද්ධිය සම්බන්ධයෙන් පරස්පර විරෝධී අදහස් ද පළ වී තිබේ. විශේෂයෙන් ඔහුගේ සොහොයුරිය ලිබියානු රූපවාහිනී නාලිකාවක් වෙත පවසා ඇත්තේ ඔහු ලිබියා-ඇල්ජීරියා දේශසීමාව ආසන්නයේදී මියගොස් ඇති බවයි.
1969 සිට 2011 වසරේ කැරැල්ලකින් බලයෙන් පහ කර මරා දමන තෙක් ලිබියාව පාලනය කළ මුවම්මර් ගඩාෆිගෙන් පසුව රටේ සිටි බලවත්ම පුද්ගලයා ලෙස සයිෆ් අල්-ඉස්ලාම් සැලකේ. 1972 දී උපත ලැබූ ඔහු රජයේ නිල තනතුරක් නොදැරුවද, 2000 වසරේ සිට බටහිර රටවල් සමඟ සබඳතා යළි ගොඩනැගීමටත්, ලිබියාවේ න්යෂ්ටික අවි වැඩසටහන අත්හැරීම වැනි තීරණාත්මක ප්රතිපත්තිමය වෙනස්කම් සිදු කිරීමටත් පුරෝගාමී විය. මෙම ක්රියාමාර්ග හේතුවෙන් ලිබියාවට එරෙහිව පනවා තිබූ ජාත්යන්තර සම්බාධක ඉවත් කර ගැනීමට හැකි වූ අතර, එකල ඔහු ප්රතිසංස්කරණවාදී නායකයෙකු ලෙස බටහිර ලෝකයේ අවධානය දිනා ගත්තේය.
ගඩාෆි පාලනය බිඳ වැටීමෙන් පසු රජයට එරෙහි විරෝධතා මැඩපැවැත්වීමට දායක වූ බවට චෝදනා ලැබූ සයිෆ් අල්-ඉස්ලාම්, ප්රතිවාදී මිලීෂියා කණ්ඩායමක් විසින් සින්ටාන් නගරයේ වසර හයක් පමණ සිරගත කර ගෙන සිටියේය. 2011 විරෝධතා මර්දනය කිරීමේදී මනුෂ්යත්වයට එරෙහි අපරාධ සිදු කළ බවට ජාත්යන්තර අපරාධ අධිකරණය (ICC) විසින් ඔහුට එරෙහිව වරෙන්තු නිකුත් කර තිබුණි. තවද, එක්සත් ජාතීන්ගේ සහාය ලබන ට්රිපෝලි රජය යටතේ ක්රියාත්මක වූ අධිකරණයක් මගින් 2015 වසරේදී ඔහු නොමැතිවම ඔහුට මරණ දඬුවම නියම කරන ලදී.
කෙසේ වෙතත්, 2017 වසරේදී නැගෙනහිර ලිබියාවේ ටොබ්රූක් පාලනය යටතේ සම්මත වූ පොදු සමාව දීමේ නීතියක් යටතේ ඔහු නිදහස ලැබීය. රාජ්ය බලය උරුමයෙන් ලබා ගැනීමට තමන්ට අදහසක් නොමැති බව ඔහු මීට පෙර පවසා තිබුණද, දින නියමයක් නොමැතිව කල් දමන ලද 2021 ජනාධිපතිවරණය සඳහා තරඟ කිරීමට ඔහු සූදානමින් සිටියේය. ගඩාෆි පාලනය බිඳ වැටීමෙන් පසු ලිබියාව විවිධ සන්නද්ධ කණ්ඩායම් සහ ප්රතිවාදී රජයන් දෙකක් යටතේ බෙදී පවතින පසුබිමක මෙම ඝාතනය සිදුව තිබේ.
