සිංහල සංගීත වංශකතාවේ අතිශය ආදරණීය කටහඬක් ලෙස සම්භාවනාවට පාත්ර වූ ප්රවීණ ගායක මිල්ටන් මල්ලවආරච්චිගේ ජීවන පුවත ඇසුරෙන් නිර්මාණය වූ 'එදා රෑ' චිත්රපටයේ මුහුරත් උළෙල පසුගියදා පැවැත්විණි. "විරහ ගීතවල කුමාරයා" යන විරුදාවලියෙන් පිදුම් ලැබූ මිල්ටන්, දශක ගණනාවක් පුරා මිලියන සංඛ්යාත රසික හදවත් ස්පර්ශ කරමින් සිංහල සංගීතයේ ස්වර්ණමය යුගයක් හැඩගැන්වීමට සුවිශේෂී දායකත්වයක් ලබා දුන්නේය.
උද්යෝගය සහ කලාත්මක බවින් පිරි ඔහුගේ ජීවිත කතාව පදනම් කරගත් මෙම සිනමා පටය, ඔහුගේ සංගීත ප්රතිභාව මෙන්ම මානවීය ගුණාංග ද එකසේ සමරන නිර්මාණයකි.1960 දශකයේ සිට 1990 දශකය දක්වා දිවෙන මිල්ටන් මල්ලවආරච්චිගේ සංගීත චාරිකාව තුළ ඔහු ගීත අටසිය පනහකට අධික ප්රමාණයක් ගායනා කර ඇති අතර, එම ගීත අදටත් ජන හදවත් තුළ අමරණීය කලාකෘති ලෙස පවතී. ඔහුගේ මධුර ස්වරයෙන් ගැයුණු එදා රෑ, මධු මාල, මේ මැයි ගහ යට, ඔරුවක පාවෙනා සහ කඳු පාර ඈත අයිනේ වැනි නිර්මාණ තුළින් ප්රේමය, බලාපොරොත්තුව සහ සංවේදීබව මැනවින් නිරූපණය කෙරේ. හුදු සංගීත දිවියට පමණක් සීමා නොවී, කලාකරුවෙකු ලෙස ඔහු මුහුණ දුන් පෞද්ගලික කැපකිරීම්, සමාජීය අභියෝග සහ විනෝදාස්වාද කර්මාන්තයේ සිදුවූ වේගවත් වෙනස්වීම් හමුවේ ඔහු ගිය ගමන මෙම චිත්රපටය හරහා විවරණය වේ.
මිල්ටන්ගේ ජීවිතයේ මුල් අවධියේ සිට ජනප්රියත්වයේ හිනිපෙත්තට ළඟාවීම දක්වා වූ ගමන් මග මෙන්ම, ප්රසිද්ධිය පිටුපස සැඟවුණු ඔහුගේ අභ්යන්තර අරගල ද මෙම සිනමා පටයෙන් ගවේෂණය කරනු ලබයි. සංගීත ලෝකයේ දැවැන්තයෙකු ලෙස ඔහු ලැබූ ජයග්රහණවලට අමතරව, ආදරණීය ස්වාමිපුරුෂයෙකු, පියෙකු සහ සිහින පසුපස හඹා ගිය සැබෑ මිනිසෙකුගේ සියුම් ජීවන අවස්ථා ද මෙහිදී නිරූපණය කෙරේ. ආකර්ෂණීය දෘශ්ය රූපකරණය සහ ප්රබල කතා වින්යාසය මුසු කරමින්, නව පරම්පරාවට මිල්ටන් මල්ලවආරච්චිව නැවත හඳුන්වා දීම මෙම නිර්මාණයේ අරමුණයි.
වන් ලයින් ප්රොඩක්ෂන් ඇන්ඩ් එන්ටටේන්මන්ට් (One Line Production & Entertainment) පුද්ගලික සමාගම වෙනුවෙන් රනිල් මල්ලවආරච්චි, ආචාර්ය අරෝෂ ප්රනාන්දු සහ චමක මංජුල යන මහත්වරුන් විසින් මෙම චිත්රපටය නිෂ්පාදනය කරනු ලබයි. අරුණ ජයවර්ධනගේ අධ්යක්ෂණයෙන් හැඩවන මෙම චිත්රපටයේ කතාව ධම්මික සල්වතුර විසින් රචනා කර ඇති අතර, තිර රචනය සහ නිර්මාණ සැලසුම්කරණය සිදු කර ඇත්තේ සුනෙත් මාලිංග ලොකුහේවා විසිනි. චන්න දේශප්රිය කැමරා අධ්යක්ෂණයෙන් ද, ශාන් අල්විස් සංස්කරණය සහ වර්ණ සංයෝජනයෙන් ද දායක වන අතර, සුරේෂ් මාලියද්ද විසින් පසුබිම් සංගීතය නිර්මාණය කර ඇත. මීට අමතරව, කලා අධ්යක්ෂණයෙන් අකුරම්බොඩ පියතිස්ස සහ ඇඳුම් නිර්මාණයෙන් පවිත්රා අබේසිංහ එක්වෙති.
මෙහි ප්රධාන චරිත සඳහා රොෂාන් රවින්ද්ර, නෙත්මි රොෂෙල්, සෙනාලි ෆොන්සේකා, ශෙෂාද්රි ප්රියසාද්, දිනෙත් ද සිල්වා සහ ප්රසන්න දැකුම්පිටිය ඇතුළු නළු නිළියන් රැසක් රංගනයෙන් දායක වෙති. එමෙන්ම සාරංග දිසාසේකර සහ නිහාරි පෙරේරා ආරාධිත රංගනයෙන් මෙම නිර්මාණයට එක්ව සිටින අතර දුලංජන දිල්ෂාන්, මහේන්ද්ර වීරරත්න, රොෂාන් රණවණ, ධර්මප්රිය ඩයස් සහ ජෙහාන් අප්පුහාමි වැනි ශිල්පීන් ද සෙසු චරිත නිරූපණය කරති.
මිල්ටන් මල්ලවආරච්චි ගැයූ මධු මල, උපුල් නුවන් විදහා, මා නිසා ඔබ, රණ බර ඉඳු දුනු, අවසර නැත මට සහ පෙම් රජ දහනේ ඇතුළු ජනප්රිය ගීත රැසක් චිත්රපටය සඳහා ඇතුළත් කර තිබේ. චිත්රපටයේ ගීත ගායනයෙන් ප්රියනාත් විදානපතිරණ, රනිල් මල්ලවආරච්චි සහ පවන් මල්ලවආරච්චි දායකත්වය ලබා දෙන අතර, යුග ගායනා සඳහා සමිතා මුදුන්කොටුව සහ උරේෂා රවිහාරි එක්ව සිටිති.
Pix By -Indika Mallawarachchi
