බන්ධනාගාරවල රඳවා සිටින පුද්ගලයින් මුහුණ දෙන ගැටලු හඳුනා ගනිමින් ඔවුන්ගේ සුබසාධන කටයුතු වඩාත් විධිමත් කිරීමේ අරමුණින් රජය විසින් නව නිරීක්ෂණ කමිටුවක් ස්ථාපනය කර තිබේ. සාමාජිකයන් හය දෙනෙකුගෙන් යුත් මෙම නව මණ්ඩලය සඳහා ප්රසිද්ධ නිරූපණ ශිල්පිනියක මෙන්ම හිටපු රූ රැජිනක ද වන ස්ටෙෆ්නි සිරිවර්ධන මහත්මිය ඇතුළත් කර තිබීම සමාජය තුළ දැඩි කතාබහක් නිර්මාණය කිරීමට සමත් වී ඇත.
විශේෂයෙන්ම බන්ධනාගාර වැනි සංකීර්ණ රාජ්ය පද්ධතියක නිරීක්ෂණ කටයුතු සඳහා කලා ක්ෂේත්රය නියෝජනය කරන නිරූපණ ශිල්පිනියක පත් කිරීම සම්බන්ධයෙන් සමාජ මාධ්ය ඔස්සේ විවිධ විවේචන සහ සංවාද ගොඩනැගී තිබේ.කෙසේ වෙතත්, මෙම පත්කිරීම සම්බන්ධයෙන් අදහස් දක්වන බන්ධනාගාර මාධ්ය ප්රකාශක ඒ.සී. ගජනායක මහතා පෙන්වා දෙන්නේ මෙය බන්ධනාගාර දෙපාර්තමේන්තුවේ සාමාන්ය ක්රියා පටිපාටියට අනුකූලව සිදු වූවක් බවයි. බන්ධනාගාර පද්ධතිය තුළ ප්රධාන සහ උප වශයෙන් නිරීක්ෂණ කමිටු ද්විත්වයක් ක්රියාත්මක වන අතර, ස්ටෙෆ්නි සිරිවර්ධන මහත්මිය ඇතුළු පිරිස පත් කර ඇත්තේ ඉන් ප්රධාන නිරීක්ෂණ කමිටුව සඳහාය. සාමාන්යයෙන් සාමාජිකයන් හත් දෙනෙකුගෙන් මෙම කමිටුව සමන්විත විය යුතු වුවද, මේ වන විට පත් කර ඇත්තේ සාමාජිකයන් හය දෙනෙකු පමණක් වන අතර ඉතිරි පුරප්පාඩුව ඉදිරියේදී පිරවීමට රජය අපේක්ෂා කරයි.
මෙම පත්කිරීමට ලක්වූ ස්ටෙෆ්නි සිරිවර්ධන මහත්මිය 2011 සහ 2013 වසරවලදී ශ්රී ලංකා රූ රැජින සහ ආසියානු රූ රැජින ලෙස කිරුළ දිනාගත් තැනැත්තියක් වුවද, ඇය මෙම තනතුරට පත් කර ඇත්තේ හුදෙක් ජනප්රියත්වය මත පමණක් නොවන බව අනාවරණය වේ. ඇය ඇතුළු මෙම කමිටුවට පත් කළ කණ්ඩායම දීර්ඝ කාලයක සිට බන්ධනාගාර දෙපාර්තමේන්තුව සමඟ සහයෝගයෙන් කටයුතු කළ පිරිසක් බව බන්ධනාගාර බලධාරීන් තහවුරු කරයි. රැඳවූවන් විඳින දුෂ්කරතා නිරීක්ෂණය කර ඒ පිළිබඳව අදාළ බලධාරීන් දැනුවත් කිරීම මෙන්ම රැඳවූවන්ගේ සුබසිද්ධිය වෙනුවෙන් සෘජුවම මැදිහත් වීම මෙම කමිටුවේ ප්රධාන වගකීම වේ.
මේ අතර ස්ටෙෆ්නි සිරිවර්ධන මහත්මියගේ පත්කිරීම සම්බන්ධයෙන් එල්ල වන විවේචනවලට පිළිතුරු දෙමින් ඇයගේ ඥාතීත්වයෙන් බාප්පා වන විශ්රාමික ජ්යෙෂ්ඨ නියෝජ්ය පොලිස්පති චම්පික සිරිවර්ධන මහතා සමාජ මාධ්ය සටහනක් තබමින් කරුණු පැහැදිලි කර තිබේ. ඔහු පෙන්වා දෙන පරිදි ස්ටෙෆ්නි සිරිවර්ධන මහත්මිය පසුගිය වසර දහයකටත් අධික කාලයක සිට ස්වේච්ඡාවෙන් බන්ධනාගාර රැඳවියන්ගේ සුබසාධනය වෙනුවෙන් කැපවී කටයුතු කළ තැනැත්තියකි. විශේෂයෙන්ම බන්ධනාගාරගත කාන්තාවන්ගේ මානසිකත්වය නඟාසිටුවීම, ඔවුනට අවශ්ය සනීපාරක්ෂක ද්රව්ය සහ වෘත්තීය පුහුණු උපකරණ ලබා දීම මෙන්ම, දඩ මුදල් ගෙවා ගත නොහැකිව සිරගත වූ කාන්තාවන් මුදා ගැනීමට පෞද්ගලික ධනය වැය කිරීම වැනි සමාජ සත්කාර රැසක් ඇය විසින් සිදු කර ඇති බව එම සටහනේ දැක්වේ.
