පසුගිය සතියේ නිව්යෝර්ක් අධිකරණයක් හමුවේ පෙනී සිටි වෙනිසියුලානු ජනාධිපති නිකලස් මදුරෝ තමන් 'දෙවියන්ගේ මිනිසෙක්' බවත් නිදහස ලබන බවත් ප්රකාශ කළ අතර, ඒ සමගම ඔහුගේ ඇදහිලි ගැන කථාබහක් අරඹී ඇත.රෝමානු කතෝලික පසුබිමක් සහිත ඔහු ඉන්දීය ආධ්යාත්මික ගුරුවරයෙකු වන දිවංගත සත්ය සායි බාබාගේ දැඩි භක්තිකයෙකු බව මාධ්ය වාර්තා පෙන්වා දෙයි.
ඉන්දියාවේ සිට කිලෝමීටර් 15,000ක් ඈතින් පිහිටි රටක් වන කතෝලික ආගමිකයින් බහුල වෙනිසියුලාවේ සත්ය සායි බාබා කෙතරම් ජනප්රිය වී ඇත්ද යත්, ජනාධිපති මදුරෝ පමණක් නොව ඔහුගේ බිරිඳ සිලියා ෆ්ලෝරස් සහ වැඩබලන ජනාධිපති ඩෙල්සි රොඩ්රිගස් වැනි ඉහළ පෙළේ නායකයින් රැසක් සායි බාබාගේ අනුගාමිකයින් බවට පත්ව සිටිති.
නීතිඥවරියක සහ දේශපාලනඥයෙකු වන මදුරෝගේ බිරිඳ සිලියා ෆ්ලෝරස් විවාහයට පෙර සිටම සායි භක්තිකයෙකු වූ අතර, 2005 වසරේදී පාර්ලිමේන්තු කථානායකවරයා ලෙස කටයුතු කරමින් සිටියදී මදුරෝ ඇය සමඟ ආන්ද්රා ප්රදේශ්හි ප්රශාන්ති නිලයම් ආශ්රමය වෙත පැමිණ බාබා බැහැදැක තිබේ.
සත්ය සායි බාබා 2011 වසරේදී අභාවප්රාප්ත වූ අවස්ථාවේදී එවකට විදේශ අමාත්යවරයා ලෙස කටයුතු කළ මදුරෝ ඇතුළු රජය එය ජාතික වැදගත්කමක් සහිත සිදුවීමක් ලෙස සලකා එක් දින ජාතික ශෝක කාලයක් ප්රකාශයට පත් කළ අතර, රටේ පුරවැසියෙකු නොවන ආගමික නායකයෙකු වෙනුවෙන් රජය එවැනි ගෞරවයක් ලබා දීම කාගේත් විමතියට හේතු වූ සුවිශේෂී සිදුවීමක් විය.
වෙනිසියුලාව තුළ මෙම ආධ්යාත්මික ව්යාපාරය ආරම්භ වී ඇත්තේ ඇනා එලේනා ඩයස්-වියානා නම් කාන්තාවකට වයස අවුරුදු 25දී පෙනුණු සිහිනයක් පදනම් කරගෙන වන අතර, ඇය සිහිනයෙන් දුටු ඇෆ්රෝ කොණ්ඩා මෝස්තරයක් සහිත පුද්ගලයා වසර පහකට පසුව යේසුස් වහන්සේ පිළිබඳ වාර්තා වැඩසටහනකදී දැකීමෙන් පසු ඔහු සත්ය සායි බාබා බව හඳුනාගෙන තිබේ.
පසුව ඇය "සියල්ලන්ටම ආදරය කරන්න, සියල්ලන්ටම සේවය කරන්න" යන බාබාගේ ඉගැන්වීම් පදනම් කරගෙන කරාකස් නුවර සිය නිවසේ කුඩා හමුවීම් සහ සේවා වැඩසටහන් ආරම්භ කළ අතර, 1974 වන විට එය ස්පාඤ්ඤ භාෂාවෙන් ක්රියාත්මක වන පළමු සායි කණ්ඩායම ලෙස ස්ථාපිත වී 1988 වසරේදී ඇය ඇතුළු 64 දෙනෙකුගෙන් යුත් කණ්ඩායමක් සමඟ ඉන්දියාවට පැමිණීමෙන් පසු එයට නිල පිළිගැනීමක් ලැබිණි.
වර්තමානය වන විට ලතින් ඇමරිකානු රටවල් 22ක මෙම සංවිධානය ක්රියාත්මක වන අතර, ෂිරිදි සායි බාබාගේ අවතාරයක් ලෙස සැලකෙන 1926දී උපත ලැබූ සත්ය සායි බාබාගේ වැඩිම අනුගාමිකයින් පිරිසක් සහ මධ්යස්ථාන 30කට අධික ප්රමාණයක් පවතින්නේ වෙනිසියුලාව තුළ බව වාර්තා වේ.
